Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 43 >> 

1Tapi sonari, sonon do hata ni Jahowa, “Sitompa ho, ale Jakob, anjaha na manjadihon ho, ale Israel, ?Ulang ho mabiar, ai Ahu do sipaluah ho, domma Hudilo goranmu, Ahu do simada ho.

2Anggo ibontas ho bah, Ahu do hasomanmu, bani na mandipari bah banggal seng ayubkonon-Ni ho. Anggo mardalan ho hubagas apuy, seng anjai mosog ho, anjaha seng matutung ho bahenon ni gara ni apuy.

3Ai Ahu do Jahowa Naibatamu, Na Pansing ni Israel, Sipaluah ho. Domma Hubere Masir gabe partobusmu, Kus pakon Seba do panggantihmu.

4Halani harga do Huidah anjaha na pinasangap, anjaha holong do uhur-Hu bam, Hubere do jolma panggantihmu, ampa bangsa-bangsa gantih ni hosahmu.

5Ulang ho mabiar, ai Ahu do hasomanmu, hun hapoltakan do parohon-Ku ginomparmu, anjaha hun hasundutan patumpuon-Ku ho.

6Hatahonon-Ku ma bani utara, “Paulak!” Dompak dangsina, “Ulang jolomi!” Boan anak-Ku humbani na daoh, ampa borung-Ku hun ujung ni tanoh on,

7haganup na marpanggoranan bani goran-Ku, na Hutompa bahen hasangapon-Ku, na Hurumang anjaha na Hujadihon.

Israel do Hasaksian Pasal Naibata Jahowa

8Boan ma hujon bangsa na pitung, hansi pe dong matani, anjaha na nengel, hansi pe adong pinggolni!

9Sagala bangsa parbegu, roh ma marhumpul, anjaha martumpu ma ganup bangsa-bangsa! Ise ma humbani sidea na pabotohkon on, anjaha na pabogeihon na masa hinan hu banta? Ipajongjong ma saksini mamintori sidea, ase itangar halak anjaha ihatahon, “Sintong do!”

10Hanima do saksing-Ku, nini Jahowa, anjaha juakjuak-Ku na dob Hupilih, ase itanda anjaha ihaporsayai hanima Ahu, anjaha iarusi hanima: Ahu do in. I lobei-Hu seng dong Naibata, i puding-Ku pe seng anjai dong.

11Ahu, Ahu do Jahowa, anjaha sobali Ahu seng dong Sipaluah.

12Ahu do na pabotohkon ampa na paluahkon ampa na pabogeihon ai, anjaha seng dong naibata na legan i tongah-tongahnima; hanima do saksi-Ku, nini Jahowa, Ahu do Naibata.

13Ahu do ai humbani na basaia, seng dong na boi paluahkon humbani tangan-Ku; Ahu do mambahen, mintor ise ma na boi manundatisi?

Jahowa do Sipasuang Israel

14Sonon do hata ni Jahowa, “Sipaluah bannima, Na Pansing ni Israel: Halani hanima, Ahu do marsuruh hu Babel, anjaha Huhatahon iparseda pating-pating ni tutupannima, gabe mubah ma olob-olob ni halak Kasdim gabe tangis-tangis.”

15Ahu do Jahowa Na pansing bannima, Sitompa Israel, Rajanima.

16Sonon do hata ni Jahowa na mambahen pasar i tongah laut ampa na pauli dalan bani bah marbanggal,

17na mambahen ase mandarat gareta porang ampa huda, bala ampa siparporang; martibalan do sidea seng tarjongjongkonsi be, miloh do sidea, mintop songon sumbu.

18Ulang be dingat-dingat hanima na parlobei ondi, anjaha ulang ma pingkir-pingkiri na dob masa.

19Tonggor ma, Ahu mambahen na baru, domma martumbor nuan, ai lang ididah hanima ai? Ahu mambahen pasar i halimisan, bani tanoh dorging-dorging bah mardalan.

20Pasangapon ni binatang na i talun do Ahu, sorigala ampa burung unta; ai Ahu do na mambere bah i halimisan ampa bah mardalan i tanoh dorging-dorging, laho mambere minum bangsa-Ku na Hupilih in,

21bangsa na Hujadihon Bangku ase ibaritahon hamuliaon-Ku.

22Tapi seng Ahu ipadilo-dilo ho, ale Jakob, anjaha seng ra ho loja marhalani Ahu, ale Israel.

23Seng iboan ho Bangku biribiri bahen galangan situtungonmu, anjaha seng ipasangap ho Ahu marhitei galangan sisayatonmu. Ai sedo na Huparjabolon ho marhitei galangan sipanganon, atap Hulojai ho marhitei dahupa.

24Seng iboli ho Bangku morum-moruman marhitei pirakmu, anjaha taboh-taboh ni galanganmu seng pabosur Ahu. Tapi domma iparjabolon ho Ahu marhitei dousamu, domma ilojai ho Ahu marhitei hajahatonmu.

25Ahu, Ahu sandiri pasaloseihon panlanggaronmu halani Ahu, anjaha dousamu seng be padingat-dingaton-Ku.

26Paingat ma Ahu, marsipatorangan ma hita. Pajojor ma, pintori dirimu.

27Ompungmu na parlobei ai mardousa do, anjaha sipangapiti bam marbalik do hun Bangku;

28ipabutak raja-rajamu do rumah-Ku na ma pansing in. Halani ai do ase Huondoskon Jakob bani hasedaon, anjaha Israel bani hahirion.”


  Share Facebook  |  Share Twitter

 <<  Yesaya 43 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran