Dual Panel1Bursik ma halak, na mambahen aturan na so pintor, ampa si panurat, na manuratkon odoh-odoh,
2laho papeletkon pahara ni halak na masombuh, anjaha manrampas hak ni halak na musil i tongah-tongah ni bangsang-Ku, ase naboru na mabalu gabe taban-taban bani sidea, anjaha halak na tading maetek gabe sirampokan ni sidea.
3Tapi aha ma na sihol bahenonnima bani ari pambalason ampa bani haba-haba na sihol roh humbani na daoh? Bani ise ma hanima maporus mangindo pangurupion? Ija do tadingkononnima habayakonnima?
4On do hansa: Unduk i tongah-tongah ni halak na tartaban, atap tibal i tongah-tongah ni halak na iraseihon. Sonai pe ganupan ai lape surut ringis-Ni, tongtong ope gostong tangan-Ni.
Uhum bani Assur halani Pangenjengonni
5Bursik ma Assur lonsing-lonsing ni ringis-Hu ampa simambu ni ringis-Ku.
6Bani bangsa parjahat do ia Husuruh, anjaha bani bangsa sigilaan-Ku do ia Huparentahkon, laho manrampas sirampason ampa manaban sitabanon, laho manrojatisi songon hubang i alaman.
7Tapi anggo ia seng sonai sura-surani, anjaha uhurni seng sonai tujuanni; tapi sihol marripaskon do uhurni, anjaha mamboiskon bangsa-bangsa, seng otik,
8ai nini do, “Ai lang raja do ganup gamot-gamotku?
9Ai lang songon na bani huta Karkemis do masa bani Kalno? Barang songon na bani Arpad masa bani Hamat? Barang songon na bani Samaria masa bani Damaskus?
10Songon pangonai ni tanganku bani harajaon na marsisombah-sombahon, na margana-gana sibueinan marimbang na i Jerusalem ampa na i Samaria,
11mintor lang ma bahenonku bani Jerusalem ampa bani gana-ganani songon na dob hubahen bani Samaria ampa bani gana-ganani.”
12Tapi dob isaloseihon Tuhan ganup horja-Ni i Dolog Sion ampa i Jerusalem, luluhonon-Ni ma pangenjengon ni Raja Assur ampa mapas ni pangkawahni.
13Ai nini do, “Marhitei hagogohon ni tanganku do hubahen ai anjaha marhitei hapentaranku, ai na pantas do ahu. Ahu do na mammasabkon parbalogan ni bangsa-bangsa anjaha hurampas arta-artani, anjaha songon puanglima hupaturun do sagala na marparatas.
14Jumpah tanganku do habayakon ni bangsa-bangsa songon asar ni manuk-manuk, anjaha songon halak na manjomputi tolur na dob tinadingkon, sonai do hupatumpu ganup tanoh on, seng dong na paherbang habong, atap na pangangang pagut atap na marsiok pe.
15Mintor manggagah ma tangkei dompak halak na manahahonsi, atap mangunsagah ma sihit dompak halak na manariksi? Tungkot ma gakni mangangkat halak na manjolomsi, atap simambu ma gakni manjomput halak, na so hayu ai?”
16Halani ai tongoson ni Tuhan Jahowa Zebaot do tirahap hu tongah-tongah ni halakni na mombur, anjaha pagaraon do pinurun i toruh ni hasangaponni, songon gara ni apuy.
17Anjaha panondang ni Israel do gabe songon apuy, anjaha na pansing-Ni gabe jirlam ni apuy, laho mangankon anjaha mamboiskon suga-sugani, hupi-hupini ibagas na sadari.
18Hamuliaon ni haranganni ampa jumani boiskononni do, hosah ronsi badan, songon parmerung ni naboritan parmerungni.
19Hayuni na tading i harangan boi hiraon, dakdanak pe boi ma manuratkon.
Haluahon ni Teba-teba na humbani Israel
20Bani ari ai, teba-teba humbani Israel ampa na maluah humbani ginompar ni si Jakob, lang be mangunsandei bani halak na mambogbogsi, tapi bani Jahowa, Na Pansing ni Israel mando sidea mangunsandei ibagas hasintongan.
21Teba-teba do na mulak, teba-teba humbani si Jakob mulak hubani Naibata na gogoh in.
22Age pe songon horsik i topi ni laut bangsamu ale Israel, teba-teba do hansa hunjai na mulak, domma iputuskon hamagouan, marhitei parsampur ni hapintoron-Ni.
23Tongon hasedaon na dob iputuskon Tuhan Jahowa Zebaot pasaudon-Ni do i tongah-tongah ni sab tanoh on.
24Halani ai sonon do nini Tuhan Jahowa Zebaot, “Ulang hanima mabiar dompak Assur, ale bangsang-Ku, na marianan i Sion, age pe ibogbog hanima marhitei libas-libas anjaha iondamkon simambuni bam, songon binahen ni Masir.
25Ai otik nari mando, marpunsa ma ringis-Ku, anjaha marbalik ma ringis-Ku bani sidea laho mamboiskon.”
26Jadi sintakon ni Jahowa Zebaot ma lonsing-lonsing dompak sidea songon na binahen-Ni manlonsing halak Midian dohorhon Dolog Batu Oreb, anjaha angkaton-Ni do tungkot-Ni i babou ni laut, songon na bani halak Masir ijia.
27Bani ari ai mosor ma rodi-Ni humbani abaramu, ampa pasangan-Ni laho ma humbani tangkuhukmu.
Parroh ni Munsuh hun Utara ampa Partalu ni Sidea
28Tangkog do ia hun Rimon, das ma ia hu Ayat, mamontas ma ia hun Migron anjaha i Mikmas ipatumpu ugas-ugasni.
29Ibontas sidea ma lombang ai, i Geba do sidea marborngin; gobir do Rama, maporus ia Gibea-Saul.
30Taur-taur ma ho ale boru Gallim! Tangar ma, ale Laisa! Balosi ma ia, ale Anatot!
31Maporus do Madmena, pangisi ni Gebim lintun mangindahi parbansahan.
32Sadari on ope das do ia i Nob, iondamkon tanganni dompak dolog ni boru Sion, dompak buntu-buntu ni Jerusalem.
33Tonggor ma, Tuhan Jahowa Zebaot do manultuli dangkah marhasoman kuasa na majangin; iroboh do panuntunni anjaha ipatoruh na matabun.
34Iimas do tombak marhitei hapak bosi, anjaha Libanon rap pakon hayuni na banggal-banggal ai marumbak ma.