Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 7 >> 

Ojur-ojur bani Raja Ahas ase Totap Porsaya Ia

1Sanggah panorang ni si Ahas, anak ni si Jotam, anak ni si Usia raja ni Juda, tangkog ma si Resin, raja ni Aram pakon si Pekah, anak ni si Ramalya, raja ni Israel hu Jerusalem laho marporang, tapi seng tartaluhon sidea huta ai.

2Jadi dob ibaritahon halak bani ginompar ni si Daud, “Domma sariah halak Aram pakon halak Efraim, gabe hitir ma uhurni pakon uhur ni bangsani, songon hayu harangan na nidugur ni logou.

3Jadi nini Jahowa ma dompak si Jesaya, ʻLaho ma ho manjumpahkon si Ahas, rap pakon anakmu si Sear-Jasub, hu ujung ni dalan ni bah na hun bongbongan parhuluan ai dompak dalan hu ladang panjomuran ai.ʼ

4Hatahon ma hu bani, ʻMarjaga-jaga ma ho, nalom maruhur, ulang ho mabiar, anjaha ulang ma galek uhurmu mangidah sipu-sipu na dua na martimus ai, mangidah parringis ni si Resin, halak Aram ampa anak ni si Remalya.ʼ

5Halani na jahat iuhurhon halak Aram, halak Efraim ampa anak ni si Remalya dompak ho, nini,

6“Laho ma hita tangkog hu Juda, parsirak hita ma ai, anjaha taban hita banta anjaha pabangkit hita ma si Tabel gabe raja i tongah-tongah ni sidea,

7tapi sonon do hata ni Tuhan Jahowa, ʻSeng anjai jadi ai, seng saud ai.ʼ

8Tapi Damaskus do pamatang ni Aram, anjaha si Resin kopala ni Damaskus. (Onom puluh lima tahun nari masarsar ma Efraim, seng be sada bangsa)

9Anjaha Samaria do pamatang ni Efraim, anjaha anak ni si Remalya kopala ni Samaria. Anggo seng porsaya hanima, seng anjai totap hanima.”

Bagah-bagah Pasal Immanuel

10Dob ai nini Jahowa ma use bani si Ahas,

11“Pindo ma bam sada tanda humbani Jahowa Naibatamu, hun nagori toruh na bagas, atap hun datas humbani ianan na gijang.

12Tapi nini si Ahas ma, ʻSeng mangindo ahu, anjaha seng ra ahu manlajou Jahowa.ʼ

13Dob ai nini ma, ʻTangar ma ale ginompar ni si Daud! Maotiktu do pangahapnima manlajou jolma, gabe sihol lojaannima age Naibatangku?ʼ

14Halani ai bereon ni Tuhan sandiri ma bannima sada tanda, ʻTonggor ma, boratan rumah ma sada anak boru, anjaha tubuhkononni ma sada anak, anjaha bahenonni ma goranni: Immanuel.ʼ

15Mantega pakon manisan do sipanganonni, paima ibotoh manulak na jahat ampa mamilih na madear.

16Tongon, paima ibotoh manulak na jahat ampa mamilih na madear, tarulang ma nagori ni raja na dua ai, hinabiaranmu sonari.”

Hasedaon Sipamasaon ni Jahowa bani Tanoh Juda

17Parohon ni Jahowa do bam ampa bani bangsamu ampa bani ginompar ni bapamu panorang na so ongga masa dob sirang Efraim hun Juda ai ma marhitei Raja Assur.

18Jadi masa ma bani ari ai: Diloon ni Jahowa ma lanog hun topi ni Bah Masir pakon lobah hun Nagori Assur.

19Marrohan ma ai anjaha sogop ganup bani lombang na tungkis ampa bani rigat-rigat ni dolog batu, bani sagala duri-duri ampa bani sagala sampalan.

20Bani panorang ai, rasipon ni Jahowa ma marhitei rasip na sinewa hun dipar ni Bah Eprat (ai ma raja ni Assur) ulu ai ampa ambulu ni nahei, anjaha buaton ni ai do age jambek.

21Jadi masa ma bani panorang ai, sada halak marmahan pitah sada lombu ampa dua hambing;

22anjaha halani buei ni dadih na binereni, ipangan ma mantega; tongon, mantega ampa manisan do ipangan sagala na tading bani nagori ai.

23Jadi masa ma bani panorang ai, sagala tanoh na adong ijai, saribu kambona hayu anggur, na marharga saribu pirak, salih ma gabe galunggung hatubuhan ni duri-duri ampa suga-suga.

24Roh ma halak hujai marsior pakon marpanah, halani duri-duri ampa suga-suga do manggoki tanoh in.

25Anjaha sagala dolog-dolog, na sinangkul hinan, seng be idohori halak halani biarni bani duri-duri ampa suga-suga; jadi gabe panggagatan ni lombu ampa sirojaton ni biribiri ma tanoh in.”


  Share Facebook  |  Share Twitter

 <<  Yesaya 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel