Dual PanelParpadanan na Pinabayu i Sikem
1Jadi ipatumpu si Josua ma ganup marga ni Israel hu Sikem, anjaha idilo ma pangintuai ni Israel, kopalani, panguhumni pakon gamotni. Dob jongjong sidea i lobei ni Naibata,
2nini si Josua ma dompak ganup bangsa ai, “Sonon do hata ni Jahowa Naibata ni Israel: I dipar ni Bah Eprat do na ijia marianan ompungnima, si Tara bapa ni si Abraham pakon bapa ni si Nahor, anjaha mambalosi naibata na legan do sidea.
3Jadi Hubuat ma ompungnima si Abraham hun dipar ni bah ai, ase mardalani ia i sab tanoh Kanaan, anjaha Hupabuei ginomparni. Hubere do bani si Isak,
4anjaha hubani si Isak Hubere do si Jakob pakon si Esau. Anjaha hubani si Esau Hubere do Dolok Seir bahen parbagiananni; tapi tuad hu Masir do anggo si Jakob pakon anakni.
5Dob ai Husuruh ma si Musa pakon si Aron mamapai Masir songon na dob Hubahen ai i tongah-tongahni, dob ai Hupaluar ma hanima.
6Jadi Hupaluar ma ompungnima hun Masir; anjaha das ma hanima hu laut; ipardakdak halak Masir ma ompungnima marhitei gareta pakon siajak huda das hu laut Sigerger.
7Anjaha dob mandoraki sidea hubani Jahowa, gabe ibahen ma hagolapan i holangkolangnima pakon halak Masir; iparoh ma laut ai hubani sidea anjaha ilangkopi ma sidea; anjaha iidah matanima do na Hubahen ai hubani halak Masir; dob ai hundokah do hanima marianan i halimisan.
8Dob ai Huboan ma hanima hu tanoh ni halak Amori, na marianan i dipar ni Jordan; anjaha dob iporang sidea hanima, Huondoskon ma sidea hubagas tangannima, isoluk hanima ma tanoh ni sidea, anjaha Husiapkon ma sidea i lobeinima.
9Dob ai roh ma si Balak anak ni si Zippor, raja hun Moab marporang dompak Israel, isuruh ma suruhanni mandilo si Bileam, anak ni si Beor laho mamapai hanima,
10tapi seng ra Ahu patangi-tangi si Bileam; halani ai hanima ma ipasu-pasu anjaha Ahu paluahkon hanima hun tanganni.
11Jadi dob idipari hanima Jordan, anjaha das hanima hu Jeriko, gabe marmunsuh ma dompak hanima pangisi ni Jeriko, halak Amori, Peresi; Kanaan, Het, Girgasi, Hewi pakon Jebusi; jadi Huondoskon ma sidea hubagas tangannima.
12Dob ai Hutongos ma ualtong i lobeinima mangusir sidea i lobeinima, na dua raja ni halak Amori ai sedo marhitei podang barang panah.
13Hubere ma bannima sada tanoh, na so hinangalutkonnima, pakon huta na so pinaulinima, ase hanima marianan ijai; anjaha ipangan hanima do humbani pohon anggur pakon hayu jetun na so sinuannima.
14On pe sai habiari nasiam ma Jahowa, anjaha totap ma uhur nasiam mambalosi-Si ibagas putih ni uhur pakon hasintongan; paholang nasiam ma naibata na legan, na binalosan ni ompung nasiam i dipar ni Eprat pakon i Masir, anjaha balosi nasiam ma Jahowa.
15Tapi anggo seng marosuh nasiam mambalosi Jahowa, pilih nasiam ma sadari on barang ise sibalosan nasiam, barang naibata na legan na binalosan ni ompung nasiam i dipar ni Bah Eprat, barang naibata ni halak Amori, simada tanoh, na niianan ni nasiam. Tapi anggo ahu pakon hasomanku sarumah, Jahowa do sibalosannami.
16Dob ai nini bangsa ai ma mambalosi, “Daoh ma ai hun bennami, anggo mintor tadingkonon nami Jahowa, laho mambalosi naibata na legan;
17ai Jahowa Naibatanta do na mangarahkon hita pakon ompungta luar hun tanoh Masir, hun rumah parjabolonan, anjaha na mambahen i lobeita tanda na bolon in, anjaha na manramotkon hita bani ganup dalan na idalani hita, pakon i tongah-tongah ni ganup bangsa na binontasta ai;
18anjaha iusir Jahowa do ganup bangsa pakon halak Amori na marianan i tanoh in hun lobeita; halani ai hanami pe Jahowa do sihol balosannami, ai Ia do Naibatanta.”
19Dob ai nini si Josua ma dompak bangsa ai, “Seng tarbahen nasiam mambalosi Jahowa, ai Naibata na pansing do Ia, Naibata parsimburu, seng marpangulaki uhur-Ni mangidah panlanggaron nasiam pakon mangidah nasiam.
20Anggo itadingkon nasiam Jahowa anjaha ibalosi nasiam naibata na legan, gabe jadi marbalik ma Ia mamapai nasiam, siap tumang nasiam ibahen, romban hubani na madear na binahe-Ni bani nasiam.
21Dob ai nini bangsa ai ma dompak si Josua, “Lang! Jahowa do sibalosannami.”
22Dob ai nini si Josua ma dompak bangsa ai, “Nasiam sandiri do saksi dompak nasiam, paboa na dob ipilih nasiam Jahowa sibalosan nasiam.” Jadi nini sidea ma, “Hanami ma tongon saksi.”
23On pe ambungkon nasiam ma naibata na legan na i tongah-tongah nasiam, anjaha paunduk nasiam ma uhur nasiam bani Jahowa Naibata ni Israel.
24Jadi nini bangsa ia ma dompak si Josua, “Jahowa Naibatanta do sihol balosannami, anjaha sorani do sihol tangihononnami.”
25Dob ai ibahen si Josua ma sadarini ai parpadanan bani bangsa ai, anjaha ipatotap ma ai bahen titah pakon aturan i Sikem.
26Dob ai isuratkon si Josua ma hata ai hubagas buku titah ni Naibata; ibuat ma sada batu na bolon, anjaha ipajongjong ma ijai, i toruh ni hayu ara, na i lambung ni ianan na susi bani Jahowa.
27Dob ai nini si Josua ma dompak ganup bangsa ai, “Tonggor ma, batu on ma gabe saksi banta, ai domma ibogei ganup hata ni Jahowa, na pinatugahni banta; gabe saksi ma in dompak nasiam, ase ulang iparnalang nasiam Naibata nasiam.”
28Dob ai isuruh si Josua ma bangsa ai mulak bani ganup parbagiananni bei.
Parmatei ni si Josua pakon si Eleasar Itanom Holi-holi ni si Josep
29Dob salpu ganupan ai, matei ma si Josua, anak ni si Nun, juakjuak ni Jahowa, marumur saratus sapuluh tahun.
30Itanom sidea ma ia ibagas parbagiananni sandiri, i Timnat-Sera, na i Dolog Efraim, hampit utara ni Dolog Gaas.
31Sai ibalosi halak Israel do Jahowa sadokah manggoluh si Josua pakon sadokah manggoluh pangintuai, na dokah manggoluh ope i pudi ni si Josua, sagala na mambotoh haganup pambahenan ni Jahowa, na binahe-Ni hubani Israel.
32Ia holi-holi ni si Josep, na binoan ni halak Israel hun Masir, itanom sidea ma ai i Sikem, bani tanoh parbagianan, na binoli ni si Jakob humbani anak ni si Hemor, bapa ni si Sikem, mararga saratus Kesita; anjaha gabe parbagianan ni ginompar ni si Josep ma ai.
33Si Eleasar, anak ni si Aron pe matei ma, anjaha itanom sidea ma ia i Gibea, i huta ni si Pinehas, anakni ai, na binereni bani i Dolog Efraim.