Alkitab Mobile SABDA
[VER] : [TAA]     [PL]  [PB] 
 <<  2 Timotius 4 >> 

1Wali aku makai-kai see i Pue Allah pasi i Kerisitu Yesu damawali matamanasa mangkonong paposia to dakuto’oka korom si’i. I Kerisitu Yesu semo to damangabotus samparia to lino, to tuwuwa pasi to matem, tempo ngkama’iNya pasi tempo Ia mawali Makole ri lino. Wali Ia damawali matamanasa mangkonong paposiangku resi korom si’i.

2Etu semo, pakarebaka tuntu i mPue Allah. Pasi pakaroso rayamu pasi pakayoa see bara matao temponya bara taa matao temponya, korom nukurang mansaka mampakarebaka tau tuntu i mPue. Pakakonoka tau to taa kono pangayanya, seko tau to maja’a lengkonya, pasi paposiaka tau see sira mangaluluka i Pue. Pasi tempo korom mangika palaong to etu ne’e mosa mampakabae sabaramu pasi mampotundeka tau.

3Apa darata temponya tau tamo rani damampodongeka tau to mampotundeka sira anu to monso. Sira ojo damangaliwu pasi mamporomung boros tau to damampotundeka anu to matao nadonge nsira, pasi to singkonong pei pamporani ndaya nsira.

4Wali sira bo’onya damampodongeka anu to monso, pei sira damangandolika tangonya resi tau to mampotundeka sira sarita-sarita to taa monso.

5Pei ane korom, Timotius, jagai kojo koromu ngkalio pasi insoka mangarata kasesa. Ika seja palaong to naika ntau to mampakarebaka kareba matao. Pasi pasilonga samparia palaong to nawaika i mPue korom.

6Naka pei aku manganto’oka korom paposia etu apa daratamo temponya aku dapolas ri lino si’i. Aku darapopate yau, wali tempo aku darapopate etu, kapatengku etu aku mampasiwajuka ewa pampue to kupampueka resi i Pue Allah.

7Wali aku matao kojo nangika mampasilonga palaong to nawaika i mPue Allah aku. Ewa naika ntau to matilumba rata ri ungka mpatilumbanya etu, ewa see seja aku naratamo ri ungka mpalaongingku. Pasi pangayangku resi i Pue tare pombalinya.

8Wali si’i-si’i re’e dalengku to mangampeas aku ndate saruga. Dale etu raporapaka ewa so’o mbo’o to meyawa to darawaika tau to singkonong pei i Pue Allah. Wali dale to etu danawaika i mPue aku ri temponya darapangabotus. I Pue Ia to pobotus to sangkani mangika ewa to Ia room manganto’o, pasi Ia semo to damangawaika aku dale etu. Pei si’a ojo aku to damangarata dale etu, samparia tau to mawongko rayanya mangampeas kama’i i mPue paka damangarata seja dale etu.

9O Timotius, pakagasi imba pata mpangkurang mangampago aku,

10apa i Demas room mampiyaika yau aku saba ia mamporayang katuwunya ri lino si’i. Wali ia nayaumo njo’u kota Tesalonika. Pasi i Kreskes ia nayaumo njo’u propinsi Galatia pasi i Titus nayaumo njo’u Dalmatia.

11Wali jamo i Lukas to re’iwa resi aku. Wali tempo korom ma’i, liu ruyu resi i Markus pei keni mai seja ia apa ia maya mangansawang aku ri raya mpalaongingku.

12Pasi tempo korom ma’i, keni seja bajungku to makumba to sombongku seore resi i Karpus nja’u Troas. Pasi keni seja buku-bukungku to rayuyu, taa manto’o buku-buku to raika yako pela nu binatang. Ane i Tikhikus, aku room mampokau ia yau njo’u Epesus.

13(4:12)

14Wali ane mangkonong i Aleksander to pande mampasilonga tembaga, ia boros palaong to maja’a inikanya mampoja’a aku. Wali i Pue damangawaika ia huku to singkonong pei palaonginya etu.

15Pei tabe kojo ia, apa ia mangewa kojo kareba to kita mampakarebaka.

16Wali tempo aku rabotus seore, tempo aku uyunya manganto’o notongku, tempo etu tare tau to mampasimbalika aku. Samparia tau paka mampiyaika yau aku. Wali aku mamporapika resi i Pue Allah naka ne’e Ia mangkitanaka palaong nsira etu.

17Pei nempo tare tau to mampasimbalika aku, i Pue re’e ri awengku. Ia mampakaroso rayangku see aku gana karosongku mampakarebaka samparia kareba matao, see samparia tau to si’a to Yahudi maya mangandonge. Pasi Ia mangalapa aku yako ri kuasa ngkepala measa to raporapaka ewa singa.

18Wali Ia damangalapa seja aku yako samparia anu to maja’a. Pasi Ia damampalaes aku see aku damasua ri raya ngkasanang ndate saruga. Ndate ria Ia semo Makole. Wali anu kita mangabarong Ia rataka ri singkasaenya. Amin.

19Wali to’oka i Priska sira dua i Akwila pasi samparia tau to maroo ri banua Onesiporus, aku taa mangkalingan sira.

20I Erastus nja’uwa nja’u kota Korintus, pasi i Tropimus sombongku nja’u Miletus apa ia masaki.

21Wali pakagasi imba pata mpangkurang ngkorom see darata rire ri katawanya temponya loto. Wali i Ebulus, i Pudes, i Linus, i Klaudia pasi samparia pua’i anu samba’a pangaya rire, sira rani aku manganto’oka korom sira taa mangkalingan korom.

22Wali aku mamporapika resi i Pue see Ia siwaka pei toniimu. Pasi aku mamporapika seja see Ia damampaponsanika korom kanotoNya. Ungkanyamo ruyu gombo si’i.


  Share Facebook  |  Share Twitter

Download Audio MP3 (2 Timotius 4):
Mobile (Low Quality) - CD (High Quality)

 <<  2 Timotius 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran