Dual PanelTonggo Mansopotkon Salah humbani Bangsa ai
1Jadi bani ari dua puluh ompat bani bulan ai, martumpu ma bangsa Israel, marpuasa anjaha marhiou guni, anjaha manjujung tanoh.
2Domma ipapulig halak Israel hinan dirini humbani ganup halak na legan; jadi jongjong ma sidea mansopotkon dousani ampa hajahaton ni ompung ni sidea.
3Sanggah na jongjong sidea bani ianan ni sidea ai, ibasahon ma bani sidea humbani buku titah ni Jahowa, Naibata ni sidea ai, saparompat ari dokahni; saparompat ari nari isopotkon sidea ma dousani anjaha martonggo hubani Jahowa, Naibata ni sidea.
4Bani ianan ni halak Levi jongjong ma si Jesua; si Bani, si Kadmiel, si Sebanya, si Buni, si Serebya, si Bani pakon si Hanani; doruh-doruh ma sidea hubani Jahowa, Naibata ni sidea.
5Roh use ma hata ni halak Levi: Si Jesua, si Kadmiel, si Bani, si Hasabneya, si Serebya, si Hodia, si Sebanya ampa si Petaya mangkatahon, “Jongjong ma nasiam anjaha puji nasiam ma Jahowa Naibata nasiam humbani sadokah ni dokahni ronsi sadokah ni dokahni!” Jadi ipuji sidea ma goran-Ni na marmulia in, na mangatasi sagala pamujion ampa parpasangap,
6“Sasada Ham do Naibata, ale Jahowa! Ham do na manompa langit ampa langit ni langit ampa ganup balani, tanoh ampa na i atasni, laut ronsi ganup isini; anjaha Ham do na marmudu-muduhon ai ganup, anjaha ganup bala na i langit marsombah Bamu.
7Ham do Jahowa Naibata na mamilih si Abram, anjaha na mangarahkonsi luar hun Ur, na i Kasdim, anjaha ibahen Ham do goranni si Abraham.
8Anjaha jumpah Ham do uhurni marsijoloman i lobei-Mu, anjaha marpadan do Ham pakonsi, mamberehon hubani ginomparni tanoh ni halak Kanaan, Het, Amori, Peresi, Jebusi ampa Girgasi. Anjaha ipasaud Ham do bagah-bagah-Mu, ai na bonar do Ham.
9Anjaha itatap Ham do hasombuhon ni ompungnami i Masir, anjaha itangihon Ham do doruh-doruh ni sidea i laut Sigerger.
10Anjaha ipamasa Ham do tanda ampa halongangan mangimbang Parao, pakon haganup juakjuakni ampa haganup bangsa isi ni tanohni, ai ibotoh Ham do jungkatni dompak sidea. Sonai ma gabe tarambilan goran-Mu ibahen Ham, songon na talar ronsi sadari on.
11Tolah do laut ai ibahen Ham i lobei ni sidea, gabe mandipar sidea mardalan bani na horah i tongah-tongah ni laut ai; tapi halak na mardakdak sidea isampakkon Ham do hubagas luhung, songon sada batu hubagas bah marbanggal.
12Anjaha iarahkon Ham do sidea marhitei hombun na jongjong arian, anjaha marhitei apuy na jongjong borngin, laho manrigap dalan sidalanan ni sidea.
13Turun do Ham hu atas Dolog Sinai, anjaha marsahap pakon sidea hun nagori atas, anjaha ibere Ham do bani sidea uhum na sintong ampa titah na botul, aturan ampa parentah na dear.
14Ipabotohkon Ham do bani sidea ari Sabat-Mu na mapansing in, anjaha ibere Ham do bani sidea tonah, aturan ampa titah marhitei pamangan ni si Musa, juakjuak-Mu.
15Ibere Ham do bani sidea ruti hun nagori atas pasabou lohei ni sidea, anjaha iparoh Ham do bah humbani batu gingging pasombuh horah ni sidea. anjaha iparentahkon Ham do sidea masuk, laho manean tanoh in, na binulawankon-Mu, paboa berehonon-Mu do ai bani sidea.
16Tapi jungkat do pambahenan ni sidea, ompungnami ai, ipahengkeng sidea do uhurni, anjaha seng ibalosi sidea parentah-Mu.
17Mangengkar do sidea mambalosi, anjaha seng idingat sidea halongangan na binahen-Mu i tongah-tongah ni sidea, tapi ipahengkeng sidea do uhurni, anjaha ipabangkit sidea do sada pambobai, laho mulak hu parjabolonan ni sidea i Masir. Tapi Naibata sisasap dousa do Ham, paridop ni uhur anjaha pardear layak, nanget manringis anjaha parholong ni uhur banggal, anjaha seng itadingkon Ham sidea.”
18Age pe sanggah na binahen ni sidea bani sidea sada lombu tuangan, anjaha ihatahon sidea, on do Naibatamu, na mangarahkon ho mandarat hun Masir, anjaha age pe buei idalankon sidea pangapasion,
19tapi seng itadingkon Ham sidea i halimisan, halani idop ni Uhur-Mu na banggal in; hombun na jongjong, na mambobai sidea arian i tongah dalan, sonai homa apuy na jongjong borngin, na manrigap dalan sidalanan ni sidea ai, seng meret humbani sidea.
20Ibere Ham do Tonduy-Mu na dear in, laho mangajari sidea, anjaha seng isonto Ham manna-Mu humbani pamangan ni sidea, anjaha ibere Ham do bah pasombuh horah ni sidea.
21Pala do ompat puluh tahun iparmudu-mudu Ham sidea i halimisan, anjaha aha pe lang na hurang bani sidea; seng ra buruk hiou ni sidea, anjaha seng butong nahei ni sidea.
22Ibere Ham do bani sidea harajaon ampa bangsa, anjaha ibagi-bagi Ham do sidea hubani ganup suhi, ase isoluk sidea tanoh ni si Sihon, raja ni Hesbon, ampa tanoh ni si Og, raja ni Basan.
23Anjaha ipabuei Ham do anak ni sidea, songon bintang na i langit, anjaha iboan Ham do sidea das hu tanoh, na dob binagahkon-Mu hinan in hubani ompung ni sidea, paboa maningon masukan anjaha teanon ni sidea do in.
24Imasuki anak ni sidea ma in anjaha itean; anjaha ipatunduk Ham do i lobei ni sidea pangisi ni tanoh in, ai ma halak Kanaan, anjaha ipadas Ham do sidea hubagas tangan ni sidea, sonai homa raja ni sidea age bangsa-bangsa na i tanoh in, ase boi bahenon ni sidea mangihutkon rosuh ni sidea bani sidea.
25Ipatunduk sidea do huta na marbatar-batar ampa tanoh na napu, isoluk sidea do rumah na gok arta na marbagei-bagei, sonai homa parigi na hinurak, pohon anggur, pohon jetun ampa hayu na marbuah buei tumang; mangan ma sidea, bosur anjaha mombur, anjaha marmalas ni uhur sidea marhitei dear layak-Mu na buei in.
26Tapi lambin lepak do sidea marparlahou anjaha manggeori do dompak Ham; itundali sidea do titah-Mu, anjaha ibunuhi nabi-Mu, na palumbahon sidea, laho mangarahkon sidea mulak hu Bamu; buei do pangapasion ihorjahon sidea.
27Halani ai ipadas Ham do sidea hubagas tangan ni munsuh ni sidea, na manosak sidea; sanggah na tarsosak ai doruh-doruh do sidea Bamu, anjaha itangihon Ham do sidea hun nagori atas; anjaha romban hubani idop ni uhur-Mu na buei in, ibere Ham do bani sidea halak sipaluah, na paluahkon sidea hun tangan ni munsuh ni sidea.
28Tapi dob sonang sidea, iulaki sidea do use mangkorjahon sogam ni uhur-Mu, gabe ipadas Ham do sidea hubagas kuasa ni munsuh ni sidea, gabe irajai ma sidea; tapi anggo mulak use uhur ni sidea anjaha doruh-doruh sidea Bamu, itangihon Ham do use sidea hun nagori atas, anjaha gati do ipaluah Ham sidea, romban hubani idop ni uhur-Mu na buei in.
29Ipalumba Ham do sidea, laho paulakkon sidea hubani titah-Mu. Tapi lambin lepak do sidea marparlahou anjaha seng itangihon sidea titah-Mu, anjaha inunut sidea do mardousa dompak titah-Mu, na maningon horjahonon ni sada halak namin, ase boi ia manggoluh; hape manggeori do sidea, ipahengkeng uhurni anjaha seng ra sidea manangihon.
30Dokah do ianju-anju Ham sidea, anjaha ipalumba Ham do sidea marhitei Tonduy-Mu, marhitei nabi-Mu, tapi seng ra sidea manangihon. Halani ai do ase iondoskon Ham sidea hubagas tangan ni bangsa, na i tanoh ni halak sipajuh begu-begu.
31Halani idop ni uhur-Mu na buei in, seng lanjar bois sidea ibahen Ham, anjaha seng itadingkon Ham sidea, ai Naibata paridop ni uhur anjaha pardear layak do Ham.
32Ai pe, ale Naibatanami, Naibata na timbul, na gogoh anjaha na majombut na tongtong mardingat padan ampa idop ni uhur, Ulang ma mapas uhur-Mu mangidah ganup hasombuhon, hubani ompungnami ampa hubani ganup bangsa-Mu olat ni panorang ni Raja Assur ronsi sadari on.
33Tapi tongon bonar do Ham pasal haganup na mangonai bennami; ai sintong do pambahenan-Mu, age pe jahat pambahenannami.
34Rajanami, pambobainami, malimnami ampa ompungnami seng ihorjahon sidea titah-Mu, anjaha seng iparimbagaskon sidea parentah-Mu ampa lumba-lumba-Mu, na dob binerehon-Mu bani sidea.
35Seng ibalosi sidea Ham ibagas harajaon ni sidea, age pe buei dear ni layak-Mu, na binere-Mu bani sidea, age pe lumbang anjaha lambut tanoh, na binerehon-Mu ai bani sidea, anjaha seng ipaubah sidea uhur ni sidea humbani horja ni sidea na sambor ai.
36Tonggor ma, jabolon do hanami nuan ibagas tanoh, na binere-Mu hubani ompungnami, ase panganonni namin buahni ampa gogohni; tonggor ma, jabolon do hanami.
37Anjaha gogoh ni tanoh na buei ai, laho do ai bani raja, na pinabangkit-Mu manggomgom hanami halani dousanami, sidea do homa na markuasa bani angkulanami ampa pinahannami, domu hubani rosuh ni sidea, anjaha sosak tumang do hanami.”
38(10-1) Maronjolan hubani ganupan ai mambahen padan na totap ma hanami, anjaha isuratkon hanami do ai anjaha maneken do pambobainami, halak Levi ampa malimnami.