Dual Panel1Sura si’i yako resi aku, i Paulus. Aku napilis i mPue Allah mawali pomakau i Yesu Kerisitu, apa etu semo pamporani i mPue Allah. Pasi sura si’i yako resi i Sostenes, pua’i ngkita anu samba’a pangaya.
2Wali kami dua mangantulis sura si’i resi komi to nja’u kota Korintus to mangaya i Pue pasi to i Pue Allah Puenya. Wali komi napilis seja i mPue Allah mawali tauNya apa saba palaong to naika i ngKerisitu Yesu. Ia mangampilis komi sindarandara pei samparia tau to makai-kai resi Pue ngkita i Yesu Kerisitu ri sambawo lino. Ia semo Pue nsira pasi Pue ngkita.
3Wali kami makai-kai see i Pue Allah, Pa’a ngkita, pasi i Pue Yesu Kerisitu, damampaponsanika komi kanotoNya pasi mangawaika komi karodo ndaya.
4A’i-a’i, aku tare pandoonya manganto’oka i Pue Allah tarima matao apa saba komi. Apa komi room mangantima kanoto i mPue Allah saba komi samba’a pei i Kerisitu Yesu.
5Wali aku manganto’oka i Pue Allah tarima matao apa saba komi samba’a pei i Kerisitu, wali see naka Ia room mampakasugi katuwu ngkomi. Kasugi to Ia mangawaika, etu semo kapande mangansani pasi mampakarebaka anu to monso.
6Wali yako palaong etu semo miyala komi maroso mangaya kareba mangkonong i Kerisitu, Makole Parajanji i mPue Allah.
7Wali si’i-si’i kita mangampeas temponya i Yesu Kerisitu, Pue ngkita, ma’i muni danakita ntau samparia. Pasi ri rayanya kita mangampeas etu, tare sora to yako i Nosa Mapasing to taa natima ngkita.
8Pasi Ia damampakaroso raya ngkomi rataka ri kapuranya temponya to si’i. I Nosa Mapasing damampakaroso raya ngkomi see komi tare to maya rapakasala ane ratamo temponya i Yesu Kerisitu, Pue ngkita, dama’i wo’u.
9Wali i Pue Allah maya rasarumaka. Ia semo to room mampokio komi see komi masingkatao pei AnaNya, i Yesu Kerisitu, Pue ngkita.
10Wali a’i-a’i, i Yesu Kerisitu, Pue ngkita, Ia roomo mangawaika aku kuasa. Wali apa saba kuasa etu see naka aku mamporapika resi komi see komi mawali samba’a pampobuuka naka ne’e komi masimpayu raya. Wali pasimba’a pampobuuka ngkomi pasi songka ngkomi.
11Apa a’i-a’ingku, re’e tau to maroo ri banua i ngKloe, sira rata resi aku pei mampakarebaka aku mangkonong tingka to mawali ri oyo ngkomi.
12Batuanginya ewa si’i. Apa re’e singga’a tau to manganto’o, “Aku mangalulu i Paulus.” Pasi singga’a wo’u manganto’o, “Aku mangalulu i Apolos.” Panewa re’e wo’u to manganto’o, “Aku mangalulu i Kerisitu.”
13Wali wimba i Kerisitu, Ia bara tiga’a-ga’as? Wimba, bara aku, i Paulus, to mangangkapateka komi ri kaju pasape? Pasi wimba komi, bara rabaptis see sa’e mangansani komi i Paulus puenya? Gete taa!
14Aku manganto’oka tarima matao kojo resi i Pue apa tare komi to aku mangabaptis seore kasimbalinya yako i Krispus sira dua i Gayus.
15See naka tare tau to maya manganto’o komi rabaptis mawali i Paulus puenya.
16(O, kukalingan, re’e seja i Stepanus pasi tau to maroo ri banuanya to kubaptis seja. Pei kasimbalinya yako etu tamo kunsani tau to kubaptis seore.)
17Apa i Kerisitu nangampokau aku si’a damangabaptis tau. Ia nampokau aku damampakarebaka tau kareba matao. Pasi tempo aku mampakarebaka kareba matao etu aku taa magombo mangampake kapande to si aku naka ne’e re’e tau to mangaya ojo yako kapandengku etu. Apa ane ewa see, sira taa damangansani mangkonong kuasa ngkapate i ngKerisitu ri kaju pasape.
18Kita mampakarebaka resi sa’e pei manganto’oka sa’e i Kerisitu rapaku ri kaju pasape mangkapateka kita. Wali tempo tau mangandonge kareba etu, tau to taa mangaya, to re’emo ri jaya yau lo’u apu naraka, sira manganto’o, “Gete! Gombo ntau bea etu!” Pei ane kita to mangaya, to rapalaes yako ri apu naraka, kita manganto’o, “Kareba etu semo kuasa i mPue Allah.”
19Apa ri raya ntuntu i mPue Allah re’e ratulis ewa si’i, to’o i mPue Allah, “Aku damampakakaja’aka yau kapande ntau pande. Pasi Aku damampakapura kanasa ntau to bae kanasanya.” Wali etu semo gombo to ratulis.
20Wali kesaa batuanginya tau pande? Pasi kesaa batuanginya tau to mampoguru Porenta i Musa? Pasi kesaa batuanginya tau ri lino si’i to pande masibanta? Tare batuanginya apa i Pue Allah roomo mangawali yau samparia kapande nto lino see mawali bea.
21Apa i Pue Allah pande kojo pasi ane ewa songka to si Ia to lino taa damangansani Ia ane mangampake kapande to si sira. Ane songka i mPue Allah, to lino darapalaes ane sira mangaya anu to bea ane ewa pandonge ntau, etu semo kareba matao to kami mampakarebaka.
22Wali to Yahudi, sira taa rani mangaya ane sira taa mangkita palaong to taa rapobiasa to mawali tondong resi sira. Pasi to Yunani, sira taa rani mangaya ane si’a gombo ntau to pande.
23Pei kami mampakareba mangkonong i Kerisitu mate rapaku ri kaju pasape. Wali ane mangandonge kareba etu, to Yahudi sira makodi rayanya, pasi tau to si’a to Yahudi sira mampobuuka gombo ntau bea.
24Pei re’e tau to room napokio i mPue Allah mawali Ia Puenya. Tau etu re’e to Yahudi pasi re’e seja to si’a to Yahudi. Wali tau etu mangandonge kareba matao pasi mangaya i Kerisitu. Tempo etu i Kerisitu mampaponsanika sira kuasa i mPue Allah pasi kapande i mPue Allah.
25Apa ane ewa songka i mPue Allah anu to napobuuka nto lino bea, etu semo to pande-pande pei kapande nto lino. Pasi tempo i Pue Allah mawali mayu’u, kayu’uNya etu to roso-roso pei karoso nto lino.
26Wali a’i-a’i, pobuuka kojo katuwu ngkomi tempo komi napokio i mPue Allah. Tempo etu taa malagi komi to pande ane ri pangkita nto lino. Pasi taa malagi komi to bae kuasa pasi to bae pangka ane ri pangkita nto lino.
27Pei i Pue Allah naporayaka mangampilis tau to bea ane ri pangkita nto lino see tau to pande darapakamea. Pasi Ia mangampilis tau to taa maroso see tau to maroso darapakamea.
28Pasi Ia mangampilis seja tau to kodi pangkanya pasi tau to maja’a rakita pasi to napobuuka nto lino tare batuanginya. Ia naporayaka mangampilis tau to ewa wetu see darapakapura kuasa ntau to napobuuka nto lino to bae batuanginya.
29Wali see naka tare to lino to maya tabaro ri tango i mPue Allah.
30Apa ojo yako palaong to naika i mPue Allah see naka kita mawali samba’a pei i Kerisitu Yesu. Wali apa saba kita samba’a pei i Kerisitu, see naka kita mangansani kapande i mPue Allah. Ia semo to manganto’o kita tare dosanta. Pasi Ia mangika see kita mawali Ia Puenya. Pasi Ia room mangalapa kita yako ri kuasa nu dosa.
31Wali etu semo batuanginya gombo to ratulis ri raya ntuntu i mPue Allah to manganto’o, “I sema-sema tau to tabaro, to tao-tao ia ojo tabaro mangkonong anu to naika i mPue.” Wali etu semo gombo to ratulis.