Dual PanelPardabuh ni Sisombah-sombahon na i Babel, ampa Panarihon ni Naibata na Timbul in bani Bangsa-Ni
1Domma tompas Bel, domma gadab Nebo; bani binatang ampa pinahan ipausungkon gana-ganani ai; boratan do sidea anjaha ngayotan, paboan-boan gana-gana na ni usung-usungnima ai hinan.
2Rap gadab anjaha tompas do sidea, seng tarpaluah sidea sipangusung ai; sidea sandiri laho hu habuangan.
3Tangihon hanima ma Ahu, ale ginompar ni Jakob, ampa haganup na tading humbani ginompar ni Israel, na Huombah humbani partapaan nari, na Huabing mulai humbani partubuhni.
4Das bani hatuaonnima totap do tong Ahu, ronsi na ubanon hanima, Ahu do tong mangombah hanima. Ahu do na dob mambahen ai, anjaha Ahu ma na mangombah, Ahu ma na mangusung anjaha Ahu ma na paluahkon.
5Bani ise sihol pausihonnima Ahu anjaha parbandingkononnima, barang parumpamahononnima Ahu, paboa usih Ahu hujai?
6Irungrungi sidea do omas humbani ranjutni, anjaha pirak idasing bani timbangan; iupahi sidea do tuhang omas, anjaha ipauli sidea ma sada naibata. Marrogop ma sidea, marsombah sidea tene hujai.
7Iabarai sidea ma ai, anjaha iusung ma; inahkon sidea ma ai bani iananni, jadi jongjong ma, seng meret ia humbani iananni. Anggo adong na dilo-dilo bani, seng ibalosi ai, seng ipaluah ia humbani hasosakanni.
8Ingat hanima ma ai anjaha parimbagaskon, ulak-ulak hanima mardiateihon ai, ale hanima sipanlanggar.
9Ingat hanima ma na dob masa humbani mungkahni: Ahu do Naibata, seng dong na legan; Ahu do Naibata, seng dong na doskon Ahu,
10na pabotohkon na sihol masa humbani mungkahni, anjaha humbani na basaia na so masa ope, na mangkatahon, “Sai totap do sura-surang-Ku, anjaha pasaudkon sagala ranggian-Ku,
11na mandilo manuk-manuk nanggordaha hun hapoltakan, humbani tanoh na daoh dalahi sipasaud sura-surang-Ku. Songon na dob Huhatahon, sonai do pamasaon-Ku, aha na dob Huranggihon, ai do bahenon-Ku.
12Tangihon hanima ma Ahu, ale na hengkeng maruhur; hanima na ganggang humbani hapintoron.
13Domma Huboan hundohor hapintoron-Ku, seng be daoh, anjaha haluahon na hun Bangku seng dokah be. Bereon-Ku do haluahon bani Sion, ampa hamuliaon-Ku bani Israel.”