Alkitab Mobile SABDA
[VER] : [TAA]     [PL]  [PB] 
 <<  Efesus 1 >> 

1Sura si’i yako resi aku, i Paulus. Aku mawali pomakau i ngKerisitu Yesu apa etu semo pamporani i mPue Allah resi aku. Wali aku mangantulis sura si’i resi komi to i Pue Allah Puenya to nja’u Epesus, pei to mansarumaka kojo i Kerisitu Yesu.

2Wali aku makai-kai see i Pue Allah, Pa’a ngkita, pasi i Pue Yesu Kerisitu, damampaponsanika komi kanotoNya pasi mangawaika komi karodo ndaya.

3Wali anu kita mangabarong i Pue Allah, etu semo Allah pasi Pa’a i Yesu Kerisitu, Pue ngkita. Apa Ia mangawaika tonii ngkita rasi. Ia mangawaika kita songonya samparia ngaya nu rasi yako ri raya nsaruga, saba kamonsonya kita tau nsaruga apa kita samba’a pei i Kerisitu.

4Wali samparia rasi to roomo nawaika i mPue Allah kita etu, singkonong kojo pei pamporani to si Ia yako ri tempo Ia tawa nangampapowali lino si’i. Wali pobuuka to roomo naika i mPue Allah. Re’e katawanya Ia mampapowali lino, tempo etu Ia room mangampilis kita see damawali samba’a pei i Kerisitu. Wali see naka kita rapilis seja mawali tau to i Pue Allah Puenya, pasi Ia manganto’o kita tare salanta. Ia mangamporayang kita, see naka Ia re’e yami songkaNya damangampilis kita damawali anaNya. Wali Ia mangabanangimo songkaNya etu. Wali kita nawalimo anaNya apa saba yako palaong to naika i Yesu Kerisitu. Etu semo pamporani i mPue Allah to mampakasanang kojo Ia.

5(1:4)

6Wali masipato kita mangabarong i Pue Allah, apa bae kojo kanotoNya to buya rayaNya mangawaika kita apa saba kita samba’a pei AnaNya anu naporayang kojo.

7Apa AnaNya, i Yesu Kerisitu, roomo mangoli yau kita see kita tamo damangarata huku nu dosa. Pasi raaNya tempo Ia mate ri kaju pasape, raaNya etu semo to Ia mangampake mangoli yau kita. Wali see naka dosa ngkita tamo nakitanaka i mPue Allah. Wali yako palaong etu miyala bae kojo kanoto i mPue Allah resi kita.

8Pasi kanotoNya resi kita tare pandoonya. Yako kanotoNya etu Ia mangawaika kita samparia kapande see kita maya manasa

9mangkonong songkaNya to tawa nansani ntau tempo ruyu. Wali songka i mPue Allah etu Ia semo to nangika yako ri kabuya ndayaNya, pasi Ia semo to mangabanang songkaNya etu mangampake i Kerisitu.

10Wali songka i mPue Allah, etu semo ane ratamo temponya to room napakatantu, Ia damampasiromunaka samparia anu to re’e ndate saruga pasi to re’e ri lino. Pasi samparia anu to rapasiromunaka etu paka i Kerisitu, Makole parajanji i mPue Allah, damangkuasang.

11Wali samparia palaong to mawali, paka yako songka i mPue Allah naka pei mawali, mangalulu ewa wimba pamporani to si Ia. Pasi yako songka i mPue Allah to Ia mangansongka yami mangkonong kita, see naka Ia mangampilis kita mawali tau to Ia puenya apa saba kita samba’a pei i Kerisitu.

12Naka pei Ia mangika ewa wetu see kami, to uyunya mansarumaka i Kerisitu, damangabarong kayawaNya.

13Pasi komi seja damangabarong kayawaNya apa komi re’e seja mangandonge kareba to monso, etu semo kareba matao to mangampalaes komi. Panewa yako etu komi mansarumaka seja i Kerisitu. Wali tempo komi mangaya, tempo etu i Pue Allah mangawaika komi i Nosa Mapasing anu to naparajanjika tempo owi. Wali i Nosa Mapasing mawali tondong ri raya ngkomi mampakanasa komi seja i Pue Allah Puenya.

14Pasi i Nosa Mapasing maroo ri raya ngkita samparia to mangaya. I Nosa Mapasing etu nawaika ruyu i mPue Allah kita damawali tondong to mampakanasaka resi kita matantu kojo kita damangarata seja samparia to yusa to naparajanjika i mPue Allah tau to Ia Puenya. Wali i Nosa Mapasing damampakatantuka kita mangkonong anu to danawaika i mPue Allah kita etu rataka ri temponya kita, to naoli i mPue Allah mawali Ia Puenya, daralapa yako ri lino si’i. Wali samparia palaong to naika i mPue Allah etu Ia mangika see kita mangabarong kayawaNya.

15Wali see naka aku tare pandoonya manganto’oka i Pue Allah tarima matao apa saba komi. Yako ri tempo aku mangandonge kareba mangkonong pangaya ngkomi resi i Pue Yesu pasi mangkonong pamporayang ngkomi resi tau to i Pue Allah Puenya, aku taa mangkalingan mampokaika komi.

16(1:15)

17Aku makai-kai resi Pa’a ngkita anu masipato rabarong apa saba kuasaNya pasi kayawaNya, etu semo Allah i Yesu Kerisitu, Pue ngkita. Wali aku mamporapika resi Ia see yako kuasa i Nosa Mapasing Ia mangawaika komi kapande pasi mampakanasaka komi mangkonong Ia see komi mangansani kojo Ia.

18Ewa wetu pokai-kaingku see i Pue Allah damampakanasaka ri raya ngkomi see komi nukurang mangansani anu to nasarumaka ngkita kita damangarata apa saba Ia room mampokio kita. Pasi aku mamporapika see komi mangansani tila to danarata ntau to i Pue Allah Puenya, tilanya etu bae kojo kayawanya.

19Pasi aku mamporapika seja resi Pa’a ngkita see komi mangansani ewa wimba kabaenya kuasa i mPue Allah to mangansawang kita to mangaya. KuasaNya to mangansawang kita etu taa kojo rapobiasa pasi bae kojo. Kuasa to Ia mangampake mangansawang kita etu sewaju ewa kuasa

20to Ia mangampake resi i Kerisitu tempo mangawangu muni Ia yako ri kapateNya, pasi tempo mampapotunda Ia ri aweNya ri sambali tondo ngkana ndate saruga.

21Pasi i Kerisitu nawaika i mPue Allah kuasa to bae kojo wali Ia semo mangkuasang samparia makole pasi samparia pomarenta, pasi samparia to re’e kuasanya pasi samparia pue. Pasi angga to rawaika resi i Kerisitu, angga etu to bae-bae pei angga to rawaika resi tau ri lino si’i pasi ri lino to darata.

22Wali samparia anu to re’e, i Pue Allah mangawaika i Kerisitu mangkuasang. Pasi Ia to nawaika i mPue Allah kuasa etu, Ia semo to napilis i mPue Allah mangkapalang samparia kita to mangaya to rato’oka tauNya.

23Kita to mangaya rato’oka koro i ngKerisitu. Wali ane ewa koro ntau, taa saga ane ojo wo’o pei tare koronya. Pasi ewa see seja kita to mangaya, kita semo to rato’oka koro i ngKerisitu anu to mampakagana Ia. Ri kapuranya, Ia semo to mampakagana kojo samparia anu to re’e. Wali etu semo kuasaNya to bae kojo to aku mamporapika resi i Pue Allah see komi damangansani.


  Share Facebook  |  Share Twitter

Download Audio MP3 (Efesus 1):
Mobile (Low Quality) - CD (High Quality)

 <<  Efesus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel