Alkitab Mobile SABDA
[VER] : [TAA]     [PL]  [PB] 
 <<  Lukas 14 >> 

1Wali re’e seore ri Eo Rapandoo i Yesu yau damangkoni ri banua nsamba’a kepala nto Yahudi to aliran Parisi. Rata nja’u ria, re’e tau to mangalo’aka kojo samparia to inikaNya.

2Wali tempo etu Ia mangkita samba’a ngkai ri tangoNya to masaki, see naka kombo yau witinya pasi langolenya.

3Wali i Yesu mampotanaka resi to Yahudi to aliran Parisi pasi tau to pande mangkonong porenta i Musa, Ia manganto’o, “Wimba, ane ewa porenta i Musa, bara matao ane mampakatao muni tau ri Eo Rapandoo, bara taa?”

4Pei sira taa mangansono, sira ojo maroti. Wali i Yesu mangkongko tau masaki etu pei mampakatao muni ia panewa manganto’oka ia, “Intamo.”

5Yako etu Ia mampotanaka resi sira, Ia manganto’o, “Wimba, rapanya samba’a komi re’e anamu bara sapimu to masou lo’u raya mbayau ri Eo Rapandoo, kesaa danuika ngkomi? Gete, komi mansaka damangoko muni ia yako la’u ria nempo Eo Rapandoo!”

6Wali sira tare to maya nato’o nsira damangansono gomboNya etu.

7Wali roo see i Yesu mangkita linggona to yusa ri banua ntau Parisi etu, re’e sira to mangampilis gadera to napangampapotunda ntau tau to bose angganya. Wali see naka Ia mangampake palaong to etu ewa rapa pei mampaposiaka sira samparia, Ia manganto’o,

8“Ane komi nadinsi ntau yau ri roa mpaparongo, ane rata nja’u ria, ne’e matunda ri gadera to napangampapotunda ntau tau to bose angganya. Apa bara re’e tau to bae wo’u angganya pei komi to radinsi seja.

9Pasi ane ewa see, tau to nangandinsi komi samparia, ia dama’i resi komi pei manganto’oka komi, ‘Waika tau si’i gadera to etu.’ See naka komi damawali mea kojo apa taa maya taa komi malimba damatunda nja’u gadera to napangampapotunda ntau tau to kodi kojo angganya.

10Wali to tao-tao ewa si’i danuika ngkomi: Ane radinsi dayau njo’u roa, ane ratamo komi, patunda ri gadera to napangampapotunda ntau tau to kodi kojo angganya. See naka ane ratamo tau to nangandinsi komi ia damanganto’oka komi, ‘Yunungku, mai patunda ri gadera to matao wo’u.’ Wali ane ewa see komi darapakabae anggamu ri pangkita nto pantako to yusa.

11Apa i sema tau to mampakabae angga ngkoronya, tau etu darapakakodi angganya. Pasi i sema tau to mampakakodi angga ngkoronya, tau etu darapakabae angganya.”

12Wali ojo karoonya i Yesu manganto’o paposia etu, Ia manganto’oka wo’u to Parisi to nangadinsi Ia, Ia manganto’o, “Ane korom mangika roa ntongo eo bara yau wengi, ne’e galungmu to nudinsi ngkorom. Pasi ne’e seja radinsi tau to masintua’i pei korom, bara ja’imu bara tau sugi to maroo ri awemu. Apa ane korom mangadinsi tau to etu, sira nakoto mangabalas wali tempo yusa sira damangadinsi wo’u korom, pei ane ewa see, korom roomo mangarata ntanapamu.

13Wali ane korom mangika roa, to tao-tao ane mangadinsi tau to masiasi pasi tau to malulu koronya, tau to sampungku, pasi tau to buta.

14Apa ane korom mangika ewa wetu korom damangarata rasi, apa sira taa nakoto mangabalas. Wali see naka korom danawaika i mPue Allah ntanapa ane ratamo temponya tau to singkonong pei Ia darawangu muni yako ri kapatenya.”

15Wali tempo tau to matunda ri meja sindara-ndara pei i Yesu mangandonge gomboNya etu, re’e samba’a sira to manganto’oka Ia, “Masanang kojo tau to damangkoni sindara-ndara ri temponya i Pue Allah mawali Makole ri lino.”

16Wali i Yesu manganto’o wo’u rapa mangkonong i Pue Allah mawali Makole nto lino, Ia manganto’o, “Rapanya re’e samba’a tau to mangika roa bae pei mangadinsi tau boros see sira dama’i mantako.

17Wali ane ratamo temponya roa, ia mampokau to papolaonginya yau damampokio tau to roomo radinsi etu, manganto’oka sira, ‘Mai mangkoni, apa pangkoni roomo rapasigena.’

18“Pei tau to radinsi etu samparia paka mangika anto. To uyunya, ia manganto’o, ‘Ma’ap, aku taa yoa. Apa aku owo room mangoli tana wali taa maya taa aku yau mangalo’a ruyu.’

19“Panewa re’e wo’u tau to manganto’o, ‘Ma’ap, aku taa yoa. Apa aku owo room mangoli sapi sampuyu mba’a, wali aku yau ruyu damampeyaa sapi etu bara mawali rapake damampojeko.’

20“Pasi re’e wo’u samba’a ngkai to manganto’o, ‘Aku owo room marongo, wali aku taa maya yau.’

21“Wali to papolaong ntau pue banua etu yau muni pei mamporata samparia gombo ntau etu resi tau puenya. See naka tau pue banua etu maja’a kojo rayanya pei mampokau wo’u to papolaonginya etu, manganto’o, ‘Inta pakajoli njo’u jaya-jaya tikore pasi jaya-jaya to kodi ri kota si’i pei keni mai tau to masiasi, tau to malulu koronya, tau to buta pasi tau to sampungku.’

22“Wali to papolaonginya yau mangika ewa nato’oka ntau pue banua ia. Pei rata muni ia manganto’o, ‘Pa’a, aku roomo mangika ewa nuto’o ngkomi, pei re’ewa tampa to soa.’

23“Wali tau pue banua manganto’oka wo’u to papolaonginya etu, ‘Inta njo’u sambali ngkota pei lo’a ri jaya-jaya pasi ri nawu-nawu ntau pei to’oka tau to nurata ngkorom, “To tao-tao komi yau mangkoni ri roa.” Ika ewa wetu see dabuke tau ri banuangku si’i.

24Apa aku manganto’oka korom tare pasi samba’a tau to uyunya radinsi to damangkoni pangkoni to inikangku etu.’” Etu semo rapa to nato’o i Yesu mampotundeka sira mangkonong i Pue Allah mawali Makole nto lino.

25Wali yako etu i Yesu polas wo’u dayau ndeku Yerusalem. Ri raya mpalinjaNya etu boros kojo tau to sinjaya pei Ia. Wali Ia mangalekoka tangoNya resi sira pei manganto’o,

26“Tau to ma’i resi Aku pei rani mawali anagurungKu, to tao-tao pamporayanginya resi Aku to bae-bae wo’u pei pamporayanginya resi pa’anya pei indonya, pasi resi indo nu ananya pei ananya, pasi resi tukakanya pei tua’inya to langkai pasi to we’a, pasi resi koronya seja. Ane si’a ewa see, ia taa maya mawali anagurungKu.

27Pasi tau to rani mawali anagurungKu, tau etu taa maya taa ewa mampopate yau pamporani ndaya to si ia pei mangalulu Aku. Palaong etu raporapaka ewa mamposa’a kaju pasape to darapake damampopate yau ia.

28“Wali tau to rani mawali anagurungKu, tau etu raporapaka ewa tau to rani mangawangu toal to malangan. Apa re’e katawanya mangawangu, tau etu matunda ruyu pei mangarekeng sawei doi to darapake see ia mangansani ane bara gana doi resi ia damampakaroo toal etu.

29Apa ane ia mangika pondasinya, roo see taa maya mampakaroo, ane ewa see samparia tau to mangkita pondasi etu damampokore ia,

30manganto’o, ‘Gete, ngkai si’i mula mangawangu, pei taa nakoto mampakaroo!’ Wali ewa see seja tau to rani mawali anagurungKu, ia mampobuu-buuka ruyu bara nakurang bara taa panewa mangaluluka Aku.

31“Pasi tau to rani mawali anagurungKu maya seja raporapaka ewa makole to tentaranya sampuyu nsowu kaborosinya. Apa ane makole etu dayau mangamusu makole to yusa to tentaranya dua mpuyu nsowu kaborosinya, ane ewa see, re’e katawanya yau mamusu, ia matunda ruyu pei mampobuu-buuka mangabotus ane bara nakoto mangewa balinya etu.

32Wali ane ia mampobuuka taa nakoto mangewa balinya, ane ewa see ia damampokau tau yau mangantomu balinya etu tempo sira dalongkowa see darapotanaka bara kesaa to naporani nsira see damasingkatao.

33Wali makole etu buya rayanya nempo mangawaika yau samparia anu to re’e resi ia apa re’e to bae wo’u batuanginya resi ia, etu semo makole to yusa masingkatao pei ia. Pasi ane komi to rani mawali anagurungKu, to tao-tao komi seja mampobuu-buuka to imba to bae kojo batuanginya resi komi, bara anu to re’e resi komi, bara mangalulu Aku. Apa tare pasi samba’a komi to maya mawali anagurungKu ane taa buya rayanya mangawaika yau samparia to re’e resi ia.”

34Wali i Yesu manganto’o wo’u, to’oNya, “Wali rapanya bure: Bure bae kojo batuanginya, pei ane bure etu tamo masi, wimba dataika mampakamasi wo’u? Taa maya!

35Wali bure etu tamore batuanginya. Bure etu tamo seja maya rapake mampakaboko tana nempo ragaloka ta’i nsapi daraika pupuk. Wali bure etu jamo rataji yau apa tamore batuanginya. Wali ewa see seja tau to mawali anagurungKu pei roo see sira taa mampobuuka palaong to etu to bae kojo batuanginya resi sira wali see naka sira mandoo. Ane tau to ewa wetu pampobuukanya, tamo mawali Aku mangampake sira damangansawang tau to yusa. Wali i sema tau to nadonge ntalinganya, padongeka kojo.”


  Share Facebook  |  Share Twitter

Download Audio MP3 (Lukas 14):
Mobile (Low Quality) - CD (High Quality)

 <<  Lukas 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel