Dual PanelHasamboron ni Jerusalem ampa Pangisini Parohkon Uhum Bani
1Dob ai roh ma hata ni Jahowa hu bangku, mangkatahon,
2“Ale anak ni jolma, sihol uhumonmu do huta siduruskon daroh in? Pabotohkon ma bani sidea haganup hasamboron ni sidea ai,
3anjaha hatahon ma: Sonon do hata ni Tuhan Jahowa: Ale huta siduruskon daroh i tongah-tongahni, na parohkon ajal bani, anjaha na paulihon gana-gana bani, mambahen butak dirini!
4Marhitei daroh na niduruskonmai, gabe marutang do ho, anjaha marhitei gana-gana na pinaulimai, gabe butak ho; ipapodas ho do ajalmu, anjaha iparoh ho do ujung ni ari-arimu. Halani ai Hubahen do ho siapason bani bangsa-bangsa, anjaha sipahirion bani ganup nagori.
5Halak na dohor age na daoh pahirihon do, ale parbarita na masambor, na gok hageoron.
6Tonggor ma, haganup kopala-kopala ni Israel, na marianan ibagas ho, ganup sidea mangunsagahkon kuasa laho manduruskon daroh.
7Bapa pakon inang hona apasan do ibagas ho, halak panginsolat hona hilang i tongah-tongahmu; na tading maetek ampa na mabalu hona odoh-odoh do.
8Mahiri do ibahen ho ianan-Ku na mapansing in, anjaha ibutaki ho do ari Sabat-Ku.
9Dong do halak sipanukas-nukas ibagas ho laho manduruskon daroh, anjaha adong do halak na mangankon na ginalangkon i atas buntu-buntu; habutakon do ihorjahon halak i tongah-tongahmu.
10Ipatidak sidea do hatalanjangon ni bapa ibagas ho, anjaha ibutaki do naboru bani panorang parroh ni pantang ni hiouni.
11Habutakon do idalankon halak bani jolma ni hasomanni; dong do na mambutaki parumaenni, dong homa na mambutaki botouni, boru ni bapani.
12Padalan sisip do halak ibagas ho laho manduruskon daroh; paanakkon duit do ho anjaha mambuat untung na malobihtu; mambuat pansarian do ho humbani hasomanmu marhitei pangilangan; ihalupahon ho do Ahu, nini Tuhan Jahowa.
13Tonggor ma, durdurhonon-Ku do tangan-Ku bani untungmu na so tiba dalanni in, ampa halani daroh na madurus i tongah-tongahmu.
14Ai tahan do ho anjaha margogoh do tanganmu bani ari siparohon-Ku bam? Ahu do Jahowa na manluarhon ai anjaha na pasaudkon ai.
15Erapon-Ku do ho i tongah-tongah ni bangsa-bangsa anjaha bahenon-Ku do ho mambur merap bani nagori-nagori; bois do bahenon-Ku habutakon na bam ai,
16anjaha sipapaan do ho i lobei ni bangsa parbegu, ase itandai ho, Ahu do Jahowa.
Limbaga Pasal Panlalaan na Mangkorhon Uhum, na Mangonai bani Israel
17Dob ai roh ma hata ni Jahowa hu bangku, mangkatahon,
18Ale anak ni jolma, gabe tasik-tasik do bangsa Israel bangku; haganup do sidea songon tombaga, timah, bosi ampa timah sibirong ibagas panlalaan; tongon, mubah do sidea gabe tasik-tasik.
19Halani ai sonon do hata ni Jahowa: Halani ganup hanima mubah gabe tasik-tasik, tonggor ma, patumpuon-Ku do hanima hu tongah-tongah ni Jerusalem.
20Songon halak na patumpu pirak, tombaga, bosi, timah ampa timah sibirong hubagas panlalaan, anjaha ipagara apuy i toruhni laho manlala, sonai do patumpuon-Ku hanima ibagas ringis-Ku ampa gara ni gilang-Ku, anjaha hunahkon do hanima hubagas, laho manlala hanima.
21Tongon, patumpuon-Ku do hanima anjaha pagaraon-Ku do apuy ni ringis-Ku bannima, anjaha malala ma hanima i tongah-tongahni.
22Songon pirak malala ibagas panlalaan, sonai do malala hanima ibagas ai, jadi botohonnima ma, Ahu do Jahowa, na manduruskon ringis-Ku bannima.
Dousa ni Golongan-golongan na bani Bangsa ai
23Dob ai roh ma hata ni Jahowa hu bangku, mangkatahon,
24Ale anak ni jolma, hatahon ma bani sidea: Ho do sada tanoh na so marudan, na so marbah bani panorang ringis;
25songon singa na maraum, manoroh sisorohonni do raja-rajani i tongah-tongahni; ibolur sidea do jolma, irampas sidea arta ampa ugas-ugas na maharga, ipabuei sidea do bilangan ni na mabalu i tanoh in.
26Iparseda malimni do titah-Ku, anjaha ipabutak do ianan-Ku na mapansing in; seng marbolat ibahen sidea na mapansing humbani na mabutak, seng iajarhon parleganan ni na susi pakon na so susi; seng parduli sidea bani ari Sabat-Ku, gabe mabutak do Ahu i tongah-tongah ni sidea.
27Kopala-kopala i tongah-tongah ni sidea, songon sorigala na manoroh do, laho manduruskon daroh, mangagou goluh ni jolma, laho mambuat pansarian.
28Anjaha nabi ni sidea mangkapuri hajahaton ni sidea marhitei panonggoran na lepak ampa panjahaion ladung, mangkatahon bani sidea: Sonon do hata ni Tuhan Jahowa! hape sedo Jahowa tongon na mangkatahon.
29Bangsa parnagori in mandalankon odoh-odoh anjaha manrampasi, iodoh-odoh sidea do halak na madoyuk ampa na miskin, anjaha ipaksa do halak panginsolat marlawanan bani uhum.
30Hupindahi do halak i tongah-tongah ni sidea, na boi pajongjong tembok atap jongjong bani na maruntas i lobeihu, laho mangkopkop tanoh in, ase ulang huparseda, tapi seng dong jumpah Ahu.
31Halani ai Huuseihon do ringis-Ku bani sidea, anjaha Huboiskon do sidea ibagas gara ni gilang-Ku, mangonai hubani ulu ni sidea do Hubahen parlahou ni sidea ai, nini Tuhan Jahowa.”