Dual Panel1Dob ai ihatahon ma hu bangku, “Ale anak ni jolma, pangan ma na dapot ho in; pangan ma surat gulungan in, anjaha laho ma ho, marsahap ma ho bani halak Israel.”
2Jadi hupatanggak ma babahku, gabe ibere ma hu bangku surat gulungan ai ase hupangan.
3Ihatahon ma hu bangku, “Ale anak ni jolma, bondut ma gulungan on na Hubere bam, anjaha bosuri ma boltokmu bani in.” Jadi hupangan ma ai, matobu do ai ibagas pamanganku songon manisan.
4Dob ai nini ma hu bangku, “Ale anak ni jolma, laho ma ho marayak halak Israel, anjaha hatahon ma bani sidea hatang-Kin.
5Ai sedo hubani bangsa parhata na legan atap parhata na so niarusan ho Husuruh, tapi hubani bangsa Israel do,
6sedo hubani buei bangsa-bangsa, parhata na legan, parsahap na so niarusan. Tongon, anggo bani sisonai ho Husuruh, ra do sidea manangihon ho.
7Tapi anggo halak Israel seng itangihon sidea ho, seng ra sidea manangihon Ahu; ai parbohi na mapir anjaha paruhur na hengkeng do halak Israel ganup.
8Tonggor ma, Hupamapir do bohimu songon bohi ni sidea anjaha Hupatenger do pardompakanmu songon pardompakan ni sidea.
9Songon batu intan, tengeran humbani batu loting, sonai do Hupatenger pardompakanmu; ulang ma ho mabiar anjaha ulang ho gobir mangidah sidea, ai bangsa sipanlawan do sidea.”
10Ambah ni ai nini ma dompak ahu, “Ale anak ni jolma, ganup hatang-Ku, na Huhatahon bam, parimbagaskon ma ai anjaha tangihon.
11Ase laho ma, parayak ma na tarbuang in, hasoman sabangsamin, anjaha hatahon ma bani sidea, patugah ma bani sidea: Sonon do hata ni Tuhan Jahowa, atap na ra pe sidea manangihon in atap lang.”
12Jadi iangkat Tonduy ai ma ahu, anjaha hubogei ma i pudingku sora ni lalou na bolon, ai ma sanggah na tarangkat ai hamuliaon ni Jahowa humbani iananni,
13ai ma sorani habongni sipargoluh ai sanggah na marsiogosan ampa sora ni galapang na i lambung ni sidea, na marsora songon lalou na bolon.
14Iangkat Tonduy ai ma ahu, iluahon ma, anjaha misir ma ahu ibagas uhur na mapaet marhasoman ringis; anjaha tangan ni Jahowa do odoh bangku,
15gabe das ma ahu bani halak na tarbuang ai i Tel-Abib, na i topi ni Bah Kebar. Ijai ma ahu hundul jonong i tongah-tongah ni sidea pitu ari dokahni.
Ipabangkit si Hesekiel Gabe Siparjaga Israel
16Dob salpu na pitu ari ai roh ma hata ni Jahowa hu bangku,
17“Ale anak ni jolma, Hupabangkit do ho gabe siparjaga bani bangsa Israel. Anggo itangar ho sada hata humbani pamangan-Ku, lumbahon ma ai bani sidea ibagas goran-Ku.
18Anggo Huhatahon bani halak parjahat, ʻManingon matei do ho!ʼ hape seng ipalumba ho ia, anjaha seng marsahap ho palumbahon halak parjahat ai bani parlahouni na masambor ai, andohar manggoluh ia, sai na matei do namin parjahat ai halani hajahatonni, tapi humbam do tungguon-Ku darohni.
19Tapi anggo ipalumba ho do parjahat ai, hape seng ra ia manadingkon hajahatonni atap parlahouni na masambor ai, sai na matei do ia halani hajahatonni, tapi maluah do anggo tonduymu.
20Anjaha anggo itadingkon halak parpintor hapintoronni anjaha ihorjahon hagedukon, gabe hunahkon batu partolsuan i lobeini, jadi matei ia, halani na so ipalumba ho ai ia, matei do ia halani dousani, anjaha seng be ingaton hapintoron na dob hinorjahonni; tapi darohni humbam do tungguon-Ku.
21Tapi anggo ipalumba ho parpintor in ase ulang mardousa, anjaha seng tongon mardousa ia, manggoluh ma ia tongon, halani na ra ia palumbaon; ho pe, ipaluah ho do tonduymu.”
22Dob ai roh ma ijai tangan ni Jahowa hu bangku, anjaha nini dompak ahu, “Jongjong ma, laho ma ho hu pamah ai, ijai pe Ahu marsahap pakon ho.”
23Jadi jongjong ma ahu anjaha laho ma ahu hu pamah ai; anjaha tonggor ma, jongjong do ijai hamuliaon ni Jahowa usih songon hamuliaon na huidah i topi ni Bah Kebar; jadi manrogop ma ahu.
24Jadi masuk ma Tonduy ai hu bangku, anjaha ipajongjong ma ahu bani naheihu: Marsahap ma Ia hu bangku, nini ma, “Laho ma, marhurung ma ho ibagas rumahmu!
25Anggo ho, ale anak ni jolma, tonggor ma, nahkonon-Ku ma bam tali, anjaha sangkuton ma ho marhitei ai, ase ulang ho boi mandarat masuk hu tongah-tongah ni sidea,
26anjaha longkot ma bahenon-Ku dilahmu bani langit-langit ni pamanganmu, ase longah ho, gabe seng boi be pinsangonmu sidea, ai bangsa sipanlawan do sidea.
27Tapi anggo marsahap Ahu use hu bam, buhaon-Ku ma pamanganmu anjaha hatahononmu ma hubani sidea: Sonon do hata ni Tuhan Jahowa, atap ise na ra manangihon, itangihon ma, atap ise na manjua manangihon, manjua ma, ai bangsa sipanlawan do sidea.”