Dual PanelBagah-bagah Pasal Padan na Baru
1“Bani panorang ai,” nini Jahowa, “Ahu ma gabe Naibata ni haganup marga ni Israel, anjaha sidea gabe bangsang-Ku.”
2Sonon do hata ni Jahowa, “Dapotan idop ni uhur do songon na i halimisan ijia bangsa ai, na maluah humbani podang; laho do Israel marayak parsarananni.”
3Taridah do Jahowa bani humbani na daoh. Nini, “Holong do uhur-Hu bam marhitei holong sisadokah ni dokahni; halani ai Hutogu-togu do ho marhitei idop ni uhur.
4Paulion-Ku do ho use, gabe torsa ma ho, ale boru Israel! Pajagaronmu do use dirimu marhitei arbap, anjaha luar manortor rap pakon na marmalas ni uhur.
5Tombeionmu do use pohon anggur bani dolog-dolog ni Samaria; lanjar sipanuan ai do na mangankon buahni.
6Tongon, na roh ma panorangni, dilo-dilo ma ijai halak parjaga i Dolog Efraim: Eta, laho ma hita tangkog hu Sion manjumpahkon Jahowa Naibatanta.”
7Ai sonon do hata ni Jahowa, “Gogoh ma hanima mandoding ibagas malas ni uhur bani si Jakob, anjaha marsurak ma mangolobkon pambobai ni bangsa-bangsa! Baritahon, puji anjaha hatahon hanima ma, ʻJahowa do na paluahkon bangsa-Ni, simasima ni Israel!
8Tonggor ma, boanon-Ku do sidea hun tanoh par utara, anjaha patumpuon-Ku do sidea humbani ujung ni tanoh on; rap pakon sidea dihut do na mapitung ampa na repat, naboru na boratan rumah ampa naboru na painumkon; hulanan na banggal do sidea na mulak ai hujon.
9Tangis-tangis do sidea roh, tapi marhasoman pangapohon Hutogu-togu do sidea; Huiring-iring do sidea hun lambung ni bah, bani dalan hanopan, ase ulang tartolsu sidea; ai Ahu do gabe bapa bani Israel, anjaha Efraim gabe anak-Ku sikahanan.
10Tangihon ma hata ni Jahowa, ale bangsa-bangsa, anjaha baritahon ma ai bani pulou-pulou na madaoh; hatahon ma, ʻIa, na dob mangerap Israel, Ia do na patumpuhonsi, anjaha ramotkonon-Ni do ia songon parmahan na manramotkon hulanan-Ni.ʼ
11Tongon, Jahowa, do na manobus Jakob, anjaha na paluahkonsi humbagas tangan ni halak sigogohan hun bani.
12Roh do sidea anjaha marolob-olob bani pakpak ni Dolog Sion, anjaha marmegah-megah sidea pasal dear layak ni Jahowa, pasal gandum, anggur ampa minak, pasal biribiri ampa lombu; songon pohon na marbah do goluh ni sidea, seng be marhahurangan sidea.
13Marmalas ni uhur do anak boru manontor-nontor, marmegah-megah garama ampa na matua. Paubahon-Ku do pusok uhur ni sidea gabe malas ni uhur, apohon-Ku do sidea, anjaha pamalason-Ku do uhur ni sidea gantih ni horu ni uhur ni sidea.
14Marlobih-lobihan do bahenon-Ku uhur ni malim-malim bani malas ni uhur, anjaha bosur bangsang-Ku bani pasu-pasung-Ku,” nini Jahowa.
15Sonon do hata ni Jahowa, “Tarbogei do i Rama sora ni doruh-doruh ampa tangis-tangis na parah; Itangisi si Rahel do niombahni, manjua do ia apohon, ai domma bois sidea.”
16Sonon do hata ni Jahowa, “Sip ma ho na tangis in, anjaha apusi ma iluhmin; ai adong do upah bani halojaonmu,” nini Jahowa, “Ai mulak do sidea hun tanoh ni munsuh.
17Adong do siarapkonon bani na i pudimu,” nini Jahowa, “Mulak do anakmu bani parbagianan ni sidea.
18Hubogei do Efraim tangis-tangis: Iajar Ham do ahu, songon anak lombu na so ongga hona ajar do ahu iajar Ham. Paubah Ham ma uhurhu, ase saud mubah, ai Ham do Jahowa, Naibatangku.
19Ai dob marbalik ahu, manosal do ahu; dob hutanda diringku, hutompuki do tontonku. Maila do ahu anjaha bador, halani huboan-boan hasamboron ni haposoonku.
20Ai anak kasihan do nani si Efraim Bangku? Anak haudungan ni uhur-Hu do ia nani? Ai age pe Huhata ia, sai Hudingat do ia, Siholan do uhur-Hu bani, tongon, marulak-ulakan do uhur-Hu mangidahsi,” nini Jahowa.
21“Pajongjong ma bam tanda sipatuduh dalan, bahen ma bam batu partanda. Kawah ma ho bani dalan na bolon, dalan, na dob binontasmai. Mulak ma, ale boru Israel, mulak ma ho hu Tamon.
22Sadia dokah nari ho maor-aor, ale boru siparbalik? Tongon, domma ijadihon Jahowa sada naboru i tanoh on; ai ma naboru mangondingi dalahi.
23Sonon do hata ni Jahowa Zebaot, Naibata ni Israel, ʻSai hatahonon ni halak ope hata on i tanoh Juda ampa ibagas huta-hutani, dob Hupasuang sidea use,ʼ nini, ʻJahowa ma na mamasu-masu ho, ale ianan hapintoron, ale dolog na ma pansing!ʼ
24Rap ma marianan ijai Juda ampa haganup huta-hutani, parjuma-juma ampa halak na marpindah-pindah mangirikkon pinahanni.
25Ai Ahu do mambahen sombuh tonduy na mandatei, anjaha Hupabosur do ganup tonduy na loheian.
26Dob ai tarpuho ma ahu anjaha mangkawah, mantin do na modom ai bangku.
27Tonggor ma, na roh ma panorangni,” nini Jahowa, “Tidahkonon-Ku ma bani ginompar ni Israel pakon bani ginompar ni Juda, jolma pakon pinahan.
28Jadi masa ma, songon Ahu na dob marjaga-jaga ai bani sidea, laho mangorbat anjaha marreongkon, laho manunggalingkon, parsedahon ampa mangagouhon, sonai do marjaga-jaga Ahu bani sidea, laho paulihon ampa manuan, nini Jahowa.
29Bani panorang ai lang be hatahonon ni halak, ʻBapa mangankon buah anggur na migar, hape ipon ni anakni ngiluan.ʼ
30Tapi ganup ma matei halani dousani sandiri; ganup jolma na mangankon buah anggur na migar, iponni sandiri ma na ngiluan.
31Tonggor ma, na roh ma panorangni,” nini Jahowa, “Bahenon-Ku ma padan na baru bani ginompar ni Israel pakon bani ginompar ni Juda;
32sedo songon padan na Hubahen bani ompung ni sidea, sanggah na Hutogu-togu sidea, laho mamboan sidea luar hun tanoh Masir, ai ma padan na niosei ni sidea ai, age pe Ahu tuan ni sidea, nini Jahowa.
33Tapi on do padan sibahenon-Ku bani ginompar ni Israel dob salpu panorang on,” nini Jahowa, “Nahkonon-Ku do titah-Ku hubagas atei-atei ni sidea, anjaha suratkonon-Ku do ai bani uhur ni sidea; gabe Naibata ni sidea do Ahu, anjaha sidea gabe bangsang-Ku.
34Lang be ajaran ni sada halak hasomanni atap sanina mangkatahon bani saninani, ʻTanda ma Jahowa!ʼ Ai haganup do sidea mananda Ahu, na etek age na banggal,” nini Jahowa. “Ai sasapon-Ku do hajahaton ni sidea, anjaha lang be ingat-ingaton-Ku dousa ni sidea.”
35Sonon do hata ni Jahowa, “Na mambere mata ni ari gabe panondang arian, anjaha na manotapkon bulan ampa bintang gabe panondang borngin, na manggunsang laut gabe marhasak gilumbangni, Jahowa Zebaot do goran-Ni,
36“Songon paraturan ai seng maronti hun lobei-Hu,” nini Jahowa, “Sonai do ginompar ni Israel seng anjai maronti songon sada bangsa i lobei-Hu sadokah ni dokahni.”
37Sonon do hata ni Jahowa, “Songon langit na i babou ai seng tarsibar, anjaha onjolan ni tanoh na i toruh ai seng tarpareksa, sonai do seng tarambukkon Ahu ginompar ni Israel, age pe sonai haganup na binahen ni sidea ai, nini Jahowa.
38Tonggor ma, roh ma panorangni,” nini Jahowa, “Paulion ma huta ai bani Jahowa humbani manara Hananel das hubani horbangan suhi-suhi ai.
39Torus do tali panibar ai, pintor hu Buntu-buntu Gareb, dob ai marlegot hu Goat.
40Haganup habungan bangkei ampa habungan abuan ai, ampa haganup ladang ai das hu Bah Kidron, das hubani suhi-suhi ni horbangan huda ai, hampit hapoltakan, papansingon do ai bani Jahowa; seng anjai parsedaon atap reongkononkon huta ai ronsi sadokah ni dokahni.”