Dual Panel1Raja-raja urang Emor di kuloneun Walungan Yordan, kitu deui raja-raja urang Kanaan di sisi Laut Tengah, geus ngadarenge beja yen Walungan Yordan dibendung ku PANGERAN sarta urang Israil geus mareuntas, kacida galimirna, miris ku urang Israil.
2Ngandika PANGERAN ka Yosua, "Maneh kudu nyieun peso tina batu, urang Israil kudu disarunatan."
3Timbalan teh ku Yosua dijalankeun, urang Israil disarunatan di hiji tempat anu disebut Pasir Pangeureutan.
4(5:4-6) Basa bareto budal ti Mesir, kabeh lalaki geus disarunatan. Tapi waktu uprak-apruk di gurun keusik nepi ka opat puluh taun, barudak lalaki anu dijarurukeun di dinya mah taya anu disunatan. Sarta dina pameakan jaman eta, sakabeh lalaki anu basa budal ti Mesir geus meujeuhna jaradi prajurit, geus pararaeh lantaran ngabaha ka PANGERAN. Maranehanana keuna ku sumpah PANGERAN, yen moal kungsi narenjo tanah anu subur makmur, anu ku Anjeunna geus dijangjikeun ka karuhun-karuhunna tea.
5(5:4)
6(5:4)
7Ari anak-anakna can aya nu disunatan, sarta nya turunan anyar ieu anu disarunatan ku Yosua teh.
8Sanggeus ieu disarunatan, kabehanana sina ngarendek di pasanggrahan, sina calalageur heula.
9Ngandika PANGERAN ka Yosua, "Poe ieu maraneh ku Kami geus diangkat tina kahinaan, geus lain abid-abid urang Mesir deui." Ku sabab kitu eta tempat teh dingaranan Gilgal, tetep nepi ka kiwari.
10Sabot ngarendek di Gilgal di hiji padataran deukeut Yeriho, dina malem tanggal opat belas bulan eta, urang Israil mestakeun Paska.
11Dina poe isukna maranehna geus mimiti ngasaan hasil pepelakan tanah Kanaan, dalahar sanggray gandum jeung roti jarieunna, teu diragian.
12Geus kitu mah manna tea henteu turun deui sarta urang Israil eureun ngadahar manna. Ti semet harita dalalaharna teh tina hasil pepelakan tanah Kanaan.
13Sabot aya di tempat anu deukeut ka tanah Yeriho, Yosua ujug-ujug ningali aya hiji jelema di payuneunana keur matek pedang. Seug disampeurkeun, dipariksa, "Ieu teh prajurit mana, batur atawa musuh?"
14"Duanana lain," walonna. "Kami di dieu teh jadi panglima perang PANGERAN." Bruk Yosua sujud kana taneuh, ngahormat sarta unjukan, "Bade aya pikersaeun naon ka sim kuring? Sim kuring sumeja ngesto."
15Panglima perang PANGERAN ngawaler, "Lesotkeun tarumpah maneh, sabab ieu bumi anu keur ditincak ku maneh teh suci." Yosua ngalesotkeun tarumpahna.