Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 56 >> 

Boi do Halak na Legan, na so Israel Parrupei bani Jahowa

1Sonon do hata ni Jahowa, “Ramotkon hanima ma uhum, anjaha horjahon hanima ma hapintoron, ai barah ma roh haluahon na hun Bangku, anjaha talar ma hapintoron-Ku!

2Martuah ma jolma na mandalankon on, ampa anak ni jolma na marsijoloman hujai, na marramotkon ari Sabat humbani habutakon, anjaha na marramotkon tanganni humbani na mangkorjahon na masambor.

3Sai ulang ma ihatahon halak na legan, na dob padomuhon dirini hubani Jahowa, ?Sirangkonon ni Jahowa do ahu humbani bangsani; anjaha ulang ma ihatahon halak na kinasihkon: Tonggor ma, hayu na masak do ahu.?

4Ai sonon do hata ni Jahowa, ?Bani halak na kinasihkon, na marramotkon ari Sabat-Ku anjaha na mamilih na Huharosuhkon, anjaha na totap manjolom padan-Ku,

5bereon-Ku do bani sidea ibagas rumah-Ku ampa i tongah-tongah ni tembok ianan pakon goran, na dearan humbani anak ampa boru. Goran sisadokah ni dokahni do bereon-Ku bani sidea, goran na so sisasapon.?

6Anjaha halak na legan na dob padomuhon dirini bani Jahowa, laho mambalosi-Si anjaha laho mangkaholongi goran-Ni, ase gabe juakjuak-Ni sidea, haganup na marramotkon ari sabat humbani habutakon, anjaha na totap manjolom padan-Ku,

7sidea do boanon-Ku hu dolog hapansingon-Ku, anjaha pamalason-Ku do uhur ni sidea ibagas rumah partonggoan Bangku. Galangan situtungon ampa galangan sisayaton ni sidea harosuhkonon-Ku do ai bani anjapanjap-Ku, ai rumah partonggoan do goranon rumah-Ku bani sagala bangsa.”

8Sonon do hata ni Tuhan Jahowa, na patumpu halak na merap humbani Israel, “Patumpuon-Ku ope halak na legan hu bani, ambah ni na dob tumpu in!”

Hutuk-hutuk dompak Parmahan ni Bangsa in

9Sagala binatang na i talun roh ma mangankon, sonai ganup hanima binatang na i harangan.

10Parjaga ni sidea mapitung do ganup, seng dong na binotoh ni sidea; baliang na longah do sidea ganup, na so mambotoh mangorong; marnipinipi do sidea tibal anjaha marosuh modom.

11Tapi baliang on parhisap do, na so ra bosur. Anjaha homa parmahan na so maruhur do sidea, ganup sidea marsitohu dalanni bei, ganup mangindahi paruntunganni,

12nini sidea, “Eta, hualop pe anggur, bosuri hita ma dirinta bani siinumon na koras; patar pe sonai do, songon sadari on, sabasan tene.”


  Share Facebook  |  Share Twitter

 <<  Yesaya 56 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran