Dual Panel1“Bani panorang ai,” nini Jahowa, “Hurakon ma humbagas tanoman holi-holi ni raja ampa na sangap-sangap ni Juda, holi-holi ni malim ampa nabi-nabi sonai homa holi-holi ni par Jerusalem,
2anjaha erapon do ai i lobei ni mata ni ari, bulan ampa bala na i langit, ai ma na hinaholongan ampa na nibalosan ni sidea, ai ma na niihutkon, na sinungkun ampa na sinombah ni sidea; seng be patumpuon ai atap tanomon, gabe napu mando ai i atas ni tanoh in.
3Tapi sagala halak na tading humbani sundut na jahat on, bani haganup ianan pambuangan-Ku bani sidea, rosuhan mando uhur ni sidea matei ase manggoluh,” nini Jahowa Zebaot.
Hapitungon ni Bangsa ai ampa Pambobaini
4Hatahon ma bani sidea, sonon do hata ni Jahowa, “Ai adong do halak na targompang, na so sihol jongjong use, atap halak na kahou, na so sihol mulak use?
5Mase ma bangsa na i Jeruslem on torus kahou, marsijoloman sidea bani sipaoto-oto anjaha manjua sidea mulak?
6Hupardiateihon anjaha Hutangihon: Seng sintong parsahap ni sidea; sahalak pe lang na manolsoli hajahatonni, mangkatahon, ʻAha do na hubahen on?ʼ Haganup do sidea marsitohu dalanni songon huda na marpojong laho hu parporangan.
7Gari sitanda ulog na i awang-awang, ibotoh do panorangni; kuhuy, hampilis ampa pamal ingat do bani musim parmulakni, tapi anggo bangsang-Ku seng ibotoh aturan ni Jahowa.
8Mase ma ihatahon hanima, ʻPentar do hanami, anjaha titah ni Jahowa do bennami.ʼ Tapi, tonggor ma, gabe ladung do ai ibahen sipanurat.
9Maningon do bador halak na pentar, maningon tarsonggot anjaha tartangkap do sidea, ai itulak sidea do hata ni Jahowa. Hapentaran aha ma na dong bani sidea ai?
10Halani ai berehonon-Ku do jolma ni sidea bani halak na legan, anjaha juma ni sidea bani halak na manaluhon sidea. Ai haganup sidea na etek ronsi na magodang, haganup do sidea impolan bani pansarian na so tiba dalanni; nabi pakon malim, haganup mangkorjahon panipuon.
11Hampung do panambari ni sidea bani naborit ni bangsang-Ku, nini, ʻDamei do, damei do!ʼ Hape seng dong damei.
12Patut do sidea maila, ai sihagigihononkon do ihorjahon sidea, seng be ibotoh sidea na maila, seng be ibotoh hailaon. Halani ai jurgang do sidea rap pakon na jurgang in, anjaha bani paroh-Ku marlulu bani sidea, maningon tompas do sidea, nini Jahowa.
13Anggo sihol marpariama Ahu humbani sidea,” nini Jahowa, “Seng jumpah buah bani hayu anggur, seng dong buah bani hayu ara, bulungni pe melus do; halani ai ondoskonon-Ku do sidea bani na marojati sidea.”
Hagobiron ni Bangsa ai; Horu ni Uhur ni Nabi ai
14“Mase ma sohsoh hita hundul-hundul? Martumpu ma, laho ma hita hu huta na pinatoguh ai, ase ijai hita bois; ai Jahowa Naibatanta do mangondoskon hita hu hamagouan, anjaha ipainumkon bah na marrasun banta, halani mardousa hita dompak Jahowa.
15Mangarap do hita bani hadameion, hape seng dong roh na madear; mangarap do hita bani hamalumon, hape songgot-songgot do roh.
16Hun Dan tarbogei do pangunsong ni huda ni sidea, halani pariha-iha ni huda panjangan ni sidea dugur do sab tanoh on. Roh do sidea mangankon tanoh in ampa ganup isini, huta ampa halak na marianan ijai.
17Ai tonggor ma, Ahu do marsuruh bannima ulog, ulog bisa, na so boi tabas-tabason, jadi pagutonni ma hanima,” nini Jahowa.
18“Seng hatambaran pusok ni uhur-Hu, borit do uhur-Hu ibagas.
19Tangar ma, doruh-doruh ni boru ni bangsang-Ku bani sab tanoh in, nini, ʻAi seng be nani i Sion Jahowa? Ai seng ijai be raja-Ni? Mase ma ipuhoi sidea ringis-Ku marhitei gana-gana uhiran ni sidea, ampa marhitei sisombahon na legan?ʼ
20Domma salpu pariama, salosei sisabion, tapi hita lanjar ope seng maluah.
21Maropuk do uhur-Hu ibagas halani ugah ni boru ni bangsang-Ku, marhoru do Ahu, anjaha rusak tumang.
22Seng be dong nani minak balsem i Gilead? Seng be dong panambari ijai? Mase ma nani lang ra malum naborit ni boru ni bangsang-Ku?”