Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 30 >> 

Hona Pinsang Bangsa ai halani Marhatengeran bani Masir

1Bursik ma anak sipanlawan, nini Jahowa, na mambahen sada sura-sura, na so marharorohan hun Bangku, anjaha na mambahen parpadanan, na so marharorohan humbani tonduy-Hu, gabe martambah-tambah dousa ibahen,

2na bingkat hu Masir lang palobei marpanungkun bani pamangan-Ku, laho marlingod bani pangondingi ni Parao, laho maporus bani linggom ni Masir.

3Tapi gabe habadoron do bannima pangondingi ni Parao, anjaha parporusnima bani linggom ni Masir gabe hahirion.

4Age pe domma i Soan raja ni sidea, anjaha suruhanni das hu Hanes,

5ganup do sidea maila marhalanihon ni bangsa na so marguna bani sidea, na so boi mambere pangurupion atap untung, tapi habadoron ampa hahirion do hansa.”

6Pangungkabon Pasal Binatang na i Tanoh Dangsina: Mamontas tanoh na gok habiaran ampa hasosakan, tanoh harohan ni singa boru-boru ampa singa tunggal, ulog darih ampa naga na habang, itaruhkon sidea do artani i atas gurung ni halode ampa ugas-ugasni bani gurung ni unta hubani bangsa na so marguna bani sidea.

7Ai pangurupion ni Masir na lang do ai anjaha sisoya-soya, halani ai do ase hugoran ia: Binatang na soh-soh.

Uhum bani Bangsa ai halani Mapas ni Uhurni bani Hata ni Naibata

8Ai pe, roh ma ho, uhirhon ma ai i lobei ni sidea bani sada lei, anjaha suratkon ma ai bani sada buku, ase gabe saksi ma ai bani panorang na roh ronsi sadokah ni dokahni.

9Ai bangsa sipanlawan do sidea, anak siparladung, anak na so ra manangihon pangajarion ni Jahowa,

10sidea na mangkatahon hubani siparalamat, “Ulang maralamat!” hubani nabi, “Ulang ijahai bennami pasal hasintongan, hatahon ma bennami na madear, jahai bennami na sininta ni uhurnami,

11tadingkon dalan in, lembangi lapang in, ulang be pabogeihon bennami pasal Na Pansing ni Israel!”

12Halani ai sonon do nini Na Pansing ni Israel, “Halani mapas uhurnima bani hata on, anjaha martenger ni uhur bani pangodoh-odohon ampa haleklukon, anjaha mangunsandei hujai,

13halani ai mangonai ma bannima hajahaton on songon rigat na lambin marbolag bani tembok na gijang, na mulai lengleng hu darat, na sihol sompong tompas, ibagas na so panagamon;

14anjaha parbolahni usih songon parbolah ni hudon tanoh, na iropuki seng maralang-alang, gabe seng jumpah be topik-topik humbani sanga-sangani, ianan mambuat apuy hun tataring atap manahui bah hun bagas parigi.

15Ai sonon do hata ni Tuhan Jahowa, Na Pansing ni Israel, ?Marhitei na mulak ampa na sip do maluah hanima, marhitei na soh pakon marhatengeran margogoh hanima.? Tapi seng ra hanima,

16nini hanima, ?Lang!? Rahanan do hanami marhuda lintun, halani ai tongon, maporus ma hanima. Nini hanima ope, ?Huda na doras do ajakonnami, halani ai tongon, doras do na mangayak-ayak hanima.?

17Saribu halak do hanima maporus halani pangondam ni sada halak; halani pangondam ni lima halak maporus do hanima ganupan, ronsi na tading humbennima ai, songon tiang mandera mando ai i atas dolog, songon alatan i raboyon.”

Naibata na Marulak-ulakan Uhur-Ni bani Bangsa-Ni

18Halani ai paima-imahon do Jahowa, sihol do marulak-ulakan uhur-Ni dompak nasiam; halani ai bingkat do Ia laho mangidopi nasiam. Ai Jahowa, ai ma Naibata ni uhum, martuah ma ganup halak na martenger ni uhur Bani.

19Tongon, ale bangsa na i Sion, na marianan i Jerusalem, seng lanjar tangis be nasiam. Maidop do uhur-Ni mangidah ham mambogei sora ni doruh-doruhmu. Anggo tartangar-Si ai, mintor balosan-Ni do ham.

20Age pe ibere Tuhan bani nasiam ruti hasosakan ampa bah hasunsahan, tapi seng be ponopkonon ni gurumu be dirini humbani nasiam, tapi idahon ni matamu ma gurumu tongtong.

21Anjaha pinggolmu manangar hata hun pudimu, mangkatahon, “On ma dalan, dalani ma ai! Ulang manimbil hu siamun atap hu sambilou!”

22Jadi pabutakon nasiam ma ijai gana-gana nasiam na nilampis bani pirak, ampa gana-gana tuangan nasiam na nilampis bani omas. Sampakkonon nasiam ma ai songon ugas na mabutak, anjaha hatahonon nasiam ma, “Misir ma!”

23Anjaha bereon-Ni ma udan bani bonih na dob sinaburhonmu hu juma, ampa gandum, gogoh ni juma ai, dear ma anjaha buei. Bani ari ai manggagat ma pinahan nasiam bani sampalan na bolag.

24Lombu age halode na mangkorjahon tanoh, panganonni ma gagaton na dob ginaraman, na dob pinaborsih marhitei durung-durung ampa anduri.

25Anjaha bani ganup dolog na gijang ampa buntu-buntu na banggal dong ma binanga ampa bah mardalan, bani ari pamunuhon bolon, sanggah na mangkarumbak manara-manara.

26Ambahni ai sondang ni bulan gabe songon sondang ni mata ni ari ma, anjaha sondang ni mata ni ari pitu hali lompit ma, songon haliharon ni pitu ari ma ai bani ari sanggah Jahowa mambaluti na maponggol humbani bangsa-Ni, anjaha manambari ugahni hinorhon ni hona bogbogan.

Uhum bani Bangsa ai

27Tonggor ma, goran ni Jahowa roh humbani na daoh! Gajag do ringis-Ni, parah parjimbur-Ni; bibir-Ni gok do bani gila, anjaha dilah-Ni songon apuy na mangankon;

28hosah-Ni songon bah na marbanggal, na sampur das hu borgok, laho mamiari bangsa sipajuh begu-begu marhitei anduri hamagouan, anjaha mannahkon kokang na pakahouhon bani osang ni bangsa-bangsa.

29Mandoding-doding ma nasiam, songon na marpesta na ma pansing sanggah borngin, anjaha marmalas ni uhur ma nasiam, songon halak na bingkat marhasoman tulila hu dolog ni Jahowa, hu dolog batu ni Israel.

30Anjaha pabogeihonon ni Jahowa ma sora-Ni na marmulia in, anjaha patidakon-Ni do tangan-Ni na tinampulhon-Ni ai marhasoman parah ni ringis-Ni ampa gara ni apuy na mangankon, marhitei haba-haba, udan na manalosou ampa sira-sira.

31Gobir ma Assur halani sora ni Jahowa, sanggah na binogbogkon-Ni simambu-Ni bani sidea.

32Anjaha ganup lonsing-lonsing uhum ai, na nilonsingkon ni Jahowa bani Assur, ipamasa do ai marhasoman sora ni tambur ampa husapi, anjaha marhitei tangan na mawas-awas do iporang sidea.

33Ai domma dokah hinan sirsir panutungan, bani raja ai pe ipasirsir do; bagas anjaha bolag do godung ai, gok tumang bani soban panutungi; hosah ni Jahowa, na mardalan songon hirtah na martimpul, ai do na pagarahon ai.


  Share Facebook  |  Share Twitter

 <<  Yesaya 30 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran