Dual PanelPartalar ni Jahowa i Dolog Jetun
1Tonggor ma, na roh ma ari ni Jahowa, gabe bagion ma taban-tabanmu i tongah-tongahmin.
2Ai patumpuon-Ku ma ganup bangsa dompak Jerusalem laho marporang, gabe tartaban ma huta ai, rumah-rumah hona ayob, anjaha puang-puang hona butakan. Satongah huta ai tarboan hu habuangan, tapi simasima ni bangsa ai, seng siapkonon-Ku hun huta ai.
3Dob ai bingkat ma Jahowa mangimbang bangsa-bangsa ai, songon na somal Ia marporang bani ari parporangan.
4Jadi onjolhonon-Ni ma nahei-Ni bani ari ai i atas ni Dolog Jetun, tontang ni Jerusalem, hampit hapoltakan, anjaha bolah dua ma Dolog Jetun ai hun hapoltakan hu hasundutan, gabe jadi ma sada habungan na lumbang tumang; morot do satongah ni dolog ai dompak utara, anjaha na satongah nari dompak dangsina.
5Itutup ma habungan ni dolog-dolog-Kai; das do ronsi Asel habungan ni dolog-dolog ai; anjaha maningon maporus ma hanima songon parporusnima sanggah lalou bani panorang ni si Usia, raja ni Juda. Dob ai roh ma Jahowa Naibatangku, odor pakon-Si sagala halak na mapansing.
6Bani ari ai seng dong na milas barang na borgoh anjaha bah na himpang pe seng dong;
7anjaha layur ari ai, Jahowa do sibotoh ai, seng songon arian, seng songon borngin; tapi marayak bodari lihar ma use.
Panrajaion ni Jahowa
8Bani ari ai luar ma bah hagoluhan hun Jerusalem, satongah dompak laut hampit hapoltakan, satongah dompak laut hampit hasundutan, torus do sonai age sanggah logou ni ari atap musim udan pe.
9Anjaha Jahowa ma gabe Raja i sab tanoh on; bani ari ai Jahowa tumang mando, anjaha goran-Ni tumang mando.
10Mubah ma ganup tanoh ai gabe pamah hun Geba das hu Rimon hampit dangsina ni Jerusalem. Tapi gijang do ia huta ai anjaha totap bani iananni hun horbangan Benjamin das hu horbangan na parlobei ai das hu horbangan parsuhi-suhi, anjaha hun manara Hananel das hu kilang anggur ni raja ai.
11Jadi marianan ma halak ijai, anjaha seng dong be masa papa ijai, anjaha totap ma sonang Jerusalem.
12Tapi on do papa sipamasaon ni Jahowa bani haganup bangsa na roh marporang dompak Jerusalem. Masik do bahenon-Ni daging ni sidea, sanggah jongjong ope sidea bani naheini, mata ni sidea masik do ibagas liangni, sonai homa dilah ni sidea ibagas pamangan ni sidea.
13Bani ari ai masa ma hageoron bolon humbani Jahowa i tongah-tongah ni sidea, gabe ganup ma marsitangkap tangan ni hasomanni, anjaha tangan ni na sada mangimbang tangan ni na sada nari.
14Juda pe dihut do marporang mangkopkop Jerusalem, anjaha hona ayob ma habayakon ni bangsa-bangsa inggot, omas, pirak ampa hiou buei tumang.
15Papa-papa na sonai ai pe mangonai do homa bani huda, pirah ni halode, unta, halode, bani sagala pinahan na adong bani hulanan ai, usih hubani papa nongkan.
16Anjaha ganup na tading humbani ganup bangsa-bangsa ai, na bingkat mangimbang Jerusalem, bingkat ma sidea ai ganup tahun laho marsombah hubani Raja in, Jahowa Zebaot, ampa marpesta lampolampo.
17Tapi barang ise humbani bangsa na i tanoh on, na so tangkog hu Jerusalem laho marsombah hubani Raja in, Jahowa Zebaot, seng anjai roh be udan bani sidea.
18Porini bangsa Masir na so tangkog ai laho pataridahkon dirini, jadi sogop ma bani sidea papa, na nihonahon ni Jahowa bani bangsa na so tangkog laho mamestahon pesta parlampolampoan ai.
19Ai ma na gabe uhum bani Masir ampa uhum bani bangsa-bangsa, na so bingkat marpesta parlampolampoan hu Jerusalem.
20Bani ari ai tarsurat do age bani giring-giring ni huda: Pinapansing bani Jahowa. Anjaha hudon i rumah ni Jahowa gabe songon pinggan bolag panggalangan ma ai i lobei ni anjapanjap.
21Anjaha sagala hudon i Jerusalem ampa Juda maningon papansingon do ai bani Jahowa, ase sagala na manggalang boi roh, anjaha ibuat hunjai bahen panlompahanni. Anjaha seng dong be halak partiga-tiga bani ari ai i rumah ni Jahowa Zebaot.