Alkitab Mobile SABDA
[VER] : [SUNDA]     [PL]  [PB] 
 <<  Yeremia 3 >> 

1PANGERAN nimbalan, "Pamajikan anu geus diserahkeun, geus undur tur geus jadi pamajikan batur, ku urut salakina teu meunang diruju, sabab matak mawa noda kana tanah. Ari heug maneh, Israil, geus ngalayanan lalaki sakitu lobana make hayang balik deui ka Kami?

2Tuh teuteup puncak-puncak pasir, na aya anu ku maneh teu dipake tempat ngalacurkeun diri? Maneh sok ngadon ngadago kabogoh di sisi jalan, kawas urang Arab ngadodoho korbanna di gurun keusik. Ku sabab maneh lacur sarta jahat, ieu tanah keuna ku noda.

3Eta anu jadi sabab pang hujan teu turun-turun, pingijiheun teu datang-datang. Bener maneh teh badis awewe bangor, teu boga pisan kaera.

4Kari-kari ayeuna carek maneh ka Kami, ‘Anjeun teh Rama kuring, anu nyaah ka kuring ti leuleutik.

5Tangtos moal teterasan bendu, moal salawasna mikacua.’ Kitu carek maneh, tapi ari kalakuan tetep henteu weleh jahat."

6Jaman Yosia jadi raja, PANGERAN nimbalan ka kaula, "Katenjo ku maneh kalakuan Israil, awewe serong tea? Eta teh geus ninggalkeun Kami, seug di saban pasir luhur jeung di unggal handapeun tangkal anu gomplok nyieun peta sakumaha awewe bangor.

7Tadina ceuk pamikir Kami, sugan ari geus migawe kitu mah daekeun balik deui ka Kami. Horeng henteu. Petana kitu katenjoeun ku dulurna nu awewe, Yuda nu teu satia.

8Katenjoeun deuih yen Israil ku Kami dipirak, terus diusir, lantaran henteu balik deui ka Kami tur jadi awewe bangor. Tapi eta dulurna Israil, Yuda nu teu satia, henteu sieuneun. Manehna oge jadi awewe dayang,

9jeung teu boga kaera. Tanah teh ku manehna dinodaan, sarta manehna oge jinah, nyembah ka batu ka kayu.

10Ari geus kitu, Yuda nu teu satia dulurna Israil teh balik deui ka Kami, tapi ngan pura-pura, lain balik saenyana. Kitu timbalan PANGERAN."

11Geus kitu PANGERAN nimbalan ka kaula yen, Israil mah sanajan geus nukangan ka Mantenna ge tetela leuwih hade ti batan Yuda nu teu satia.

12Kaula ditimbalan nepungan Israil, kudu nepikeun timbalan kieu, "Eh Israil nu teu satia, geura balik deui ka Kami. Kami teh gede hampura, moal salilana ambek ka maneh.

13Asal maneh daek ngaku kasalahan, daek ngaku yen geus ngalawan ka PANGERAN, Allah maneh. Aku yen di unggal handapeun tangkal anu gomplok maneh geus mikeun awak ka allah-allah sejen, geus teu ngagugu kana parentah-parentah Kami. Kitu timbalan Kami, PANGERAN.

14Eh umat nu teu satia, geura marulang. Maraneh teh umat Kami. Maraneh ku Kami arek dicokotan, saurang ti saban kota, dua urang ti saban kaom, rek dibawa deui ka Gunung Sion.

15Rek dibere pangereh-pangereh anu saregep ka Kami, anu bakal ngatur maraneh kalawan lantip bijaksana.

16Ari geus kitu, di mana maraneh geus jembar baranahan di eta tanah, moal aya nu nyabit-nyabit deui Peti Perjangjian Kami. Hamo aya anu mikiran eta, moal aya anu ingeteun-ingeteun acan. Moal aya nu neangan atawa hayang nyieun deui.

17Dina mangsa eta, Yerusalem teh bakal disarebut ‘Panglinggihan PANGERAN’, sarta kabeh bangsa bakal karumpul di dinya seja ngabarakti ka Kami. Moal deui ngalampahkeun pangajak tabeatna anu bedegong jeung pangajak hatena anu jahat.

18Israil jeung Yuda bakal babarengan daratang ti pangbuangan di nagri kaler, marulang ka tanah anu ku Kami geus dipasrahkeun ka karuhun maraneh, dijadikeun tanah milikna."

19PANGERAN nimbalan, "Eh Israil, hayang Kami teh nampa maneh jadi anak, hayang mere tanah anu pikasenangeun, tanah anu pangendahna di saalam dunya. Hayang Kami teh disebut Ama ku maraneh, ulah deui-deui maraneh ingkar ti Kami.

20Tapi maneh geus teu satia ka Kami, kawas pamajikan anu serong lampah. Kitu timbalan Kami, PANGERAN."

21Aya sora ear ti puncak-puncak pasir, sora urang Israil careurik aluk-alukan, dumeh geus sarerong lampah, jeung geus parohoeun ka PANGERAN Allahna.

22Geura marulang eh sakur anu geus ingkah ti PANGERAN! Maraneh tangtu dicageurkeun ku Mantenna, jeung dijieun satia. Carek maraneh, "Hayu urang buru-buru ngadeuheusan ka PANGERAN, sabab Mantenna Allah urang.

23Ibadah urang nyembah ka brahala di puncak-puncak pasir teh sama sakali teu matak jadi pitulung. Datangna pitulung pikeun Israil mah ngan ti PANGERAN, Allah urang.

24Ibadah ka Baal mah, dewa nu ngerakeun tea, balukarna karoroncodan, ucul domba ucul sapi, ucul anak awewe lalaki, ucul sagala rupa beunang itikurih karuhun urang jaman baheula.

25Geus layakna urang teh nandangan kaera, diliputan kahinaan. Boh urang boh karuhun, salawasna ngan dosa bae ka PANGERAN, Allah urang, tara nurut kana parentah-parentah Mantenna."


  Share Facebook  |  Share Twitter

 <<  Yeremia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel