Alkitab Mobile SABDA
[VER] : [SIMALUNGUN]     [PL]  [PB] 
 <<  Yakobus 3 >> 

Dousa ni Dilah

1Nasiam sanina, ulang ma buei nasiam na ra gabe guru, ai ibotoh hita, uhum na lobih borat do jaloonta.

2Ai ganup hita gati marsalah; anggo adong na so marsalah bani sahap, ai ma halak na gokan dear, na boi manrantei haganup angkulani.

3Anggo ibahen hita rantei bani babah ni huda, ase ibalosi hita, gabe marguru hu banta do ganup badanni ai.

4Tonggor ma, age kapal ai, na sonai banggalni, anjaha nionjar-onjar ni logou na gogoh, ipatontang-tontang do marhitei amudi na etek tumang, atap dompak ja uhur ni pangamudi ai.

5Sonai do homa dilah in, pagori na etek do in, tapi buei do sahap-sahapni. Tonggor ma, etek pe apuy, boi do mosog ibahen harangan na bolag.

6Apuy do age dilah in. Dunia na gok hagedukon do dilah in i tongah-tongah ni pagorinta, ipabutak do haganup dagingta anjaha ipagajag panggulmiton ni goluhta, marhitei apuy na roh hun naraka.

7Ia sagala bagei ni binatang, manuk-manuk, ulog ampa dengke tarpalomuk do, anjaha domma lomuk ibahen jolma,

8tapi seng tarpalomuk age sada jolma pe anggo dilah in, panjahati na so ra soh do in, gok bisa hamatean.

9Marhitei in do hita mamuji Tuhanta, Bapa in; lanjar in do ipakei hita mamurai jolma, na tinompa domu hubani rupa ni Naibata.

10Hun bani sada pamangan kaluar pasu-pasu ampa papa-papa. Nasiam sanina, ulang ma sonai!

11Mintor adong ma sada bah tubuh, na marjullak-jullakkon na matobu ampa na mapaet?

12Nasiam sanina, mintor tarbuahkon hayu ara ma buah ni hayu jetun, atap hayu anggur marbuahkon buah ni hayu ara? Sonai do homa, seng tarjullak-jullakkon bah tubuh na porad bah na matobu.

13Ise humbani nasiam na maruhur anjaha na pentar? Ipatuduhkon ma horjani marhitei parlahouni na madear, ibagas halamlamon ni hapentaran.

14Tapi anggo ijolom-jolom nasiam ibagas uhur nasiam parsimburuon na mapaet ampa paringoran, ulang ma puji nasiam diri nasiam anjaha marladung nasiam dompak hasintongan.

15Sedo in hauhuron na roh hun datas, na hun tanoh on do in, humbani uhur ni jolma, humbani sibolis.

16Ai ijin adong parsimburuon ampa paringoran, ijai ma adong hageoron ampa haganup bagei ni horja hajahaton.

17Tapi ia hauhuron na hun babou ai sabonar borsih do ai, ambah ni ai ra mardamei, lamlam, pambalosi, gok idop ni uhur ampa buah-buah ni hadearon, seng singapit-apit ampa lang marsipahulah-hulah.

18Anjaha buah ni hapintoron ibagas damei do ai isaburhon bani halak na mangkorjahon hadameion.


  Share Facebook  |  Share Twitter

 <<  Yakobus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel