Dual PanelNaibata do Sipambalas na Bonar
1Ham Naibata Jahowa sipambalas, Ham Naibata, sipambalas, roh ma Ham ibagas sondang-Mu!
2Jongjong ma Ham, ale Sipanguhum tanoh on, balaskon Ham ma pambahenan ni sigijang uhur.
3Piga dokah on parjahat in, Ham Jahowa, piga dokah on, sai marsurak-surak parjahat in?
4Sai hata hajungkaton do isahapkon sidea, sai toal do parsahap ni ganup sihorjahon hajahaton.
5Sai irojati sidea do bangsa-Mu, Ham Jahowa, sai iodoh-odoh do parbagianan-Mu.
6Ibunuhi sidea do na mabalu pakon halak panginsolat, anjaha isongkiki halak na tading maetek,
7nini, “Seng ididah Jahowa in, anjaha seng sai ipabotoh-botoh Naibata ni si Jakob.”
8Botoh ma, ale halak na oto i tongah-tongah ni bangsa in, anjaha hanima halak na lontong, antigan pe maruhur hanima?
9Ia, sisuan pinggol, mintor ma lang marpanangar? Ia, sijadihon mata, mintor ma lang marpangidah?
10Ia, siajar bangsa-bangsa, mintor ma lang manguhum? Ia, sipangajari jolma, mintor ma lang marpambotoh?
11Jahowa do sitanda pingkiran ni jolma; tongon, haganupan ai logou do.
12Martuah do halak ni niajar-Mu, Ham Jahowa, anjaha na pinodahan-Mu marhitei titah-Mu.
13laho pasonangkonsi bani ari na jahat, ronsi siap ihurak tanoman bani parjahat.
14Halani, seng anjai tulakon ni Jahowa bangsa-Ni, anjaha seng tadingkonon-Ni parbagianan-Ni.
15Tongon, sai mulak hu hapintoron do uhum, anjaha ihutkonon ni sagala na pintor uhur do in.
16Ise ma nani hasomanku laho mangimbang parjahat? Ise ma nani sipangurupi bangku manlawan sihorjahon hajahaton?
17Ambit lang Jahowa sipangurupi bangku, narus ma marianan tonduyhu bani ianan na malungun.
18Anggo hupingkir, “Jiris ma naheihu, jadi itungkol parontou ni uhur-Mu do ahu, Ham Jahowa.”
19Sanggah lutu pingkiranku ibagas, jadi apoh-apoh-Mu do pasonang uhurhu.
20Mintor sapanriah ma Ham pakon halak sihunduli hotak hamagouan, na mamingkiri hamagouan marsipakulah-kulahkon habonaron?
21Iparburu sidea do hosah ni parpintor, anjaha idabuh uhum bani daroh na so marpipot.
22Tapi Jahowa do batar-batar bangku, anjaha Naibatangku dolog batu, haporusan bangku.
23Ia do mambalaskon bani sidea hajahaton ni sidea ai; boiskonon-Ni do sidea halani hajahaton ni sidea. Tongon, boiskonon ni Jahowa Naibatanta do sidea.