Alkitab Mobile SABDA
[VER] : [TAA]     [PL]  [PB] 
 <<  1 Korintus 7 >> 

1Wali a’i-a’i, re’e seore komi mampokatuka aku sura mampotanaka resi aku mangkonong paporongo ntau. Wali si’i sonongku. Kamonsonya tau to langkai matao kojo ane ia taa marongo.

2Pei boros tau to ragoda see naka magoyal pasi masala. Wali to tao-tao ane tau langkai re’e rongonya samba’a pei samba’a. Pasi tau we’a matao seja ane re’e rongonya samba’a pei samba’a.

3Pasi ane tau marongom, to langkai taa maya taa mangika anu to masipato naika nto langkai resi rongonya. Pasi ewa see seja to we’a resi rongonya.

4Apa si’a tau we’a etu to mangkuasang koronya ngkalio, rongonya semo to mangkuasang koronya. Pasi si’a tau langkai to mangkuasang koronya ngkalio, rongonya semo.

5Wali ne’e masita’amaka raya samba’a pei samba’a. Pei ane re’e komi to samboko to samba’a pampobuuka rani masita’amaka raya see yoa mangorop pasi makai-kai, ane ewa see taa mawei. Pei ne’e masae kojo panewa siwaka muni. Apa ane masae kojo komi samboko taa siwaka, komi bara danagoda i ngKepala Measa mangika palaong to maja’a apa saba tamo nukoto manganta’amaka raya ngkomi.

6Wali aku taa manganto’oka komi taa maya taa marongo. Aku ojo manganto’oka komi ane rani marongo, maya.

7Pei kamonsonya ane ewa pamporani to si aku, samparia tau ojo layo sewaju pei aku. Pei taa samparia tau to nakoto mangika ewa wetu, apa sora to nawaika i mPue Allah kita taa sewaju. I Pue Allah mangansoraka kita sora wungka yusa samba’a pei samba’a.

8Wali ane tau to dalayowa pasi to balu, ewa si’i kuto’oka sira, to taotao sira taa marongo, ojo maroo-roo sira layo ewa aku.

9Pei ane taa nakoto nsira manta’amaka raya nsira to tao-tao sira marongo. Apa to taotao marongo sakowa nasesai mpamporani ndaya to taa nakoto manganta’amaka.

10Wali ane tau to marongom, ewa si’i kuto’oka sira, pei kamonsonya si’a gombo to si aku, gombo i mPue. Etu semo, tau we’a to marongom taa maya mampoga’aka rongonya.

11Pei ane re’e tau we’a to mampoga’aka rongonya, ia tamo maya marongo wo’u. Ojo tamalenya etu semo to ia maya mamporongo muni. Pasi ane tau langkai taa seja maya mampoga’aka rongonya.

12Wali ane tau to yusa ewa si’i kuto’oka sira, pei to si’i ojo gombo to si aku, si’a porenta yako resi i Pue. Wali rapanya ewa tau langkai to mangaya pei rongonya taa. Ane to we’a etu tiroo rani maroo siwaka pei ia, tau langkai etu taa maya mampoga’aka ia.

13Pasi ane tau we’a to mangaya pei rongonya taa, ane rongonya etu tiroo rani maroo siwaka pei ia, to we’a etu taa maya mampoga’aka ia.

14Apa ane taa maga’a, to langkai to taa mangaya etu bara damangaya seja i Pue apa saba rongonya etu mangaya. Pasi ewa see seja to we’a to taa mangaya bara damangaya seja apa saba rongonya etu mangaya. Pasi ane tau samboko etu taa maga’a, ana nsira napobuuka i mPue Allah ewa ana ntau to Ia Puenya. Pei ane sira maga’a, ana nsira etu napobuuka i mPue Allah ewa ana ntau to taa mangaya.

15Pei wimba ane re’e tau to we’a bara to langkai to taa mangaya, pei ia rani mampoga’aka rongonya to mangaya? Ane ewa see, biakamo. Tamalenya to mangaya etu tamo rapakasaaka maroo-roo siwaka pei ia. Apa i Pue Allah room mampokio kita mawali Ia Puenya pasi Ia taa rani kita marotai katuwunta.

16Apa ane komi to we’a ojo maroo-roo siwaka pei rongo ngkomi to rani maga’a, tare batuanginya apa taa matantu ia bara damangaya. Pasi ewa see seja tau langkai resi rongonya to taa mangaya.

17Wali to tao-tao kita samparia taa mandoo mangalulu songka ngkatuwu to room napakatantuka i mPue kita samba’a pei samba’a. Pasi ewa wimba katuwu ngkita tempo napokio i mPue Allah mawali Ia Puenya, to tao-tao rapakapolas ewa wetu semo. Wali etu semo porenta to kuto’oka tau to mangaya nja’u ponto-ponto lipu.

18Wali rapanya tau to rasuimo ewa ada nto Yahudi tempo i Pue Allah mampokio ia. Ne’e tau etu mangaliwu jaya damawali muni ewa tau to taa rasui. Pasi ane tau to si’a to Yahudi tempo napokio i mPue Allah, ne’e tau etu rasui mangalulu ada nto Yahudi.

19Apa ane ri pangkita i mPue Allah nempo tau rasui mangalulu ada nto Yahudi, nempo taa, tare batuanginya resi Ia. To bae batuanginya resi i Pue Allah kita mangalulu samparia to Ia mamporentangika kita.

20Wali samparia tau ewa wimba katuwunya tempo napokio i mPue, to tao-tao ewa wetu semo kapolasinya tempo mangayam.

21Ane rapanya komi napowatua ntau tempo napokio i mPue, ane ewa see, ne’e masusa. Ojo ika palaong mbatua semo. Pei ane mangarata jaya see maya ralapa yako ara ngkuasa ntau puemu etu, ikam.

22Apa tau to watua ri tempo napokio i mPue damawali samba’a pei Ia, tau etu nalapa i mPue yako kuasa nu dosa. Pasi tau to si’a watua tempo napokio i mPue, tau etu mawali yau to papolaong i ngKerisitu. Wali ane ri pangkita i mPue Allah tare pasisalanya.

23Kita samparia naolika i mPue Allah raa i ngKerisitu, wali kita Ia semo Puenya. Wali ne’emo kita ojo mangaluluka yau pamporani ndaya nto lino ewa naika mbatua mangaluluka yau pamporani ntau puenya.

24Wali a’i-a’i, kuto’oka wo’u komi, ewa wimba katuwu ngkomi tempo napokio i mPue, to tao-tao ewa wetu semo kapolasinya tempo komi mangayam. Pasi ri raya ngkatuwumu etu, tuwu masingkatao pei i Pue Allah.

25Wali ane mangkonong ngana we’a to tawa re’e nepenya to langkai, aku tare porenta yako resi i Pue Allah. Ojo pampobuuka to si aku semo to dakuto’oka komi. Pei gombongku masipato rasarumaka apa yako ri pamporayang i mPue Ia mangansawang aku magombo.

26Wali ane ewa pampobuuka to si aku, tempo si’i kita to mangaya mangarata boros kasesa, wali see naka matao ane kita taa mangawali ewa wimba katuwu ngkita si’i-si’i.

27Wali batuanginya, tau to re’emo rongonya, ne’e mangaliwu jaya damampoga’aka ia. Pasi tau to tawa re’e rongonya, ne’e mangaliwu rongo.

28Pei ane bara re’e to langkai to tiroo rani marongo, si’a dosa nikanya. Pasi ewa see seja ane bara re’e ngana we’a to tiroo rani marongo, tau etu taa seja mangika dosa. Pei tau to marongo ri tempo si’i ojo damangadugang kasesa to danarata nsira. Wali see naka aku manganto’o to tao-tao ne’e marongo, apa aku taa rani sira tidugang kasesa to danarata.

29Wali a’i-a’i ewa si’i batuanginya. Kita to mangaya tamo masae kojo tempo to rawaika kita mangika palaong i mPue. Wali yako tempo si’i to langkai to re’e rongonya to tao-tao pakadota mangika palaong i mPue ewa nika ntau to tare rongonya.

30Pasi tau to re’e ri raya kamawo ndayanya, ne’e ojo kamawo ndayanya semo to ia mampobuuka. Pasi tau to ndende rayanya, ne’e ojo kandende ndayanya etu ia mampobuuka. Pasi tau to mangoli bara kesaa, ne’e ojo mampobuuka ngaya-ngayanya etu.

31Pasi tau to mangampake kasugi nu lino si’i, ne’e ojo kasugi etu to ia mampobuuka. Apa lino to nansani ngkita si’i dapaya yau.

32Wali pamporani to si aku komi ne’e moru-moru mampobuuka katuwu ngkomi ri lino si’i. Ane tau to tare rongonya, tau etu ojo mampobuuka palaong i mPue, bara ewa wimba daraika mampakasanang i Pue.

33Pei tau langkai to re’e rongonya, tau etu ojo mampobuuka katuwunya ri lino si’i, bara ewa wimba daraika mampakasanang rongonya.

34Pasi ewa see seja pasisalanya tau we’a to re’emo rongonya pasi tau we’a to tawa re’e nepenya to langkai. Apa ane tau we’a etu, ia ojo mampobuuka palaong i mPue, bara ewa wimba raika see koronya pasi toniinya ojo i Pue Allah Puenya. Pei ane tau we’a to re’emo rongonya, ia ojo mampobuuka katuwunya ri lino si’i, bara ewa wimba raika mampakasanang rongonya.

35Wali naka pei aku manganto’oka komi gombo si’i, apa bae kojo batuanginya resi komi. Aku taa rani mangawaika komi porenta to ojo manta’amaka komi. Pei aku rani komi mangika lengko ngkatuwu to masipato raika. Pasi aku rani see tare to mangantalas komi mangika palaong i mPue.

36Wali rapanya ewa tau to layo to mangkasimpandeka to we’a to taware nepenya to langkai, panewa masae kojo sira dua tawa marongo. Roo see to langkai re’e mampobuuka taa masipato ia taa mamporongo kasimpandenya etu apa kasimpandenya etu damasiamo. Wali ane ia rani kojo marongo, to tao-tao sira dua marongo. Si’a dosa resi ia.

37Pei kasimbalinya yako etu rapanya tau etu mampobuuka, “To tao-tao aku taa mamporongo kasimpandengku.” Wali ane tare to mampakasaaka ia mampobuuka ewa wetu, pei etu pamporaninya semo, pasi ane ia nakoto manganta’amaka pamporani ndayanya, ane ewa see matao seja sira dua taa marongo.

38Wali batuanginya ewa si’i. Tau to mamporongo kasimpandenya etu, ia mangika palaong to matao seja. Pei tau to taa mamporongo ia, tau to etu semo to tao-tao palaonginya.

39Wali ane ewa porenta i Musa, tau we’a to re’e rongonya taa maya mampiyaika yau rongonya etu tempo ia datuwuwa. Pei ane mate yau rongonya, tau we’a etu tilapamo yako ri ara mporenta to etu. Wali tempo etu ia maya mamporongo wo’u to langkai to yusa ane naporoe, pei ojo to langkai to i Pue Puenya.

40Pei ane ewa pampobuuka to si aku to sanasanang ane ia tamo marongo. Wali anu to kuto’o etu bara yako pampobuuka to si aku, bara yako i Nosa mPue Allah seja apa Ia re’e resi aku.


  Share Facebook  |  Share Twitter

Download Audio MP3 (1 Korintus 7):
Mobile (Low Quality) - CD (High Quality)

 <<  1 Korintus 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel