Alkitab Mobile SABDA
[VER] : [SUNDA]     [PL]  [PB] 
 <<  Mazmur 50 >> 

1Jabur Asap. Allah Nu Maha Kawasa, PANGERAN, ngandika, nyaur sakuliah jagat ti wetan nepi ka kulon.

2Allah moncorong ti Sion, kota ratuning kaendahan.

3Allah urang sumping. Sumpingna henteu jempling, di payuneuna-Na aya seuneu luntab-lentab, sakuriling Mantenna ngagelebug angin ribut.

4Mantenna nyaur langit jeung bumi sina jadi saksi, nyaksian Mantenna nerapkeun hukum ka umat-Na.

5Timbalana-Na, "Kumpulkeun ka dieu umat Kami nu satia, anu kabeungkeut ku perjangjian Kami anu dikukuhkeun ku kurban peuncitan."

6Langit ngabewarakeun yen Allah teh adil, sarta Mantenna ku anjeun nu jadi hakimna.

7"Regepkeun he umat, dengekeun pangandika Kami, Kami rek nganyatakeun ka maneh, he Israil: Ieu Kami Allah, Allah maneh.

8Kami nyeukseukan ka maneh lain ku karana kurban-kurban maneh, lain ku karana kurban-kurban beuleuman anu salawasna dibaktikeun ka Kami.

9Kami teu butuh ku sapi ti kandang maneh, teu butuh ku embe maneh.

10Kabeh marga satwa di leuweung boga Kami, kitu deui ingon-ingon di rebuan pasir-pasir.

11Manuk-manuk nu gariras boga Kami, kitu deui mahluk-mahluk anu harirup di tegal-tegal.

12Upama Kami lapar, moal menta dahareun ka maneh, sabab alam katut saeusina, nya Kami anu bogana.

13Na Kami teh dahar daging sapi jalu, atawa nginum getih embe?

14Baktikeun katumarimaan maneh, kitu kurban ka Allah mah, jeung tedunan jangji maneh ka Nu Maha Kawasa.

15Upama meunang rerepit, sambat Kami, tan wande dijait sangkan maneh muji sukur ka Kami."

16Ari ka nu jahat, kieu Allah ngadawuhna, "Naon gawena maneh ngucapkeun parentah-parentah Kami? Naon gawena nyaritakeun perjangjian Kami?

17Da maneh teh embung dibebener ku Kami, parentah-parentah Kami ku maneh dipungpang.

18Teu cara mun nenjo bangsat, tuluy nyobat, sarta cacampuran jeung nu sok jinah.

19Sungut diumbar kana kagorengan, ngomong bohong tara asa-asa.

20Ka dulur sorangan tega ngadakwa, tega nyaliksik kasalahanana.

21Kitu kalakuan maneh teh, tapi Kami teu ngomong naon-naon, jadi ceuk pamikir maneh Kami oge kawas maneh. Tapi ayeuna maneh ku Kami ditegor, kalakuan maneh kitu ayeuna ku Kami dieceskeun.

22Ayeuna dengekeun, he anu ngalalaworakeun ka Kami, bisi maneh ku Kami dibasmi, pamohalan aya anu bisa nulungan.

23Kurban tanda ngahormat ka Kami teh nya eta ku ngucap sukur ka Kami, sarta sakur anu nurut ka Kami geus tangtu ku Kami disalametkeun."


  Share Facebook  |  Share Twitter

 <<  Mazmur 50 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel