Alkitab Mobile SABDA
[VER] : [TAA]     [PL]  [PB] 
 <<  1 Petrus 2 >> 

1Wali apa saba tuntu i mPue Allah to singkasaenya etu roomo mangawaika komi katuwu to bou, see naka posaka yau samparia lengko to maja’a, pasi samparia wuti. Ne’e ojo gombo ngkomi to manoto, pasi ne’e seja timopo. Pasi posaka yau seja samparia gombo to manto’o maja’a sa’e.

2Apa komi roomo mangepe pasi mangansani i Pue Ia manoto kojo resi kita. Wali aku mamporapaka komi ewa ana kodi to owo rapoanaka. Pasi aku mamporapaka tuntu i mPue Allah ewa ue nsusu to monso. Wali ewa wimba naika nu ana kodi to owo rapoanaka etu sangkani rani mansusu, to tao-tao ewa wetu seja danuika ngkomi sangkani rani mampodongeka tuntu i mPue Allah. Apa ane ewa see, kanjo’u-njo’u karoso-roso pangaya ngkomi, wali ewa see lengko ntau to roomo rapalaes.

3(2:2)

4Wali sarumaka i Yesu Kerisitu to tare pombaliNya pasi to mampakaroso kita ewa naika mbatu pu’u nsuno ndindi mampakaroso banua. Apa Ia raporapaka ewa watu to pu’u ngkatuwu. Watu etu ojo nataji yau nto lino, pei Ia semo to napilis i mPue Allah pasi bae batuanginya resi Ia.

5Pei ane kita to mangaya, kita seja raporapaka ewa watu to iwaikaNya katuwu, apa kita semo saga to napake i mPue Allah mangika banuaNya. Pasi kita mawali to pampue to i Pue Allah puenya. Wali kita mampampueka pampue to nato’oka i Nosa Mapasing kita mampampueka. Pampue etu mampakasanang i Pue Allah apa i Yesu Kerisitu to mamponsaruka kita.

6Pasi kita mangansani monso pu’u ewa wetu, apa re’e gombo i mPue Allah to ratulis yami ri raya ntuntuNya. Gombo etu ligi mangkonong palaong i Yesu to ewa watu to bae kojo batuanginya, Ia manganto’o, “Lo’a! Aku roomo mangampilis watu to bae batuanginya. Pasi watu etu Kuposaka nda’a kota Sion damawali watu tundasinya to uyunya raposaka. Wali i sema-sema tau to mangaya Ia, tau etu taa damangarata soso ndaya saba yako pangayanya resi Ia etu.” Etu semo gombo i mPue Allah to ratulis tempo owi.

7Wali ane resi kita to mangaya, watu etu bae kojo batuanginya. Pei ane tau to taa mangaya Ia, sira ewa tau to taa mangampake watu to bae batuanginya etu wali sira mangabanang gombo to ratulis yami ri raya ntuntu i mPue Allah. Gombo etu manganto’o, “Watu to taa napake ntau to mangawangu banua, watu etu nawalimo watu to bae kojo batuanginya.”

8Pasi sira mangabanang seja gombo to ratulis yami to manganto’o, “Etu semo watu to nakatisumpul ntau, pasi watu to bae to nakatirombi nsira etu naka pei sira tisiba yau.” Wali etu semo gombo to nabanang ntau to taa mangaya. Sira taa mampalaika tuntu i mPue Allah, see naka sira rato’oka tisumpul. Apa etu semo songka to naika yami i mPue Allah resi sira to taa mangaya.

9Pei kita tau to roomo napilis i mPue Allah damawali tauNya. Pasi kita semo to pampue to mangika palaong Makole ngkita. Pasi kita semo bansa to i Pue Allah Puenya pasi to tare yusa puenya. Naka pei kita napilis i mPue Allah, see kita damampakarebaka resi sa’e palaong to inikaNya to masipato rabarong. Apa Ia semo to nampokio kita damasuwu yako ri kawuri pei masua wo’u ri raya ngkaremeNya to bae kojo kayawanya.

10Wali tempo ruyu kita si’a tau to i Pue Allah Puenya, pei tempo si’i kita tau to i Pue Allah Puenya. Pasi tempo ruyu kita tawa mangarata pamporayang i mPue Allah, pei tempo si’i kita roomo mangarata. Wali see naka masipato kita sangkani mansarumaka i Yesu Kerisitu, watu ngkita.

11Wali a’i-a’i to kuporayang kojo, ane ri lino si’i kita ewa tau to rata yako ri lipu to yusa, si’a ewa tau pue lipu. Wali see naka kuporapika kojo resi komi ne’e mangaluluka pamporani ngkoro ngkomi to maja’a. Apa pamporani ngkoro etu sangkani mangewa tonii ngkomi.

12Pei ri rayanya komi maroo-roo ri oyo ntau to taa mangaya i Pue, ika lengko ngkatuwu to matao see danakita nsira. Apa ane ewa wetu, nempo sira manto’o maja’a komi, sira tiroo damangansani kamonsonya lengko ngkomi matao. Wali nempo sira manto’o maja’a komi ri tempo si’i, ane ratamo temponya i Pue Allah ma’i damangabotus to lino, tempo etu sira damangabarong Ia apa sira roomo mangkita lengko ngkomi to matao.

13Wali to tao-tao kita mampolaika songka samparia tau to naokotaka nto lino mawali pomarenta, apa etu semo pamporani i mPue resi kita. Wali polaika makole, apa ia semo to bae kojo kuasanya.

14Pasi polaika seja gubernur to nawaika i makole kuasa damangahuku tau to mangika palaong to maja’a, pasi sira damangabarong tau to mangika palaong to matao.

15Wali polaika sira. Apa pamporani i mPue Allah, etu semo kita mangika palaong to matao see tau bea to bo’onya mangansani anu to monso, tare to naponoto nsira manganto’o maja’a kita to mangaya.

16Wali si’a batuanginya kita watua mpomarenta. Kamonsonya kita masanang apa kita taa napowatua ntau. Wali ika lengko ngkatuwu to masipato naika ntau to si’a watua nsa’e. Pei ne’e mampobuuka, “Kami si’a watua nsa’e, wali taa mawei nempo kami mangika palaong to maja’a.” Wali to tao-tao komi ne’e mampobuuka ewa wetu apa komi nempo si’a watua ntau, pei komi to papolaong i mPue Allah. Wali to taotao komi mampobuuka, “Kami damangika lengko ngkatuwu to masipato naika nto papolaong i mPue Allah.”

17Wali see naka angga samparia tau, porayang pua’i ngkita to samba’a pangaya, palaika i Pue Allah saba manga’angga Ia, pasi angga i Makole.

18Wali komi to napowatua ntau, polaika songka ntau pue ngkomi, pasi angga kojo sira. Wali ika ewa wetu nempo tau pue ngkomi etu matao pasi manoto pei nempo wukuwuku.

19Wali ane wuku-wuku tau pue ngkomi, ane ewa wetu komi bara damangarata kasesa to taa masipato komi mangarata. Pei ane komi ojo mangansabaraka kasesa etu apa saba mampobuuka pamporani i mPue Allah, ane ewa see komi masipato rabarong.

20Pei ane komi mangika palaong to maja’a, see naka komi natidas ntau to pue ngkomi, ane ewa see, taa masipato komi rabarong nempo komi mangansabaraka kasesa to etu. Pei ane komi rasesai apa saba mangika palaong to matao, pei komi mangansabaraka kasesa etu, palaong etu mampakasanang kojo i Pue Allah.

21Wali masipato komi mansabaraka kasesa apa etu semo palaong to nawaika i mPue Allah kita tempo Ia mampokio kita mawali Ia Puenya. Apa sakowa i Kerisitu mangarata seja kasesa seore mangkasesaka kita. Wali Ia mawali tondong to masipato kita mangalulu.

22“Apa Ia tare dosaNya pasi taa seja re’e gomboNya to manipu.”

23Pasi tempo Ia napoja’a ntau, Ia taa mampoja’a wo’u sira. Pasi tempo Ia nasesai ntau Ia taa mamponsawak. Ia ojo mansarumakaka koroNya resi to pobotus to sangkani mangabotus singkonong pei to masipato raika. To pobotus etu, etu semo i Pue Allah.

24Wali i Kerisitu etu, Ia semo to mangkeni dosa ngkita ri koroNya tempo Ia rapaku ri kaju pasape. Pasi yako wela-wela to narata i ngKerisitu seore, see naka kita rapakatao. Ewa wetu inikaNya see kita maya mawali ewa tau mate to tamo nakuasang nu dosa. Pasi Ia mangika palaong etu see kita maya tuwu damangika lengko to singkonong pei i Pue Allah.

25Apa tempo ruyu kita ewa domba to pusa yau. Pei tempo si’i kita roomo mawolili muni resi to pangkampang to mangararamaka katuwu ngkita. Wali masipato kita mangika lengko ngkatuwu to mangalulu songka to si Ia.


  Share Facebook  |  Share Twitter

Download Audio MP3 (1 Petrus 2):
Mobile (Low Quality) - CD (High Quality)

 <<  1 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel