Alkitab Mobile SABDA
[VER] : [SIMALUNGUN]     [PL]  [PB] 
 <<  Roma 2 >> 

Halak Jahudi pe Pardousa do

1Halani ai seng tarapiti ho dirimu, ale jolma sipanguhum, atap ise pe ho. Ai marhitei na manguhum halak na legan, iuhum ho do dirimu sandiri, ai na sonai do homa idalankon ho, ale sipanguhum!

2Ai ibotoh hita, domu hubani hasintongan do mangonai uhum ni Naibata hubani na mangkorjahon na sonai ai.

3Ai iagan ho, ale jolma, tarsimbili ho uhum ni Naibata, anggo iuhum-uhumi ho na mangkorjahon na sonai, hape dihut do ho mambahensi?

4Atap na mapas do uhurmu bani dear ni layak-Ni na buei in, bani panganjuon-Ni age lumbang ni uhur-Ni? Seng ibotoh ho, dear layak ni Naibata sihol manogu ho bani hamubahon ni uhur?

5Tapi halani hengkeng ni uhurmu ampa uhurmu na so ra mubah in, ipajunjun ho do bam ringis bani ari parsogop ni ringis ai ampa partalar ni uhum ni Naibata na pintor ai,

6na mambalaskon bani ganup domu hubani horjani bei:

7Ai ma hagoluhan na sadokah ni dokahni bani halak na golgol mangkorjahon na madear, anjaha na mangindahi hasangapon, hamuliaon ampa na manongtong ai,

8tapi ringis ampa gila do bani halak sipanlawan anjaha na so ra mambalosi hasintongan in, ai ma sipambalosi bani hagedukon.

9Hamarsikon ampa biar do sogop bani uhur ni sagala jolma, na mangkorjahon hajahaton, bani halak Jahudi parlobei, sonai homa bani halak Gorik.

10Tapi hasangapon, hamuliaon ampa damei do bani sagala na mangkorjahon na madear, halak Jahudi parlobei, sonai homa halak Gorik.

11Ai seng sididah rupa Naibata.

Seng Marhasurungan Jahudi Halani Titah Tumang

12Ai sagala sipardousa, na so martitah, magou do homa lang martitah; anjaha sagala na mardousa, sipartitah, uhumon ni titah do.

13Ai seng na mambogei titah in pintor i lobei ni Naibata, tapi na mangkorjahon titah in do pintoranni.

14Ai sipajuh begu-begu pe, na so martitah in, ihorjahon do humbani biakni na pinindo ni titah in; ase sidea sandiri ma gabe titah bani sidea na so martitah in.

15Hunjai ma taridah, paboa na dob tarsurat do na pinindo ni titah in ibagas uhur ni sidea. Anjaha panggora ni uhur ni sidea pe dihut do manaksihon, anjaha pingkiran ni sidea marsiaduan atap marsiapitan,

16ai ma bani ari, roh konsi Naibata manguhumi sagala na ponop bani jolma in marhitei Kristus Jesus, domu hubani na huambilankon in.

17Igoran ho do dirimu Jahudi, marhatengeran do ho bani titah in, anjaha Naibata ipangunsagahkon ho.

18Ibotoh ho do rosuh-Ni, anjaha ibotoh ho do manimbangi na malo ampa na so malo, niajaran ni titah in.

19Talup do ho, ninuhurmu pambobai na mapitung, panondang bani halak na ibagas hagolapan,

20pamodahi bani na hurang uhur, sipangajari bani na etek, ai dong do bam habotohon ampa hasintongan pasal titah in.

21Hape halak na legan ipodahi ho, tapi dirimu sandiri lang ipodahi ho. Ho do mangkatahon, “Seng bulih manangko.”

22Ihatahon ho, “Ulang marbangkis,” hape ho do marbangkis. Magigi do ho bani gana-gana, hape panrampok do ho i rumah panumbahan.

23Ipangunsagahkon ho do titah in, tapi ipahiri ho do Naibata marhitei panlanggaronmu bani titah in.

24Songon na tarsurat in, “Mahiri do goran ni Naibata i tongah-tongah ni sipajuh begu-begu halani nasiam.”

Seng Marhasurungan Jahudi Halani Parsunaton Tumang

25Marguna do parsunaton in anggo idalankon ho titah in. Tapi anggo panlanggar do ho bani titah in, gabe seng marguna be parsunaton in bam.

26Ase anggo idalankon na so tarsunat in pinindo ni titah in, ai lang hiraon ma ia, na so tarsunat ai, songon na tarsunat?

27Ai lang na so marsunat ai ma, anggo idalankon titah in, na manguhumi ho, simada hata ampa parsunaton in, anggo ilanggar ho titah in?

28Ai sedo pardarat ai Jahudi na sintong, anjaha sedo bani daging ai parsunaton na tongon.

29Tapi Jahudi na sintong, ai ma Jahudi parbagas ai, anjaha parsunaton na botul, ai ma na ibagas uhur ai, marhitei Tonduy sedo marhitei surat ni titah. Sisonai ma dapotan puji-pujian, sedo humbani jolma, tapi humbani Naibata do.


  Share Facebook  |  Share Twitter

 <<  Roma 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel