Dual PanelIpaingat si Musa Bangsa ai Mangkorjahon Titah ni Jahowa
1Sonari pe, alo Israel, sai tangihon ma aturan pakon uhum, sagala na hupodahkon in bani nasiam, anjaha horjahon nasiam ma in, ase manggoluh nasiam anjaha masuk nasiam hu tanoh siteanon nasiam in, na binere ni Jahowa, Naibata ni ompung nasiam hubani nasiam.
2Seng bulih tambahan nasiam hubani hata na dob hutonahkon in bani nasiam, anjaha seng bulih oruan nasiam hunjin, maningon ramotkonon nasiam do tonah ni Jahowa, Naibata nasiam in, na dob hutonahkon bani nasiam.
3Mata nasiam do mangidah na binahen ni Jahowa hu Baal-Peor; iraseihon Jahowa, Naibata nasiam in do sagala halak, na mangirikkon Baal-Peor,
4tapi nasiam, na marsijoloman hubani Jahowa, Naibata nasiam manggoluh do haganup sadari on.
5Tonggor ma, domma hupodahkon bani nasiam sagala aturan pakon uhum, songon na tinonahkon ni Jahowa, Naibatangku hu bangku, ase bahenon nasiam sonai i tanoh simasukan nasiam ai bahen parbagianan nasiam.
6Antong ramotkon anjaha horjahon nasiam ma in, ai in do hapentaran pakon hapantason nasiam i lobei ni sagala bangsa, ase ia dob ibogei sidea ganup aturan on, gabe ihatahon sidea, “Tongon do, bangsa na pentar anjaha na pantas maruhur do bangsa na bolon on.”
7Ai bangsa na bolon na ija ma na sonin dohor ni naibatani bani, songon Jahowa, Naibatanta in banta, atap sadihari pe idilo hita Ia?
8Ai bani bangsa na bolon ja ma adong aturan pakon uhum na pintor, songon ganup titah on, na hubere i lobei nasiam sadari on?
9Antong jaga ma dirimu anjaha hargahon ma tonduymu, ase ulang lupa ham bani sagala na dob nididah ni matamu, anjaha ase ulang hallus humbani uhurmu sadokah ham manggoluh, anjaha maningon pabotohkononmu do in hubani anakmu pakon pahompumu,
10naha bani ari parjongjongan i lobei ni Jahowa, Naibatamu, i Horeb, ihatahon Jahowa hu bangku, “Patumpu ma bangsa in Bangku, ase Hupabogeihon bani sidea hatang-Ku, ase iguruhon sidea marhabiaran hu Bangku sadokah manggoluh sidea i tanoh on, anjaha iajarhon sidea sonai hubani anak ni sidea.”
11Jadi roh ma nasiam hun dohor anjaha jongjong i bona ni dolog ai, anjaha marjimbur-jimbur do apuy i dolog ai das hu parsitongahan ni langit, masa hombun na manorap pakon golap na marimpot-impot.
12Dob ai roh ma hata ni Jahowa hubani nasiam hun tongah-tongah ni apuy ai; ibogei nasiam do namin anggo sora ni hata ai, tapi seng dong ididah nasiam anggo rupa, pitah sora ai do.
13Dob ai ibaritahon ma hubani nasiam padan binahen-Ni ai, na dob tinonahkon-Ni hubani nasiam bahen sihorjahonon nasiam, ai ma titah na sapuluh in, lanjar isuratkon do in bani dua batu panuratan.
14Anjaha iparentahkon Jahowa do hu bangku ijia, mangajarhon hubani nasiam aturan pakon titah, sihorjahonon nasiam i tanoh sidiparan nasiam ai bahen parbagianan nasiam.
15Antong pangkei tumang ma jaga nasiam uhur nasiam. Halani na so adong ididah nasiam rupa bani ari ai, sanggah marsahap Jahowa hubani nasiam i Dolog Horeb hun tongah-tongah ni apuy ai,
16jaga nasiam ma, ase ulang iagou nasiam diri nasiam marhitei na mambahen bani nasiam gana-gana na niuhir, sipauman ni dalahi atap naboru,
17sipauman ni sagala pinahan na i tanoh on, sipauman ni sagala manuk-manuk na marhabong, na habang i toruh ni langit,
18sipauman ni sagala na manjulur i atas tanoh, sipauman ni sagala dengke, na ibagas bah, na i toruh ni tanoh.
19Anjaha seng bulih mangkawah matamu dompak langit patonggor-tonggor mata ni ari, bulan pakon bintang ronsi ganup bala ni langit, gabe ipadari-dari ham marsombah hujai laho mambalosisi, ai ma na dob tinaktakkon ni Jahowa Naibatamu bahen rupei ni haganup bangsa, na i toruh ni langit.
20Tapi Jahowa do mambuat anjaha mangarahkon nasiam luar hun liang bosi, hun Masir, ase nasiam gabe bangsa parbagianan-Ni, songon na talar sadari on.
21Tapi na manringis tumang do Jahowa mangidah ahu halani hata-hata nasiam, pala marbija Ia, na so bulih diparanku Jordan, anjaha na so bulih masukanku tanoh na dear in, ai ma na sihol bereon ni Jahowa Naibatamu hu bamu bahen parbagiananmu.
22Maningon matei ahu tene i nagori on, seng bulih ahu mandipari Jordan, tapi anggo nasiam maningon diparan nasiam do in anjaha solukon nasiam tanoh na dear ai.
23Antong pangkei ma ramotkon nasiam diri nasiam, ase ulang ihalupahon nasiam padan, na binahen ni Jahowa, Naibata nasiam in bani nasiam, anjaha ibahen nasiam gana-gana, sipauman ni barang aha pe, songon na pinandang ni Jahowa, Naibatamu ham.
24Ai apuy na mangankon do Jahowa, Naibata parsimburu.
25Anggo tubuhan anak anjaha marpahompu nasiam, anjaha matua nasiam i tanoh ai, hape maruhur magou nasiam marhitei na mambahen gana-gana sipauman ni barang aha, anjaha ihorjahon nasiam sogam ni uhur ni Jahowa, Naibatamu, laho parroh ringis-Ni,
26diloonku ma sadarion langit pakon tanoh gabe saksi mangimbang nasiam, ase podas tumang nasiam magou hun tanoh, na sihol solukon nasiam nuan bahen parbagiananmu, dob idipari nasiam Jordan in; seng tumaram sadiha dokah nasiam marianan ijai, ai maningon siap tumang do nasiam.
27Jadi marserak ma nasiam i tongah-tongah ni sagala bangsa bahenon ni Jahowa, gabe otik mando bilangan ni jolma tading humbani nasiam i tongah-tongah ni bangsa sipajuh begu-begu, atap huja nasiam sihol usiron ni Jahowa.
28Jadi balosan nasiam ma ijai naibata na legan, na pinauli ni tangan ni jolma, hayu pakon batu, na so marpangidah, barang marpambogei, barang mangan, barang marpanganggoh pe.
29Tapi maningon pindahanmu do ijai Jahowa, Naibatamu, anjaha jumpah ham do Ia, anggo ipindahi ham Ia humbani ganup uhurmu pakon ganup tonduymu.
30Anggo tarsosak ham anjaha manginsonoh bamu ganup pahara on bani panorang na roh, mulak ma ham bani Jahowa, Naibatamu, anjaha tangihon ma sora-Ni,
31ai Naibata paridop ni uhur do Jahowa, Naibatamu, seng anjai tadingkonon-Ni ham, atap agouon-Ni ham, atap halupahonon-Ni padan na binahen-Ni hubani ompungmu, na dob binulawankon-Ni hubani sidea.
32Mahua sungkun ma ari na basaia, ai ma na parlobei hun bamu, singgan ni ari dob itompa Naibata jolma i atas tanoh on, humbani ujung ni langit na sada hu ujung na sada nari, barang ongga do masa pahara na sonon banggalni, barang ongga tarbogei na sonai.
33Ongga do sada bangsa mambogei sora ni Naibata marsahap hun tongah-tongah ni apuy, songon na dob binogei nasiam, hape tong ope manggoluh?
34Barang ongga do isuba sada naibata roh laho mambuat bani sada bangsa hun tongah-tongah ni bangsa na legan, marhitei parlajouan marhitei tanda, marhitei halongangan pakon marhitei parporangan, marhitei tanda na gogoh pakon botohon na toltol, ampa marhitei hajanginon bolon romban hubani haganup, na binahen ni Jahowa, Naibata nasiam in hubani nasiam i Masir i lobei ni mata nasiam?
35Ipatuduhkon do bani nasiam, ase ibotoh nasiam, Jahowa do Naibata; seng dong na legan sobali-Si.
36Ipabogeihon do sora-Ni bamu hun nagori atas, sihol palumbahon ham; anjaha ipataridahkon do bamu apuy-Ni na banggal in i tanoh on, anjaha hata-Ni pe domma ibogei ham hun tongah-tongah ni apuy.
37Halani na dob hinaholongan-Ni ai ompungmu anjaha pinilih-Ni ai ginomparni i pudi ni sidea, anjaha binobahon-Ni ai ham luar hun Masir marhitei Ia sandiri, marhitei gogoh-Ni na banggal in,
38laho mangusir bangsa sibolonan anjaha sigogohan hun bamu i lobeimu, laho pamasukkon ham hujai, laho mamberehon tanoh ni sidea ai hu bamu, songon na talar masa sadari on.
39Halani ai maningon botohonmu sadari on, anjaha pangkei parimbagaskononmu, paboa Jahowa do Naibata i langit na i babou pakon i tanoh na i toruh on; seng dong na legan.
40Halani ai maningon ramotkononmu do sagala aturan-Ni pakon tonah-Ni, ai ma na hutonahkon in bamu sadari on, ase marhasonangan ham pakon anakmu i pudimu, anjaha ase dokah ham manggoluh i tanoh, na binere ni Jahowa Naibatamu bamu, sadokah manggoluh ham.
Huta Haporusan na i Dipar ni Jordan
41Dob ai ipapulig si Musa ma tolu huta i dipar ni Jordan hampit hapoltakan,
42ase tarbahen maporus hujai halak sibunuh jolma, na mamunuh hasomanni na so niutuskonni, anjaha seng sogam uhurni bani hinan, ase marhitei na maporus ia hubani sada humbani huta ai manggoluh hosahni:
43ai ma, Beser i halimisan, i tanoh hanopan, bani halak Ruben, Ramot i Gilead, bani halak Gad, pakon Golan i Basan, bani halak Manase.
Parlobei ni Panratahion bani Titah
44On ma titah, na dob niaturhon ni si Musa i lobei ni halak Israel.
45On ma hasaksian pakon aturan pakon uhum, na hinatahon ni si Musa hubani halak Israel, dob luar sidea hun Masir,
46i dipar ni Jordan, i pamah tontang ni Bet-Peor, i tanoh ni si Sihon, raja ni halak Amori, na marianan i Hesbon, na dob tinaluhon ni si Musa pakon halak Israel, sanggah na luar sidea hun Masir.
47Lanjar isoluk sidea ma tanohni pakon tanoh ni si Og, raja hun Basan, haduasi raja ni halak Amori, na i dipar ni Jordan hampit hapoltakan,
48singgan ni Aroer, na itopi ni Bah Arnon, das hu Dolog Sirion, ai ma Hermon,
49pakon haganup pamah na i dipar ni Jordan, hampit hapoltakan das hu laut na i pamah ai, i bona ni Dolog Pisga.