Dual PanelGolpa-golpa ase Pambalosi bani Pamarentah anjaha Parlamlam bani Haganup
1Paingat ma sidea ase unduk anjaha pambalosi bani pamarentah ampa siparkuasa, janah sirsir bani sagala horja na madear,
2ulang sipanrisai atap bani ise pe, ulang siparingor, basar anjaha lamlam bani haganup halak.
3Ai dihut do hita hinan halak na oto, seng sipambalosi, na kahou, pinarjabolon ni bagei ni hisap-hisap ampa rosuh-rosuh, ibagas hajahaton ampa subil, jolma hagigi do hita anjaha na marsidomdoman.
Pasu-pasu Hinorhon ni Pandidion
4Tapi talarhonsi halayakon ampa holong ni uhur ni Naibata, Sipaluah hita,
5ipaluah do hita, sedo halani horja hapintoron na binahenta, tapi halani idop ni uhur-Ni do, marhitei pandidion pangulakion tubuh ampa habayuon marhitei Tonduy Na Pansing,
6na dob niuseihon-Ni banta unjah, marhitei Jesus Kristus, Sipaluah hita,
7ase gabe pintor hita halani idop ni uhur-Ni, anjaha gabe sitean hagoluhan na sadokah ni dokahni, domu hubani pangarapan in.
8Hatengeran ni uhur do hata in, anjaha ipindo uhurhu, ase gomos ma panaksihonmu bani hata in, ase sidea na dob porsaya bani Naibata, ra mangkaringgaskon horja na madear; in ma na madear anjaha na marguna bani jolma.
Manlembangi Parsual-sualon; Manulak Parpodah na Kahou
9Tapi lembangi ma sual-sual haotoon ampa pasal tarombo-tarombo, parsalisihan ampa paringoran pasal titah in, ai seng marguna in anjaha sisoya-soya do.
10Siparpodah na kahou, dob ipaingat ham ia sahali dua hali, tulak ma ia,
11ai ibotoh ham do, na dob marbalik do halak sisonai anjaha mardousa, anjaha ia sandiri mamapaisi.
Golpa-golpa Parpudi
12Ia dob husuruh si Artemas ampa si Tikikus bamu, papodas ma roh manjumpahkon ahu hu Nikopolis, ai ijai do ahu sihol soh sanggah musim borgoh.
13Si Semas, sibotoh titah in, ampa si Apollos, porluhon ma pabingkatkon sidea, ase ulang hurangan sidea atap bani aha pe.
14Hasomanta pe iguruhon ma mampongkutkon horja na madear, laho mansarihon na porlu pakeion, ase ulang lang marbuah sidea.
15Manongos tabi do bamu haganup na rap pakon ahu. Padas tabinami bani na mangkaholongi hanami ibagas haporsayaon. Idop ni uhur ma mangkasomani nasiam haganup!