Dual PanelTonggo Mangindo Pangurupion Mangimbang Munsuh
1Sada doding. Psalm humbani si Asap. (83-2) Ham, Naibata, ulang ma sai sip Ham, ulang ma ipanengel-nengel Ham, ulang ma sai soh Ham, ale Naibata!
2(83-3) Ai tonggor ma, sai manggeori do munsuh-Mu, na mandomdomi Ham, sai ipadorgak do uluni.
3(83-4) Sai mambahen ranggi-ranggian do sidea mangimbang munsuh-Mu, anjaha manriahi sidea manlawan halak na niondingan-Mu.
4(83-5) Nini sidea, “Eta, boiskon hita ma sidea songon sada bangsa, ase ulang be dong na mardingat Israel.”
5(83-6) Tongon, marsada ni uhur do sidea manriah, anjaha marpadan do sidea manlawan Ham:
6(83-7) Lampolampo ni Edom pakon Moab, halak Ismael pakon halak Hagar;
7(83-8) Gebal pakon Amon ampa Amalek, halak Palistim pakon par Tirus;
8(83-9) dihut do Assur hasoman ni sidea, gabe panungkoli bani ginompar ni si Lot. Sela.
9(83-10) Bahen Ham ma bani sidea songon na bani halak Midian, songon na bani si Sisera, ampa si Jabin i lambung ni Bah Kison,
10(83-11) ai ma na bois dohorhon Endor, gabe napu ni juma ni sidea.
11(83-12) Bahen Ham ma dompak na sangap ni sidea songon na bani si Oreb pakon si Zeb, anjaha ganup raja ni sidea songon si Zeba pakon si Salmuna,
12(83-13) na mangkatahon ai, “Buat hita ma sagala ianan ni Naibata banta!”
13(83-14) Ham Naibata, bahen Ham ma sidea songon tompoh-tompoh, songon lapa-lapa i lobei ni logou.
14(83-15) Songon apuy, na manutung harangan, songon gara ni apuy, na mamonsongkon dolog,
15(83-16) sonai ma usir Ham sidea marhitei halisungsung-Mu, anjaha songgoti Ham sidea marhitei haba-haba-Mu.
16(83-17) Gok ma bohi ni sidea bahen Ham bani habadoron, ase pindah-pindah sidea bani goran-Mu, Ham Jahowa.
17(83-18) Sai bador anjaha tarsonggot ma sidea sadokah ni dokahni, maila anjaha magou ma sidea,
18(83-19) ase andohar ibotoh sidea, pitah Ham do na margoran Jahowa, Na Tang Sitimbulan i sab tanoh on.