Dual Panel1Usia putra Amasia jadina raja nagara Yuda dina taun kadua puluh tujuh Yarobam II ngarajaan nagara Israil,
2dina yuswa genep belas taun. Calikna di Yerusalem, ngarajaanana lima puluh dua taun. Jenengan ibuna Yekolya, urang Yerusalem.
3Lampah Usia pikamanaheun PANGERAN cara ramana.
4Tapi tempat-tempat ibadah ka brahala ku anjeunna henteu digempur; jalma-jalma masih keneh ngalurban jeung ngarukus di tempat-tempat kitu.
5Usia ku PANGERAN dikeunaan kasawat lepra, nepi ka pupusna kasawatna henteu leungit. Ku sabab kitu anjeunna mencilkeun anjeun di bumi kagunganana, bebas tina kawajiban anu jadi raja. Urusan nagara dikawasakeun ka Yotam, putrana.
6Carita Usia salian ti eta kaungel dina Kitab Babad Raja-raja Yuda.
7Sanggeus pupus sarta dikurebkeun di makam karajaan di Kota Daud, Yotam putrana ngagentos jadi raja.
8Jakaria putra Raja Yarobam II mimiti jadina raja nagara Israil dina taun katilu puluh dalapan Usia ngarajaan nagara Yuda. Calikna di Samaria sarta ngarajaanana genep bulan.
9Lampahna cara raja-raja anu saheulaeunana, nirca ti PANGERAN, nurut kana lampah jahat Raja Yarobam bin Nebat anu nyered Israil kana dosa.
10Anjeunna ditelasan di Yiblam ku Salum bin Yabes, anu geus ngajak sakait ka nu sejen. Geus kitu Salum ngagentos anjeunna jadi raja.
11Carita Raja Jakaria salian ti eta, kaungel dina Kitab Babad Raja-raja Israil.
12Pangandika PANGERAN ka Raja Yehu anu ungelna: "Anak incu maneh opat turunan bakal jaradi raja Israil" geus tinekanan.
13Salum bin Yabes mimiti jadina raja Israil meneran taun katilu puluh salapan Usia ngarajaan nagara Yuda. Calikna di Samaria, ngarajaanana ngan sabulan.
14Salum ditelasan ku Menahem bin Gadi urang Tirsa, anu ngahaja datang ka Samaria. Menahem ngaganti anjeunna jadi raja.
15Carita Raja Salum salian ti eta jeung hal sakongkolna, kaungel dina Kitab Babad Raja-raja Israil.
16Basa keur angkat ti Tirsa, Menahem nempuh heula nagara Tipsah dumeh eta nagara embungeun diajak biluk. Urang dinya jeung sakurilingna diparaehan, nu keur rareuneuh ge dibedelan beuteungna.
17Menahem bin Gadi mimiti jadina raja Israil meneran taun katilu puluh salapan Usia ngarajaan nagara Yuda. Calikna di Samaria, ngarajaanana sapuluh taun.
18Lampahna nirca ti PANGERAN, satutup umurna nuturkeun kanircaan Raja Yarobam bin Nebat anu nyered Israil kana dosa.
19Raja Tiglat Pileser ti nagara Asur ngarurug ka Israil. Menahem ngahaturanan perak 38.000 kilo, bari mundut dibantu supaya bisa tetep nyangking karajaan.
20Menahem meunangna duit ti urang Israil anu baleunghar, unggal jelema kudu mayar lima puluh uang perak. Sanggeus dibaktian duit, Raja Tiglat Pileser mulih ka nagarana.
21Carita Menahem kaungel dina Kitab Babad Raja-raja Israil.
22Menahem pupus, dimakamkeun di makam karuhunna, tuluy diganti ku Pekahia, putrana.
23Pekahia bin Menahem mimiti jadina raja Israil meneran taun kalima puluh Usia ngarajaan nagara Yuda. Calikna di Samaria, ngarajaanana dua taun.
24Lampahna nirca ti PANGERAN, nuturkeun kanircaan Raja Yarobam bin Nebat anu nyered Israil kana dosa.
25Pekahia ditelasan ku perwirana sorangan, Pekah bin Remalya anu dibantu ku lima puluh jelema urang Gilad. Ditelasanana di karaton Samaria di benteng jero. Ti dinya Pekah ngaganti jadi raja.
26Carita Pekahia lian ti eta aya dina Kitab Babad Raja-raja Israil.
27Pekah bin Remalya mimiti jadina raja Israil meneran taun kalima puluh dua Usia ngarajaan nagara Yuda. Calikna di Samaria, ngarajaanana dua puluh taun.
28Lampahna nirca ti PANGERAN, nuturkeun kanircaan Raja Yarobam bin Nebat anu nyered Israil kana dosa.
29Jaman Raja Pekah, kota-kota Iyon, Abel Bet Maaka, Yanoah, Kedes jeung Hasor katut wewengkon-wewengkon Gilad, Galilea jeung Naptali, direbut ku Tiglat Pileser raja Asur, jalma-jalmana dibawa ka Asur jaradi boyongan.
30Dina taun kadua puluh Yotam putra Usia ngarajaan nagara Yuda, Raja Pekah ditelasan ku Hosea bin Ela anu geus nyieun sakait. Ti dinya Hosea bin Ela ngaganti jadi raja.
31Carita Pekah salian ti eta kaungel dina Kitab Babad Raja-raja Israil.
32Yotam putra Usia mimiti jadina raja nagara Yuda meneran taun kadua Pekah bin Remalya ngarajaan nagara Israil,
33dina yuswa dua puluh lima taun. Calikna di Yerusalem, ngarajaanana genep belas taun. Jenengan ibuna Yerusa binti Sadok.
34Lampah anjeunna pikamanaheun PANGERAN cara Usia ramana.
35Tapi anjeunna henteu numpurkeun tempat-tempat ibadah ka brahala; jalma-jalma masih keneh ngalurban jeung ngarukus di nu kitu. Gapura Bait Allah ku anjeunna ditambah hiji deui, disebutna Gapura Kaler.
36Carita hal Yotam salian ti eta kaungel dina Kitab Babad Raja-raja Yuda.
37Jaman Raja Yotam PANGERAN mimiti ngadatangkeun Raja Resin ti Siria jeung Raja Pekah ti Israil narajang ka nagara Yuda.
38Sanggeus Yotam pupus sarta dikurebkeun di makam karajaan di Kota Daud, digentos ku Ahas, putrana.