Dual Panel1Wali aku si’i tau to tilapamo yako ri ara ngkuasa nu dosa. Aku samba’a pomakau i Yesu Kerisitu pasi aku roomo mangkita i Yesu, Pue ngkita. Pasi komi semo wua mpalaong to nikangku yako ri kuasa i mPue.
2Wali nempo ri pangkita ntau to yusa aku si’a pomakau i Yesu, pei ane ri pangkita ngkomi, aku monso pu’u pomakauNya. Apa aku semo to nangkenika komi kareba matao seore. Pasi tempo komi mangaya kareba matao etu komi mawali samba’a pei i Pue. Pasi tempo etu komi mawali ewa tondong to mampakanasaka sa’e monso pu’u aku pomakau i Yesu.
3Wali si’i semo notongku to kuto’oka tau to mangabotus aku.
4Ane tempo kami mangika palaong i mPue, wimba kami bara taa masipato mangantima pangkoni pasi anu to rainu?
5Pasi wimba kami, bara taa seja masipato mangoko tau to we’a to mangayamo damawali rongo mami samba’a pei samba’a? Pei wimba, rongo mami etu bara taa seja masipato kami mangkeni ri raya mpalinja mami ewa naika mpomakau i Yesu to yusa pasi ewa naika ntua’i i mPue Yesu pasi ewa naika i ngKepas?
6Wimba pampobuuka ngkomi, bara ojo kami dua i Barnabas semo to taa maya taa mapalaong damangarata anu to rapake?
7Wali rapanya ewa si’i. Ane tau mawali tentara, tau etu taa mangampake doi to si ia ane mangoli anu to napake damangika palaong ntentara etu. Pasi rapanya ewa tau to mampomuya nawu anggur, tau to mampomuya etu masipato mangkoni wua nu anggur etu. Pasi tau to mangkampang domba pasi bembe, tau etu masipato manginu santila ue nsusu nu binatang etu.
8Wali rapa to kuto’o etu ojo rapa nto lino. Pei sewaju to nato’o mporenta i Musa.
9Apa ri raya mporenta i Musa re’e ratulis gombo i mPue Allah to manganto’o, “Ane sapi to mangayojok pae naka wea, ne’e raso’o yau ngujunya see ia maya mangkoni pae to rayojok etu.” Wali wimba, bara ojo sapi semo to napobuuka i mPue Allah tempo Ia manganto’o gombo etu,
10bara kita seja? Kamonsonya batuanginya nu gombo etu si’a ojo resi binatang, resi kita seja. Apa tau to mapalaong, rapanya ewa tau to mampojeko tana pasi tau to mambaju, tau etu masipato mampobuuka, “Aku damangarata seja santila yako ri wua mpalaongingku si’i.”
11Wali kami maya raporapaka ewa tau to mampomuya apa kami semo to mampakarebaka komi kareba to yako resi i Nosa Mapasing. Wali ane ewa see, wimba, bara mayabi kojo saro mami ane bara re’e to nuwaika ngkomi kami to kupake? Gete taa!
12Wali ane tau to yusa masipato nuwaika ngkomi anu to darapake, taa manto’o kami. Pei kami tawa re’e mamporapika resi komi anu to masipato kami mangantima etu. Kasimbalinya yako etu, kami ojo mansabaraka kasusa mpangayangaya, apa kami mampobuuka to taotao kami mansabaraka kasusa sakowa taba’a kareba matao mangkonong i Kerisitu.
13Wali komi nunsani ewa wimba raika ane ewa ada nu agama nto Yahudi. Ane ewa ada etu, tau to mapalaong ri banua i mPue Allah, tau etu damangarata pangkoninya yako ri banua i mPue Allah semo. Pasi tau to mapalaong ri palampa mpampue, tau etu damangarata santila pangkoni to darapampueka etu.
14Wali ewa see seja porenta to yako resi i Pue. Apa Ia manganto’o, “I sema-sema to mampakarebaka kareba matao, tau etu danawaika ntau to rapakarebaka samparia anu to ia damangampake.” Etu semo porenta yako resi i Pue.
15Pei aku nempo masipato marapi sawang resi komi, pei aku taa mangika. Pasi naka pei aku mangantulisika komi sura si’i si’a batuanginya aku manganto’oka komi mangansawang aku. Apa aku ndende rayangku ane maya manganto’o, “Aku tare marapi sawang resi tau to napakarebakangku kareba matao.” Pasi aku mangepe to tao-tao aku mate yau sakowa aku marapi bara kesaa, apa ane aku marapi, tamo masipato aku manganto’o gombo etu.
16Apa aku nempo mampakarebaka tau kareba matao, aku taa maya tabaro, apa etu semo palaong to nato’oka i mPue Allah aku mangika. Wali aku damangarata kasusa ane taa mampakarebaka kareba matao.
17Wali ane aku mampakarebaka kareba matao ojo yako ri kabuya ndayangku, aku masipato mangarata sarongku. Pei sabanya naka pei aku mampakarebaka kareba matao apa saba etu semo palaong to nasarumakaka i mPue aku.
18Wali aku mampakarebaka kareba matao pei aku taa mamporapi saro yako resi tau to rapakarebaka. Nempo masipato aku marapi sawang resi sira, pei aku taa mangika. Wali si’i semo to aku mampobuuka ewa sarongku, etu semo mampakarebaka tau kareba matao nempo tare to nabayar nsira to mangandonge.
19Wali saba tare to mangawaika aku saro, see naka tare pasi samba’a tau to masipato mamponsongkaka aku. Pei nempo ewa see, aku mamporayaka mawali ewa watua ntau samparia. Naka pei aku mangika ewa wetu see tempo aku mampakarebaka tau mangkonong i Kerisitu, kanjo’u-njo’u kaboro-boros sira to mangaya Ia.
20Wali ane aku mampakarebaka to Yahudi, aku mampolengkoka lengko nto Yahudi see sira damangaya anu to kuto’oka sira etu. Pasi ane aku mampakarebaka tau to mangalulu kojo porenta i Musa, aku seja mangalulu kojo porenta etu. (Kamonsonya aku tilapamo yako ri ara mporenta etu), pei aku mangaluluka see tau to kupakarebaka to mangalulu kojo porenta etu sira damangaya kareba matao.
21Wali ane aku mampakarebaka wo’u tau to taa mangansani porenta i Musa, aku mawali ewa tau to taa mangansani porenta i Musa see sira damangaya seja. Pei si’a batuanginya aku taa mangalulu porenta i mPue Allah. Aku mangalulu kojo porenta i ngKerisitu.
22Pasi ane aku sindara-ndara pei tau to tawa maroso pangayanya, aku mawali seja ewa tau to tawa maroso pangayanya see aku maya mampakaroso pangaya nsira. Wali ewa si’i. To lino mpangaya-ngaya pampobuukanya pasi lengko ngkatuwunya. Wali imba kanjo’ungku mampakarebaka tau kareba matao, aku mamporayaka mangawali yau lengko to si aku mampasewajuka tau to rapakarebaka etu see sira damampodongeka gombongku. Apa nempo wimba jaya to kupake mampakarebaka sira kareba matao, to bae batuanginya, etu semo re’e tau to rapalaes.
23Wali samparia palaong to etu aku mangika see tiduga-dugang tau to mangaya kareba matao, see aku seja rapakasanang sindara-ndara pei sira.
24Wali komi mangansani anu to mawali tempo tau matilumba. Tempo etu, tau to matilumba samparia maripo, pei ojo samba’aja to mangarata dale. Wali kita raporapaka ewa tau to menang etu. Wali anu kita mampakadota mangaluluka songka i mPue Allah see kita seja mangarata dale.
25Wali ane tau to damatilumba etu, sira madota kojo maripo-ripo yami pasi manta’amaka samparia pamporani ndaya to damangantalas sira naka pei taa magasi pariponya. Naka pei sira mangangika palaong etu apa sira rani mangarata dale, etu semo so’o mbo’o to magaya to raika yako ira ngkaju to rawaika resi tau to menang. So’o mbo’o etu taa masae damaja’a. Pei kita manta’amaka pamporani ndaya ngkita pasi mangaluluka songka i mPue Allah, see damangarata dale to tare kapuranya.
26Wali tau to matilumba, sira taa ojo maripo mpangkewanya. Pasi tau to masijanggur, sira taa ojo mangajanggur njo’u rao. Wali ewa see seja lengkongku. Aku tare mangika palaong to tare batuanginya apa kuporani mangarata dale.
27Wali see naka aku manta’amaka pamporani ndayangku ewa naika ntau to damatilumba, pasi aku mangkuasang korongku. Apa aku taa rani mampakarebaka sa’e kareba matao panewa roo see tamo napake i mPue Allah aku mangika wo’u palaong to etu.