Dual Panel1Wali a’i-a’i, kami rani mampaponsanika komi mangkonong palaong to mawali yako ri kanoto i mPue Allah resi tauNya to siromu ri lipu-lipu nja’u propinsi Makedonia.
2Apa tau Makedonia etu mangarata kasesa to mawali soba to bae kojo resi sira. Pei nempo ewa see tiroo bae kandende ndaya nsira. Pasi nempo masiasi kojo katuwu nsira, tiroo bae kanoto ndaya nsira mangansora sa’e.
3Monso pu’u gombongku etu apa aku matamanasa palaong to naika nsira. Apa sira mangansora sa’e si’a apa rapakasaaka. Buya raya nsira mangansora sa’e. Wali imba pata mpangkurang nsira mangawai, etu semo to nawai nsira. Pasi kamonsonya mayabi wo’u nawai nsira.
4Pasi sira mamporapika kojo resi kami see kami mangantima sora nsira etu. Sira manganto’o, “Kami seja rani mangansawang tau to i Pue Allah Puenya to nja’u Yudea.” Ewa wetu nato’o nsira.
5Wali ipu raya mami mangkita palaong to naika nsira, apa si’a ojo doi to nawai nsira, koronya seja. Apa uyu-uyunya sira mamparajanjika resi i Pue sira damangika palaong to si Ia. Panewa roo see sira mamparajanjika wo’u resi kami sira damangaluluka songka mami apa etu seja pamporani i mPue Allah.
6Wali kami rani komi seja mawali ewa sira, see naka kami mamporapika resi i Titus see ia yau muni resi komi see ia maya mangansawang komi mampakaroo palaong to ipomulakanya resi komi seore. Etu semo mampasiromunaka sora to komi rani seja mangawai damangansawang pua’i ngkita to samba’a pangaya nja’u propinsi Yudea.
7Pei kami mangansani komi to Korintus semo to manganangi sa’e ri rayanya samparia to nuika ngkomi. Ewamo pangaya ngkomi, pasi kapande ngkomi mampoguru pasi mangansani anu to monso mangkonong i Kerisitu, pasi kadota ngkomi, pasi pamporayang ngkomi resi kami. Ane palaong to etu, komi semo to manganangi sa’e. Wali see naka matao ane komi manganangi seja sa’e ane mangkonong kanoto ngkomi mangansora sa’e.
8Naka pei aku manganto’oka komi ewa wetu si’a mamporentang komi. Pei aku mampaponsanika komi mangkonong ewa wimba kabaenya kanoto ntau Makedonia see damawali tondong to maya nululu ngkomi. Apa ane komi bae seja kanoto ndaya ngkomi mangansora sa’e, palaong to etu damampakanasa monso pu’u komi mamporayang sa’e.
9Wali masipato komi manoto resi sa’e apa komi mangansani ewa wimba kabaenya kanoto i Yesu Kerisitu, Pue ngkita. Ia sugi kojo tempo tawa ma’i ri lino si’i, pei nempo ewa wetu, Ia buya rayanya mawali masiasi see maya mangansawang kita. Wali yako kasiasi to si Ia etu see naka kita mawali sugi.
10Wali ane mangkonong sora to darapasiromunakaka pua’i ngkita, si’i semo pampobuuka to si aku. To tao-tao komi mampakaroo ruyu palaong to pamulaka ngkomi to’u liu. Etu semo komi mampakaroo mamporomung sora. Apa tempo etu komi semo to uyunya rani mampasiromunakaka sira sora, pasi komi semo to uyunya mamula mangika palaong to etu.
11Wali pakaroo ruyu mampasiromunaka sora etu imba pata mpangkurang ngkomi. Pasi ika palaong to etu ri kabuya ndaya to singkonong ewa kabuya ndaya ngkomi tempo mangika songka seore.
12Apa ane buya raya ngkomi mangawai sora imba pata mpangkurang ngkomi samba’a pei samba’a, i Pue Allah masanang mangantima. Kita taa sewaju-waju pangkurang ngkita mangawai, pei taa mawei, apa to bae batuanginya resi i Pue Allah kita mangawai singkonong pei anu to re’e resi kita samba’a pei samba’a, si’a singkonong pei anu to tare.
13Wali aku taa rani mampasiasika komi see sa’e daralapa yako ri kasiasi nsira. Pamporaningku samparia tau paka taa masiasi katuwu nsira.
14Wali ane tempo si’i, komi gana kojo to re’e resi komi, wali masipato komi mangansawang tau to taa gana. Pei ane ratamo temponya komi tamo gana to re’e resi komi, tempo etu komi semo to danasawang wo’u ntau to tiroo gana. Ewa wetu daraika masisawang see samparia tau paka taa masiasi katuwu nsira.
15Wali palaong to etu singkonong pei anu to ratulis ri raya ntuntu i mPue Allah tempo owi, mangkonong tempo to Israel mamporomung pangkoni mana. To ratulis etu manganto’o, “Tau to mamporomung boros, taa seja miyabi. Pasi tau to mamporomung sangkodi, tiroo seja gana.” Ewa wetu ratulis ri raya ntuntu i mPue Allah.
16Wali kami manganto’o tarima matao kojo resi i Pue Allah apa Ia semo to roomo mapalaong ri raya i nTitus naka pei i Titus seja rani kojo rayanya mangansawang komi sewaju ewa kami.
17Apa tempo kami mamporapika resi ia see ia dayau resi komi, tempo etu ia masanang kojo rayanya. Pei kamonsonya nempo kami taa mampokau ia, ia tiroo dayau yako ri kabuya ndayanya apa ia masanang kojo mangansawang komi.
18Pasi re’e seja a’i ngkita to napokau mami yau mangalulu ia. Ngkai etu nabarong ntau i mPue to siromu nja’u ponto-ponto lipu. Naka pei ia rabarong apa saba palaong to inikanya mampakarebaka kareba matao.
19Pei ia si’a ojo nabarong ntau i mPue to siromu nja’u lipu-lipu etu. Ia napilis seja nsira damangalulu kami ri raya mpalinja mami damangkenika pua’i ngkita sora to roomo rapasiromunaka si’i. Wali naka pei kami mamposiromunaka sora pei mangkenika sa’e etu see i Pue danabarong ntau. Pasi kami mangika palaong to etu damampaponsanika tau kabuya ndaya mami mangansawang sa’e.
20Wali naka pei kami rani a’i ngkita etu mangansawang kami see ia damawali matamanasa to maya mampakanasaka sa’e kami tare mangoko bara kesaa yako ri sora to ikeni mami etu. Kami rani mangajagai naka ne’e tau damampakasala kami mangkonong ewa wimba naika mami mampakarataka sa’e sora to bae si’i.
21Apa kami mampobuuka yami see kami damangika anu to masipato ra’angga si’a ojo ri pangkita i mPue Allah, pei ri pangkita nu mata nto lino seja.
22Wali re’e wo’u samba’a a’i ngkita to napokau seja mami mangalulu i Titus sira dua. Tau etu malagi ngkanimo mampakanasaka kami ia tau to sangkani masanang mangansawang sa’e. Pasi si’i-si’i ia tidugang wo’u kasanang ndayanya mampobuuka mangansawang komi, apa bae pansarumakanya resi komi.
23Wali ane mangkonong i Titus, ia yunungku to samba’a palaong pei aku mangansawang komi. Pasi ane mangkonong pua’i ngkita to dayau mangalulu ia, sira napokau ntau i mPue to siromu ri lipu-lipu sire. Wali yako lengko ngkatuwu nsira, see naka i Kerisitu nabarong ntau.
24Wali ane ratamo tau togo to damangansawang komi mampasilonga sora ngkomi etu, kuporapika resi komi see komi mampaponsanika sira pamporayang ngkomi. Wali jayanya komi mampakanasaka sira pamporayang ngkomi etu, etu semo mampakaroo mampasilonga sora ngkomi. Apa ane ewa see, damanasa resi sira pasi resi tau i mPue to siromu nja’u lipu-lipu to yusa, komi monso pu’u mamporayang sa’e. Pasi damanasa seja resi sira kami masipato mangabarong komi.