Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 12 >> 

1Wali tempo etu seja, i Makole Herodes mula mangansesai sawei mba’a yako ri tau to mangaya i Pue Yesu to siromu ri Yerusalem.

2Ia mampokauka tau mangampu’ak yau wo’o i Yakobus tukaka i Yohanes.

3Palaong to nikanya etu mampakasanang kojo raya nto Yahudi. Wali tempo i Herodes mangkita masanang raya nto Yahudi ane ia mangika palaong to ewa wetu, ia damangika wo’u to ewa see. Wali see naka ia manganto’oka wo’u tau mangansoko i Petrus. Palaong etu mawali kono kojo tempo roa to danapangangkoni nto Yahudi roti to tare raginya.

4Wali i Petrus nasoko ntau panewa ia raposaka ri raya ntarungku. Tempo ia ri raya ntarungku etu i Herodes mampokauka tentara sampuyu pei ono mba’a masibolos mangajagai ia. Tentara etu opo opo sangkani mangajagai. Wali pampobuuka i Herodes ojo karoonya Roa Paskah i Petrus darakeni ri tango ntau boros darabotus pasi rahuku.

5Wali i Petrus rata’amaka nja’u tarungku etu. Pei tau to mangaya i Pue Yesu to nja’u kota etu sira tare pandoonya makai-kai resi i Pue Allah mampokaika i Petrus.

6Wali re’e samburi ri katawanya i Petrus rakeni darahuku, ia yore yau maturu ri oyo ntentara dua mba’a pasi ia rapunguka rante dua mbiyaa. Pasi re’e seja tentara to mangajagai wombo ntarungku etu. Songka i Herodes ri wuri etu ane eo rao i Petrus darakeni ri tango ntau boros.

7Pei ri raya mburi etu, kodi majoli rata samba’a pomakau i mPue Allah yako ri saruga pei makore ri awe i mPetrus. Pasi re’e seja reme to mangansindo songi etu. Yako etu pomakau etu mangantobe i Petrus ia damangalike, ia manganto’o, “Pambangu nakajoli.” Wali ri tempo etu semo rante pungunya etu tilapa yau yako ri pale i mPetrus.

8Panewa pomakau manganto’oka wo’u i Petrus, to’onya, “Pakaintika muni salipimu pasi pasunsuka muni sandalemu.” Wali i Petrus mampalaika gombonya etu. Roo see pomakau etu manganto’oka wo’u, “Pasunsuka bajumu to makumba pei lulu aku.

9Wali i Petrus mangalulu pomakau etu. Pei ia taa manasanya palaong to naika mpomakau etu monso pu’u mawali. Ia ojo mampobuuka ia mangangkita pangkitanya.

10Wali sira dua mangaliunaka tentara to mangajagai wombo to uyunya pasi to kadua, panewa rata nja’u wombo wubu, wombo to damasua ri raya ngkota. Pei wombo etu tiloka ngkalionya, wali sira dua masuwu muni yako ri raya ntarungku etu pei polas-polas mangalulu jaya. Ojo karata nsira dua ri tompo njaya etu, kodi majoli pomakau i mPue Allah mangampiyaika i Petrus.

11Wali roo see panewa i Petrus manasanya palaong etu monso pu’u mawali. Wali ia manganto’o, “Monso-monso i Pue nangampokau pomakaunya ma’i mangalapa muni aku yako ri kuasa i Herodes pasi yako samparia palaong to naporani nto Yahudi mangika resi aku.”

12Wali ojo karoonya i Petrus mampobuuka ewa wetu, ia mangampago banua i Maria. I Maria etu ia indo i Yohanes to rato’oka seja i Markus. Wali nja’u banua i Maria etu, boros tau to siromu makai-kai.

13Wali ojo karata i mPetrus ri tango banua etu, ia mangadedek wombo. Tempo ia mangadedek etu, ma’i samba’a tau we’a to papolaong ntau pue banua etu, sanganya i Rode. Tau we’a etu ma’i mangalo’a bara sema to mangadedek wombo etu, wali i Petrus mampogomboka ia.

14Tempo i Rode mangandonge loonya etu, ia mangansani loo i mPetrus semo, wali ia ndende kojo rayanya see naka ia mangkalingan mangangua wombo. Ia mansaka maripo yau resi yununya pei manganto’oka sira, “I Petrus re’e ri sambali mbombo.”

15Wali tempo yununya mangandonge gombonya etu sira manganto’oka ia, “Wando korom!” Pei i Rode maroso wo’u manganto’o, “Gete, monso pu’u!” Wali sira manganto’o, “Si’a i Petrus, pomakau i mPue Allah to pangkampang i mPetrus.”

16Wali ri rayanya sira magombo-gombo etu i Petrus tare pandoonya mangandedek wombo. Wali sira yau mangua wombo etu panewa mangkita monso pu’u i Petrus, wali sira ipu kojo rayanya.

17Yako etu i Petrus mangokotaka palenya, batuanginya see tau boros etu damaroti, panewa ia mangansaritaka sira mangkonong ewa wimba naika i mPue mangkeni muni ia yako ri raya ntarungku. Pasi ia seja manganto’oka sira, “Paponsanika seja i Yakobus pasi pua’i ngkita to yusa mangkonong palaong to mawali si’i.” Wali ojo karoonya ia mampogomboka sira etu, ia mayoko dayau wo’u njo’u lipu to yusa.

18Wali yako etu, ojo kaeonya rao, masusa kojo raya ntentara to mangajagai tarungku etu. Sira manganto’o, “Gete tamo re’i i Petrus! Kesaa nawali resi ia?”

19Wali i Herodes mampokauka tau yau mangaliwu i Petrus, panewa tau etu yau mangaliwu pei sira taa mangarata. Wali see naka i Herodes mampotanaka tentara to nangajagai tarungku mburi, to’onya, “Wimba naika ntau etu miyai tempo komi mangajagang ia?” Pei sira taa nakoto mampakanasa mangkonong palaong etu. Wali i Herodes mampokauka tau mampopate yau tentara etu apa etu semo huku to biasa narata nto panjaga ane tau mawali miyai tempo sira mangajagai ia Wali yako etu i Herodes mayoko yako ri propinsi Yudea yau damaroo-roo la’u kota Kaisarea.

20Wali tempo i Herodes maroo-roo la’u Kaisarea, ia mawali maja’a kojo rayanya resi tau nja’u kota Tirus pasi Sidon. Wali see naka tau yako ri kota dua etu sira yau sindara-ndara damampotango ia. Naka pei sira rani mampotango ia apa mangaliwu jaya see ia masingkatao muni pei sira. Sira rani kojo masingkatao muni apa tau ri tana nsira biasa mangarata pangkoninya yako ri tana to naporentang i Herodes. Wali sira yau ruyu mangamomis to papolaong to mampasilonga banua i Herodes, sanga ntau etu i Blastus. I Blastus etu mampasimbalika sira, panewa sira maya mampotango i Herodes. Wali i Herodes manganto’o ia damagombo resi sira.

21Wali yako etu ratamo eonya to roomo napakatantuka i Herodes sira damampotango ia. Ri eo etu i Herodes mamposunsuka bajunya to magaya kojo to tondong kuasanya. Panewa ia matunda ri gadera to tondong kuasanya seja. Roo see ia mampogomboka tau boros etu.

22Wali tempo ia magombo etu tau boros sira sakaboo manganto’o, “Si’amo loo nto lino etu, loo mpue semo!”

23Ojo panto’o ntau boros gombo to etu, pomakau i mPue Allah yako ri saruga mansaka mangahuku i Herodes. Ia mangawaika i Herodes panyaki to mapari kojo apa i Herodes taa mangabarong i Pue Allah pei ojo mangabiaka tau boros etu manganto’o ia semo pue. Wali i Herodes ia mate nakoni yau ndaido.

24Wali yako etu kanjo’u-njo’u kaboro-boros tau to mangandonge tuntu i mPue Allah.

25Wali tempo etu i Barnabas sira dua i Saulus mangawaika resi tau to mangaya nda’a Yerusalem doi to napokatu nu yunu nsira ri kota Antiokhia, panewa yako etu sira dua mawolili muni lo’u kota Antokhia. Tempo sira mawolili muni, sira mangkeni seja i Yohanes to rato’oka Markus.


  Share Facebook  |  Share Twitter

Download Audio MP3 (Kisah Para Rasul 12):
Mobile (Low Quality) - CD (High Quality)

 <<  Kisah Para Rasul 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran