Dual Panel1Wali anangku, pakaroso rayamu yako ri kanoto i mPue Allah anu to kita mangarata apa saba kita samba’a pei i Kerisitu Yesu.
2Seore korom re’e seja mangandonge anu to aku mampotunde ri tangonya boros matamanasa. Wali anu to kupotunde etu, sarumakaka resi tau to maya rasarumaka pasi to nakurang mampotundeka wo’u tau to yusa.
3Wali kita to mangika palaong i ngKerisitu Yesu, kita raporapaka ewa tentaraNya. Wali insoka ri raya ngkasesa ewa tentara to matao.
4Apa ane tentara to tongonya mapalaong, ia rani mampakasanang kepalanya. Wali see naka palaong to yusa tamo mangantalas ia mangika palaong ntentara.
5Pasi kita to mangika palaong i ngKerisitu, kita maya raporapaka seja ewa tau to matilumba. Wali tau to matilumba etu, sira taa damangarata dale ane sira taa mangaluluka porenta-porenta to rato’oka samparia tau to matilumba etu.
6Pasi kita to mangika palaong i ngKerisitu maya seja raporapaka ewa tau to panawu. Apa ane to panawu to maroso kojo mapalaong, tau etu semo to masipato uyunya mangarata wua mpalaonginya etu.
7Wali pobuuka kojo gombo to aku manganto’o si’i, apa i Pue damampakanasaka ri raya ngkorom see korom damangansani kojo.
8Ne’e mangkalingan i Yesu Kerisitu. Ia rawangu muni yako ri kapateNya, pasi Ia wiyaa i Daud. Wali ne’e mangkalingan Ia, apa etu semo kareba matao to kupakarebaka resi tau.
9Wali apa saba aku mampakarebaka kareba matao etu see naka aku rasesai pasi rapunguka rante ewa tau maja’a. Pei kuasa ntuntu i mPue Allah taa maya rapunguka rante.
10Wali see naka aku buya rayangku mansabaraka samparia kasesa to aku mangarata see maya mangansawang samparia tau to mangaya, tau to napilis i mPue Allah darapalaes yako ri kuasa nu dosa apa saba sira mawali samba’a pei i Kerisitu Yesu. Pasi sira maya mangarata katuwu to bae kayawanya rataka ri singkasaenya.
11Wali monso pu’u gombo to manganto’o, “Ane kita roomo mate yau sindara-ndara pei i Kerisitu, kita seja datuwu sindara-ndara pei Ia.
12Pasi ane kita mangainsoka ri raya ngkasesa, kita seja damaporenta sindara-ndara pei Ia. Pei ane kita mamposapuka Ia, Ia seja damamposapuka kita.
13Nempo kita tamo maya rasarumaka, ane Ia, sangkani maya rasarumaka, apa Ia taa maya mangika anu to taa singkonong pei Ia.”
14Wali Timotius, patiendoka tau anu to kuto’o si’i. Pasi paposiaka sira ri tango i mPue Allah see sira ne’e masibanta resi tau mangkonong batuanginya gombo ntau. Apa masibanta tare batuanginya, pei ojo mampakaja’a pangaya ntau to mangandonge.
15Wali pakatao kojo see korom kono kojo anu to nupotundeka tau, etu semo anu to monso. Apa ane ewa see, korom masipato danabarong i mPue Allah. Pasi ane ewa see, korom tare to danupokea.
16Wali ne’e manganto’o gombo to taa singkonong pei i Pue Allah, apa tau to sangkani manganto’o gombo to taa singkonong pei i Pue Allah, sira kanjo’u-njo’u tiduga-dugang mangika lengko to taa singkonong pei Ia.
17Pasi gombo to ewa wetu raporapaka ewa baka to kanjo’u-njo’u tiduga-dugang kaparinya, apa gombo etu ojo mampakaja’a katuwu ntau boros. Wali dua tau to mampotundeka tau anu to ewa wetu, etu semo i Himeneus sira dua Piletus.
18Sira dua raporapaka ewa tau to masepi yau yako ri jaya to monso, apa sira manganto’o naliumo temponya tau rawangu muni yako ri kapatenya. Wali anu to nato’o nsira dua etu re’e mampakaja’a sangga’a pangaya ntau.
19Pei nempo ewa see, i Yesu Kerisitu tare pombaliNya. Ia raporapaka ewa pondasi to naika i mPue Allah maroso kojo. Wali pondasi etu mawali tondong to manganto’o, “I Pue mangansani tau to Ia Puenya.” Pasi tondong etu manganto’o seja, “I sema-sema tau to mampongakung mampue mampakabae i Pue, tau etu taa masipato ane mangika palaong to maja’a.”
20Wali aku rani manganto’o wo’u samba’a rapa. Wali rapanya ane ri raya banua to bae, re’e malagi yama. Re’e yama to raika yako weyawa pasi pera. Yama to etu rapake tempo re’e linggona to bose angganya. Pasi re’e seja yama to raika yako ri kaju pasi ri tana puyu. Yama to etu rapake eo eo.
21Wali kita to mangaya ane mangandolika tangonta yako ri gombo to taa singkonong pei i Pue Allah to aku room mampakanasa etu, kita ewa yama to rapake mampalinggona tau to bose angganya. Batuanginya kita mawali to papolaong to i Pue Allah Puenya, to bae batuanginya resi i Pue pasi to Ia maya mangampake mangika samparia palaong to matao.
22Wali ne’e mangalulu pamporani ndaya to biasa resi tau to mangurawa. Pei pakadota mangika lengko to singkonong pei i Pue Allah. Pakaroso pangayamu, porayang sa’e, pasi tuwu masingkatao pei samparia tau to makai-kai resi i Pue yako ri kabuya ndayanya.
23Wali re’e tau to rani kojo masibanta mangkonong anu to madoyo pasi to tare batuanginya. Pei ne’e korom mangika palaong to etu, apa yako palaong to etu semo damawali tingka ri oyo ntau.
24Pasi kita to papolaong i mPue, kita seja taa masipato ane batingka. Kasimbalinya yako etu, masipato kita mangika lengko to matao resi samparia tau. Pasi kita taa maya taa takoto mampotundeka tau, pasi pakabae sabaranta.
25Pasi ane re’e tau to mangewa kita, ne’e kita makasar mampotundeka sira. Anu kita matao raika mampotundeka sira see tuwu-tuwuja i Pue Allah damangawaika sira temponya majea pasi mangansani anu to monso.
26Apa ane ewa see, sira maya mampiyaika akal i Maja’a to room mangakal sira see naka sira mangaluluka yau pamporani to si ia.