Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 29 >> 

Hona Hubu Jerusalem, tapi Maluah do

1Bursik ma ho, ale Ariel, ale Ariel, ianan parsaranan bani si Daud hinan. Tambah-tambahi hanima ma tahun pesta in, sai marpestai ma hanima!

2Tapi parohon-Ku do hasosakan bani Ariel, gabe masa ma doruh-doruh ampa partangison; gabe doskon Ariel ma ai Bangku.

3Anjaha hubuon-Ku ma ho inggot, sosakon-Ku ho marhitei hubuan, anjaha bahenon-Ku do na mangimbang ho.

4Jadi unduk ma ho hun tanoh marsahap, anjaha humbagas orbuk do tarbogei hatamu; soramu songon sora ni begu-begu humbagas tanoh, anjaha humbagas orbuk do sahapmu marhusip-husip bogeion.

5Tapi munsuhmu na buei ai gabe songon orbuk na lumat ma ai, anjaha songon lapa-lapa na habang ma sipangodoh-odoh na buei ai. Anjaha sompong, na so panagamon do ai masa. Jahowa Zebaot do na roh marlulu

6marhitei longgur pakon lalou ampa sora na banggal, marhitei halisungsung pakon haba-haba ampa gara ni apuy na mangankon.

7Gabe songon nipi, songon panonggoran borngin ma bangsa-bangsa na buei ai, na marporang dompak Ariel, haganup na marporang dompaksi ampa dompak batar-batarni anjaha na manosaksi.

8Songon halak na loheian, na marnipi ia mangan, hape dob puho seng sombuh loheini iahap, barang songon halak na horahan, na marnipi ia minum, hape dob puho, loja ia anjaha horahni seng miloh: Sonai do bala ni bangsa ai, na marporang dompak Dolog Sion.

Hapitungon ni Bangsa ai ampa Pambobaini

9Jonong ma hanima anjaha longang, ulang ma hanima marpangidah, pitung ma! Mabuk ma hanima, tapi sedo binahen ni anggur, rebad-rebad ma hanima, tapi sedo halani siinumon na koras!

10Ai domma iuseihon Jahowa bannima tonduy na pasinok modom, anjaha itutup matanima, ai ma nabi-nabi ai, anjaha irungkub do ulunima, ai ma halak na marpanonggoran ai.

11Anjaha ganup pangungkabon ai, gabe songon hata ni buku na nilak do ai bannima, na binere bani sada halak na mambotoh mambasa, nini, “Basa on! Jadi ibalosi, ?Seng tarbahen ahu, ai ilak do in.?

12Atap anggo ibere buku ai bani halak na so mambotoh mambasa, nini, ?Basa on!? Jadi ibalosi, ?Seng hubotoh mambasa surat.?

13Jadi ihatahon Tuhan ma, ?Halani ipadohor bangsa on dirini marhitei pamanganni anjaha ipasangap sidea Ahu marhitei bibirni, hape uhurni ganggang do hun Bangku, anjaha biar ni sidea Bangku, domu bani titah-titah ni jolma, na ginuruhon do hansa,

14halani ai, tonggor ma, halongangan do use bahenon-Ku dompak bangsa on, halongangan botul-botul; jadi magou ma hapentaran ni na pentar-pentarni, anjaha masab hauhuron ni paruhur ni sidea.

15Bursik ma halak, na mamonopkon sura-surani bagas i lobei ni Jahowa, anjaha na mangkorjahon horjani ibagas hagolapan, na mangkatahon, ?Ise mangidah hanami? Ise mananda hanami??

16Ee hanima sipasuhar haganup! Ai doskon sitopa hudon do tanoh liat ai? Atap hatahonon ni jadi-jadian ma dompak na manjadihonsi: Seng ia manjadihon ahu; atap hatahonon ni na ginana ma dompak na mangganasi: Seng dong hapandeianni?”

Habayuon na Banggal ai

17Ai lang tongkin nari mando ase mubah Libanon gabe juma na lambutan, anjaha juma na lambutan hiraon gabe harangan?

18Bani ari ai, bogeion ni halak na nengel ma hata na tarsurat, anjaha marpangidah ma mata ni halak na mapitung humbani na golap anjaha na lotir.

19Anjaha martambah ma malas ni uhur ni halak na martoruh uhur ibagas Jahowa, anjaha halak na masombuh i tongah-tongah ni jolma marolob-olob do marhitei Na Pansing ni Israel.

20Ai bois ma halak sipangodoh-odoh, magou halak sipanrehei ampa haganup na pasura-sura hajahaton,

21ai ma na papeol uhum i paruhuman, ampa na manidingi halak sidabuh uhum i horbangan, anjaha na mandabuhkon halak parpintor marhitei hasaksian ladung.

22Halani ai sonon do hata ni Jahowa, na paluahkon si Abraham, pasal ginompar ni Jakob, “Seng anjai tarbador be Jakob, seng anjai marposi be bohini.

23Ai anggo ididah sidea jadi-jadian ni tangan-Ku i tongah-tongah ni sidea, papansingon ni sidea ma goran-Ku, papansingon ni sidea ma pakon Na Pansing ni Jakob anjaha habiaran ni sidea Naibata ni Israel.

24Anjaha halak na kahou ibagas partonduyon dapotan uhur pangarusion anjaha siparungut-ungut ra manjalo podah.”


  Share Facebook  |  Share Twitter

 <<  Yesaya 29 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran