Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 19 >> 

Panjahaion Pasal Masir

1Pangungkabon pasal Masir. Tonggor ma, margareta bani hombun na doras do Jahowa, anjaha das ma Ia hu Masir. Jadi hitir ma si sombah-sombahon ni Masir i lobei-Ni, anjaha malala uhur ni halak Masir ibagas.

2Pajobuon-Ku do Masir dompak Masir, ase sidea marsimunsuhan samah sidea sanina dompak sanina, hasoman dompak hasoman, huta dompak huta, harajaon dompak harajaon.

3Sipalumbaon do tonduy ni halak Masir ibagas anjaha georon-Ku do riah ni sidea; jadi sungkun-sungkun ma sidea bani si sombahon ni sidea, ampa bani datu ni sidea, bani paniaran ampa si partondung.

4Anjaha ondoskonon-Ku do Masir hubagas tangan ni pamarentah na mabisang anjaha raja na koras parrajai bani sidea, nini Tuhan Jahowa Zebaot.

5Horah ma bah na bani Nil, marsik anjaha horing ma bah mardalan.

6Marbau ma bah hurakan, lambin damok anjaha horah ma bah ni Masir, arung-arung pakon tolong melus.

7Sampalan na bani Bah Nil, poyon-poyon na i topi ni ampa haganup bonih na sinabur ijai, melus ma, ihabangkon logou gabe seng dong be.

8Marhoru ma si pardengke anjaha marhoih sagala si pangkail i Bah Nil; anjaha halak si parjala bani bah ai mangorong.

9Jut do uhur ni halak si horjahon tali rami, anjaha marposi bohi ni si palemes tali rami ampa si partonun.

10Marumbak do basikah ni tanoh ai, anjaha sagala si pangan gaji marhoru.

11Lontong tumang do gamot-gamot na i Soan, ai ma panuturi na pentar bani Parao, bodoh do pangajarini. Ija ma boi tarluarhon hanima bani Parao: Anak ni na maruhur do ahu, anjaha anak ni raja humbani sapari.

12Ija do siparuhurnima ai? Ipatugah ma bannima anjaha ipabotohkon ma, atap aha do ranggian ni Jahowa Zebaot bani Masir!

13Gabe na oto do gamot-gamot na i Soan, anjaha hona oto-otoan na sangap-sangap na hun Nop; kahou do Masir ibahen kopala ni marga-marga.

14Iuseihon Jahowa do tonduy hakahouon hubagas uhur ni sidea, gabe ipakahou sidea do Masir bani sagala pambahenanni songon si parmabuk na margulu bani utah-utahni.

15Gabe seng manjadi horja na hinorjahon i Masir, marhitei ulu atap ihur, marhitei dangkah ni palem atap arung-arung.

16Bani panorang ai gabe doskon inang-inang ma halak Masir, gobir anjaha hitir bani tangan ni Jahowa Zebaot, na niondamkon-Ni dompak sidea.

17Gabe songgot-songgot ma tanoh Juda bani Masir; anggo itarsingati ai bani, gobir ma ia halani ranggian ni Jahowa, na niranggihon-Ni dompak sidea.

18Bani ari ai dong ma lima huta i Masir, na mansahapkon sahap Kanaan anjaha na marbulawan hubani Jahowa Zebaot. Ir-Heres do goran ni sada humbani huta ai.

19Bani ari ai dong ma anjapanjap bani Jahowa i tongah-tongah ni tanoh Masir ampa tiang pardingatan bani Jahowa dohorhon parbaloganni.

20Gabe tanda ampa saksi ma ai bani Jahowa Zebaot i tanoh Masir; anggo doruh-doruh sidea bani Jahowa halani si pangodoh-odoh, jadi tongoson-Ni ma bani sidea sipaluah, anjaha Ia do marporang laho paluahkon sidea.

21Jadi patandahonon ni Jahowa ma diri-Ni bani halak Masir, anjaha tandaon ni halak Masir ma Jahowa bani ari ai; galangkonon ni sidea ma galangan sisayaton ampa galangan sipanganon, anjaha marbagah-bagah ma sidea bani Jahowa, anjaha suhunan ni sidea do ai.

22Lonsingon ni Jahowa do Masir, ilonsing tapi itambari; mulak do sidea bani Jahowa, marpangulaki do uhur-Ni bani sidea, anjaha pamalumon-Ni do sidea.

23Bani ari ai dong ma pasar hun Masir hu Assur; roh ma Assur hu Masir anjaha Masir hu Assur, rap manombah ma Masir pakon Assur bani Jahowa.

24Bani ari ai gabe patoluhon ma Israel i lambung ni Masir pakon Assur, jadi pasu-pasu i tongah-tongah ni tanoh on,

25na pinasu-pasu ni Jahowa Zebaot, nini, “Pinasu-pasu ma Masir, bangsang-Ku, ampa Assur, jadi-jadian ni tangan-Ku, ampa Israel parbagianan-Ku.”


  Share Facebook  |  Share Twitter

 <<  Yesaya 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel