Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 58 >> 

Parpuasaon na Sintong

1Dilohon ma, gogoh tumang, ulang alang-alang! Pamaling ma soramu songon tarompit, pabotohkon ma bani bangsang-Ku panlanggaronni, hubani ginompar ni si Jakob dousa ni sidea!

2Tongon, Ahu do ipindahi sidea ari-ari, anjaha habotohon pasal dalan-Ku iharosuhkon sidea; hira bangsa na mandalankon hapintoron do sidea anjaha titah ni Naibatani seng ongga itadingkon. Ipindo sidea do hun Bangku panguhumion na pintor, anjaha pardohor ni Naibata bani sidea ihasiholi sidea do.

3Nini sidea, “Mase ma marpuasa hanami, hape seng ikawahkon Ham hanami? Mase ma ipatoruh hanami dirinami tapi seng parduli Ham?” Tonggor ma, bani ari parpuasaonnima, ijai do hanima mansari, anjaha isosak-sosak hanima ganup parhorjanima.

4Tonggor ma, laho maringor ampa martinggil do hanima ase marpuasa, laho mambogbogi marhitei tenju-tenju. Ulang ma songon sisonari ai hanima marpuasa, laho padaskon soranima hu nagori atas.

5Ai mintor on ma parpuasaon na Huharosuhkon atap panorang bani jolma laho paundukkon uhurni, anggo ipahurleh halak uluni songon arung-arung, marpakeian guni ia anjaha tibal bani orbuk? Hatahononmu do ai parpuasaon ampa ari harosuh bani Jahowa?

6Ai lang on do parpuasaon na Huharosuhkon, “Mananggali sangkut-sangkut halani hajahaton, mangkarhari tali ni pasangan, paluahkon halak na niodoh-odoh ampa manrosaki sagala pasangan.

7Ai lang on do, mambere sipanganon bani halak na loheian, mangarahkon halak na mampar-ampar hu rumahmu, anjaha anggo ididah ho halak na talanjang iparhioui ho ia anjaha lang iponopkon ho bohimu dompak hasomanmu jolma?”

8Jadi poltak ma sondangmu songon buha siang ari, anjaha podas ma tubuh hamalumon bam; hapintoronmu mardalan i lobeimu, anjaha hamuliaon ni Jahowa mangondingi ho hun pudi.

9Anggo dilo-dilo ho, jadi balosan ni Jahowa ma ho; anggo doruh-doruh ho, jadi hatahonon-Ni ma, “Ijon do Ahu.” Anggo ipadaoh ho hun tongah-tongahmu pasangan, jajari na tulduk-tulduk ampa na mansahapkon hajahaton,

10anjaha maidop uhurmu bani na loheian, ipasabou ho uhur ni na madoyuk, jadi poltak ma sondangmu i tongah-tongah ni na golap, anjaha hagolapanmu songon tongah ari ma.

11Jadi Jahowa ma tongtong mangiring-iring ho, anjaha pabosuron ho age i tanoh dorging-dorging, anjaha pargogohon-Ni holi-holimu, gabe songon pohon na niarbahan ma ho, anjaha songon bah tubuh, na so marnahorah-horah.

12Jadi paulion ni ginomparmu ma reong-reong na dob madokah ai, anjaha pajongjongonmu na dob pinajonam ai bani na basaia; goranon ni halak ma ho, “Sipauli na mabungbung, sipadear dalan ase tariankon.”

Pasal Papansingkon Ari Sabat

13Anggo ipasoh ho naheimu bani ari Sabat, laho mangkorjahon horjamu bani aring-Ku na pansing in, anjaha ihira ho Sabat ari malas ni uhur, anjaha ari na pansing ni Jahowa ra ho papansingkon; anggo ipasangap ho ai, seng dalan-dalan ho, seng ipindahi ho rosuh-rosuhmu, atap marsahap-sahapi tumang ho,

14jadi malas ma uhurmu mangidah Jahowa anjaha bahenon-Ku ma ho margareta i atas ni buntu-buntu ni tanoh on, anjaha parmudu-muduon-Ku ma ho marhitei parbagianan ni si Jakob, ompungnima, tongon, pamangan ni Jahowa do na mangkatahon in.


  Share Facebook  |  Share Twitter

 <<  Yesaya 58 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran