Dual Panel1Wali pobuuka kuasa i mPue Allah to mangansawang komi tempo ruyu. Tempo etu, tempo komi tawa mangaya, komi ewa tau mate. Tempo etu komi tawa mangarata katuwu to yako resi i Pue Allah apa saba dosa pasi lengko ngkomi to maja’a.
2Lengko ngkomi tempo etu ojo mangaluluka yau lengko nto lino anu to maja’a. Pasi tempo etu komi mangampolaika i Kepala Measa. I Kepala Measa ia matunda ri rao, wali yako ri rao etu ia mangamporentang raya ntau samparia to taa mampolaika i Pue Allah.
3Wali tempo kita tawa mangaya, tempo etu kita samparia sewaju pei tau to taa mampolaika i Pue Allah etu. Apa tempo etu kita seja ojo mangaluluka yau pampobuuka ngkita to masae. Pasi kesaa to mampakasanang koro ngkita pasi pampobuuka ngkita, etu semo to kita mangika. Wali tempo etu kita masipato nahuku i mPue Allah sewaju pei tau to yusa, apa saba lengko ngkita to maja’a etu.
4Pei i Pue Allah bae kojo kanotoNya resi kita pasi Ia mamporayang kojo kita.
5Wali see naka tempo kita tiroo ewa tau matemo apa saba dosa, tempo etu semo i Pue Allah mangika jaya see kita mawali samba’a pei i Kerisitu, see naka kita mangarata katuwu. Wali yako kanoto i mPue Allah semo naka pei komi seja rapalaes.
6Pasi apa saba kita samba’a pei i Kerisitu, see naka kita seja nawangu muni i mPue Allah yako ri kapatenta sindara-ndara pei Ia. Pasi see naka kita nawaika i mPue Allah tampa rapotunda sindarandara pei i Kerisitu ndate saruga.
7Wali naka pei i Pue Allah mangika palaong to etu see ane ri tempo to darata Ia maya mampapokitaka samparia to lino pasi pomakauNya ndate saruga ewa wimba kabaenya kanotoNya resi kita. Bae kojo kanotoNya etu. Ia mamporayang kojo kita apa saba kita samba’a pei i Kerisitu Yesu.
8Wali yako kanoto i mPue Allah semo naka pei komi seja rapalaes apa saba komi mangaya i Kerisitu. Wali si’a yako palaong ngkomi naka pei komi rapalaes. Sora i mPue Allah semo naka pei komi rapalaes.
9Wali si’a yako palaong ngkita naka pei kita rapalaes, see naka tare tau to maya tabaro.
10Apa kita napapowali i mPue Allah damawali tau to bou. Apa kita samba’a pei i Kerisitu Yesu, see naka i Pue Allah mampapowali kita mawali tau to bou. Naka pei Ia mangika palaong to etu see kita maya mangika palaong to matao to napasigenaka yami i mPue Allah kita.
11Wali komi to yako ri pampoanaka si’a to Yahudi, pobuuka ruyu katuwu ngkomi tempo tawa mangaya. Tempo etu to Yahudi mampokore komi, sira manganto’oka komi “tau to taa rasui”. Sira mampobuuka naka pei sira rato’oka tau i mPue Allah apa saba sira rasui. (Pei kamonsonya rasui etu ojo palaong to naika nto lino ri woto ngkoronya.)
12Pei pobuuka katuwu ngkomi tempo etu. Ane tempo etu komi tawa samba’a pei i Kerisitu. Komi tempo etu ewa tau to rata ri lipu nsa’e pasi tare tila ngkomi ri parajanji anu to naparajanjika i mPue Allah to Israel, apa komi si’a to Israel. Wali tempo etu katuwu ngkomi ri lino si’i tare kesaa to masipato rasarumaka pasi komi taa mangansani i Pue Allah.
13Wali tempo etu komi longko yako resi i Pue Allah. Pei tempo si’i komi samba’a pei i Kerisitu Yesu, apa raa i ngKerisitu to masuwu tempo ia mate ri kaju pasape raaNya etu mampakamosu komi pei i Pue Allah.
14Apa i Kerisitu semo to mampasimba’a kami to Yahudi pasi komi to si’a to Yahudi, wali si’i-si’i kita masingkatao. Apa Ia mangawaika koroNya mate ri kaju pasape. Ewa wetu inikaNya mampakapura kuasa mporenta i Musa to manganto’oka to Yahudi kesaa pura to daraika pasi to taa daraika. Tempo ruyu, porenta i Musa etu ewa rindi to mangangoyot kami to Yahudi pasi komi to si’a to Yahudi, see naka kita masimusu. Pasi tempo etu kita dua suku, pei si’i-si’i kita roomo rapasimba’a apa kita samba’a pei i Kerisitu. Wali etu semo sabanya naka pei i Kerisitu mate ri kaju pasape. Ia mate see kami to Yahudi pasi komi to si’a to Yahudi tamo masimusu, pei maya masingkatao apa saba napasimba’a i ngKerisitu. Pasi Ia mate see kita to lino to rapasimba’a etu maya masingkatao pei i Pue Allah saba yako palaong to inikaNya.
15(2:14)
16(2:14)
17Wali i Kerisitu nama’i ri lino si’i mampakarebaka kareba mangkonong ewa wimba kita damasingkatao. Kareba etu Ia mangkenika komi to si’a to Yahudi anu to longko yako resi i Pue Allah, pasi Ia mangkenika seja resi kami to Yahudi anu to mosu pei i Pue Allah.
18Apa yako to naika i ngKerisitu mampansaruka kita, see naka kita samparia maya mampotango i Pue Allah, Pa’a. Pasi kita samparia mampotango Ia paka yako ri kuasa i Nosa Mapasing anu to samba’aja etu.
19Wali komi to si’a to Yahudi, tempo ruyu komi ewa tau to owo rata yako ri lipu to yusa. Pei saba to naika i ngKerisitu etu, si’amo ewa see. Si’isi’i komi mawali tau to samba’a lipu pei tau to i Pue Allah Puenya. Pasi komi seja mawali tau to samba’a banua pei i Pue Allah.
20Wali kita to mangaya raporapaka ewa banua to rawangu. Wali pondasi nu banua etu, etu semo pomakau i mPue Yesu pasi to pantuntu tuntu i mPue Allah. Pasi ri pondasi nu banua etu, i Kerisitu Yesu semo to ewa watu tundasi banua to uyunya raposaka.
21Wali kita to samba’a pei i Kerisitu, kita ewa watu pasi kaju to rawangu singkonong pei watu to tundasinya etu, panewa mawali banua to mapasing apa saba samba’a pei i Pue.
22Wali batuanginya komi to si’a to Yahudi seja rapasimba’a pei i Kerisitu wali komi seja saga banua. Komi rawangu sindara-ndara pei samparia tau to mangaya to yusa damawali banua to nakaroo i mPue Allah. Wali kita maya manganto’o etu banua to nakaroo i mPue Allah, apa i Nosa Mapasing re’e maroo nja’u ria, ri raya ngkita to mangaya.