Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 18 >> 

1Wali yako etu i Paulus meyoko yako kota Atena yau wo’u njo’u kota Korintus.

2Ojo karatanya nja’u kota etu ia mangarata samba’a to Yahudi to sanganya i Akwila. Ngkai etu rapoanaka ri tana Pontus, roo see ia maroo ri tana Italia. Wali i Akwila sira dua rongonya, i Priskila, sira owo rata ri Korintus yako nja’u tana Italia. Sabanya naka pei sira dua malimba yako nja’u Italia apa mampiyaika porenta i ngKlaudius, makole nto Roma. Makole etu roomo manganto’oka samparia to Yahudi piyai yako ri kota Roma ri tana Italia etu. Wali i Paulus mampago nja’u banua i Akwila pei Priskila etu.

3Ia maroo nja’u banua nsira dua apa palaong to si ia sewaju pei palaong nsira. Sira paka to panjau tenda. Wali sira mapalaong sindara-ndara.

4Wali tempo i Paulus nja’u nja’u kota etu, ponto Eo Rapandoo ia yau njo’u banua to napampotunde nto Yahudi. Nja’u ria ia magombogombo resi to Yahudi pasi tau to si’a to Yahudi mampakanasaka sira mangkonong pampobuuka to si ia see sira bara damangaya seja. Pasi sira manganto’oka seja i Paulus pampobuuka to si sira.

5Wali yako etu ratamo i Silas sira dua i Timotius, ma’i yako ri Makedonia. Tempo sira dua rata etu, i Paulus tamo mangika palaong to yusa kasimbalinya yako mampakarebaka tau tuntu i mPue Allah. Ia manganto’oka to Yahudi mangkonong i Yesu, Ia semo i Kerisitu, Makole parajanji i mPue Allah.

6Pei to Yahudi etu sira mangewa pasi manto’o maja’a ia, wali i Paulus mantantamaka awu ntana to re’e ri pakenya mangika tondong ia taa kojo singkonong pei sira. Ia manganto’oka sira, “Ane komi mangarata huku si’a salangku, sala ngkomi semo. Wali yako tempo si’i aku dayau damampakarebaka kareba matao resi tau to si’a to Yahudi.”

7Wali ojo karoonya i Paulus magombo etu ia masuwu muni yako ri banua to napampotunde nto Yahudi pei yau maroo ri banua to ri awenya. Banua etu puenya tau to si’a to Yahudi pei ia mampue mampakabae i Pue Allah. Tau etu sanganya i Titius Yustus.

8Pasi tau to mampasilonga banua to napampotunde nto Yahudi, sanganya i Krispus, ia mangaya seja i Pue pasi samparia tau to maroo ri banuanya paka mangaya seja. Pasi boros wo’u to Korintus to re’e mampodongeka gombo i mPaulus, sira mangaya seja pasi rabaptis.

9Wali re’e sambengi i Paulus ia re’e mangkita pangkitanya. Ri raya mpangkitanya etu i Pue mampogomboka ia, Ia manganto’o, “Ne’e meka resi tau ri kota si’i. Pakarebaka sira tuntungKu pasi ne’e rapandooka.

10Apa boros tau ri kota si’i to damawali Aku puenya. Wali tare pasi samba’a tau to damampakaja’a korom, apa Aku re’e siwaka pei korom.” Ewa see gombo i mPue resi i Paulus.

11Wali see naka i Paulus santo’u pei ono mbuya kasaenya maroo-roo ri kota etu, mampakarebaka resi tau nja’u ria tuntu i mPue Allah.

12Pei tempo i Galio mawali gubernur ri propinsi Akhaya, tempo etu boros to Yahudi to samba’a pampobuukanya yau mangansoko i Paulus. Sira mangkeni ia darabotus ri tango gubernur etu.

13Sira manganto’oka i gubernur, “Tau si’i mampakaroso kojo raya ntau mampue mampakabae i Pue Allah pei jaya nsira mampue mampakabae Ia taa singkonong pei porenta i Musa.”

14Wali ojo karoonya sira magombo, i Paulus damagombo damanganto’o notonya, pei ri katawanya ia magombo etu, gubernur Galio manganto’oka to Yahudi etu, to’onya, “Gete komi to Yahudi! Ane bara palaong to sala bara kara-kara to naika ngkai si’i, masipato aku mampodongeka komi.

15Pei to nato’o ngkomi etu ojo masibanta mangkonong gombo pasi mangkonong sanga ntau, pasi mangkonong porenta ngkomi. Wali komija mangabotus palaong to ewa wetu, aku bo’ongku.”

16Wali ojo karoonya i Galio magombo etu ia mampokauka to papolaonginya mangarubak sira yako ri tampa rapangabotus etu.

17Wali yako etu sira samparia mangansoko tau to mampasilonga banua napampotunde nto Yahudi. Ngkai etu sanganya i Sostenes. Sira mangantidas ia nja’u tango ntampa pangabotus etu, pei i Galio taa kojo mangalinga palaong etu.

18Wali yako etu i Paulus tiroowa masae sangkodi maroo-roo nja’u kota Korintus, panewa roo see ia masimang resi pua’inya to samba’a pangaya nja’u ria apa ia dayau njo’u propinsi Siria sindara-ndara pei i Priskila sira dua i Akwila. Wali sira togo meyoko yako Korintus mampago ruyu kota Kengkrea to la’u wii ntasi. Rata la’u ria i Paulus rapu’ak yau wayuanya mangika tondong ia roomo mampakagana nia to nikanya resi i Pue Allah seore. Wali yako etu sira togo mapone ri bangka pei malayag yau njo’u propinsi Siria.

19Wali ri raya mpalayag etu, sira liu mandoo ri kota Epesus. Nja’u ria i Paulus yau njo’u banua to napampotunde nto Yahudi. Ia magombo-gombo resi to Yahudi to siromu nja’u ria mampakanasaka sira mangkonong pampobuuka to si ia. Pasi sira manganto’oka seja ia pampobuuka to si sira. Sira mamporapika resi ia see ia damaroo-roo masae sangkodi ri lipu nsira, pei ia taa rani. Pei tempo ia mampiyaika sira ia manganto’o, “Ane i Pue Allah damangawaika, tempo yusa aku dama’i muni resi komi.” Wali yako etu i Paulus mapone wo’u ri bangka pei malayag wo’u dapolas njo’u propinsi Siria. Pei i Priskila sira dua i Akwila taa yau. Sira dua maroo ri kota Epesus etu.

20(18:19)

21(18:19)

22Wali ojo kadongka i mPaulus nja’u kota Kaisaria ri propinsi Siria etu, ia mana’u yako ri bangka panewa malinja mbiti yau ndeku kota Yerusalem. Rata nda’a Yerusalem etu ia mampogomboka tau to mangaya to siromu nda’a ria, panewa ia meyoko wo’u yau lo’u kota Antiokhia.

23Rata la’u ria ia marooroo masae sangkodi panewa meyoko wo’u yau njo’u propinsi Galatia pasi Prigia. Ia mangalinjak propinsi etu pasi ponto lipu ntau to nakarata nja’u ria ia mampakaroso raya nu anaguru i mPue Yesu.

24Wali ri tempo etu seja re’e samba’a to Yahudi to yako kota Aleksandria to rata nja’u kota Epesus. Ngkai etu sanganya i Apolos. Ia pande kojo magombo pasi ia mangansani kojo anu to ratulis ri raya ntuntu i mPue.

25Ia room napotundeka ntau mangkonong palaong to naika i mPue, pasi ia masanang kojo rayanya magombo mampotundeka tau mangkonong i Yesu apa sarita etu bae batuanginya resi ia. Kamonsonya ia tawa manasa kojo mangkonong i Yesu, ia owo mangansani anu to nato’o i Yohanes to Pombaptis mangkonong pombaptis. Pei nempo ewa see, tempo ia mampotunde etu, kono kojo anu to napotunde.

26Wali i Apolos etu ia mula seja mampogomboka tau ri raya banua to napampotunde nto Yahudi, pasi ia taa meka rayanya tempo mampogomboka tau etu. Wali ojo pangandonge i mPriskila sira dua i Akwila gombonya etu, sira mangansale ia yau njo’u banuanya. Rata nja’u ria sira dua mampakanasaka wo’u ia see ia mangansani wo’u mangkonong palaong to naika i mPue Allah.

27Wali yako etu i Apolos rani yau njo’u propinsi Akhaya. Wali see naka pua’inya to samba’a pangaya sira mampakaroso raya i Apolos pasi sira mangantulisika anaguru i mPue Yesu ri Akhaya sura see ane ratamo i Apolos nja’u ria sira damasanang mangantima ia. Wali i Apolos meyoko mangampago propinsi Akhaya etu. Tempo ia rata nja’u ria, ia mangansawang kojo tau to mangaya i Pue Yesu yako ri kanoto i mPue Allah.

28Apa ia maroso kojo naika mangabanta gombo nto Yahudi, pasi manganangi sira ri tango ntau boros. Ia mangabanta sira mangabasaka sira tuntu i mPue Allah panewa yako ri tuntu i mPue to nabasa etu, ia mampakanasaka sira i Yesu Ia semo i Kerisitu, Makole parajanji i mPue Allah.


  Share Facebook  |  Share Twitter

Download Audio MP3 (Kisah Para Rasul 18):
Mobile (Low Quality) - CD (High Quality)

 <<  Kisah Para Rasul 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel