Alkitab Mobile SABDA
[VER] : [TAA]     [PL]  [PB] 
 <<  Lukas 16 >> 

1Wali i Yesu rani mampotundeka anaguruNya matao ane sira mangampake kasugi ri lino si’i mangika palaong to bae batuanginya ri tempo to darata, see naka Ia manganto’oka sira rapa, to’oNya, “Re’e tau sugi to mangawaika samba’a to papolaonginya kuasa mampasilonga ngaya-ngayanya. Pei yako etu re’e wo’u tau to ma’i resi tau sugi etu pei mampakasala to papolaonginya etu, ia manganto’o, ‘Tau to mampasilonga kasugimu ojo mangampake yau kasugimu etu.’

2Wali see naka tau sugi etu mampokio tau to mampasilonga kasuginya etu pei manganto’o, ‘Gete, maka pei aku mangandonge kareba si’i manganto’o korom ojo mangampake yau kasugingku? Pasilongaka aku buku to nupake ngkorom mangarekeng doi to rapake, pei kenika aku, apa korom tamo maya mangika palaong to etu.’

3“Wali ngkai etu yau damampasilonga buku darakenika tau puenya etu. Pei ri rayanya ia mangika palaong to etu, ia mampobuuka, ‘Gete, tau puengku damampapandoo aku yako ri palaongingku si’i, wali kesaa to dakuika? Apa aku taa gana karosongku yau manawu, pei aku mea kojo rayangku marapi sawang resi sa’e.’

4Wali tongo-tongonya ia mampobuuka ewa wetu, kodi majoli ia mangarata songka to matao. Ia mampobuuka, ‘O, aku kunsani to matao raika see ane ratamo temponya aku rapapandoo yako ri palaongingku rire tiroowa re’e tau to masanang mangantima aku ri raya banua nsira.’

5“Wali ri katawanya ia rapapandoo kojo yako palaonginya, ia mangalulu songka to inikanya etu. Etu semo, ia damangamomis samparia tau to re’e indanya resi tau sugi etu see sira damasanang mangansawang seja ia. Wali ia mampokio samparia tau to re’e indanya resi tau sugi etu samba’a pei samba’a. Ojo karata ntau to uyunya rapokio, ia mampotanaka resi tau etu, to’onya, ‘Sawei indamu resi tau puengku?’

6“Wali tau etu manganto’o, ‘Togo nsowu pei pitu atu liter indol nsaitun.’ “Wali to papolaong etu manganto’oka ia, ‘Oko sura nu indamu pei pakajoli matunda pei wali yau see ojo sansowu wayu atu pei lima mpuyu liter to ratulis.’

7“Yako etu rata tau to kadua, wali to papolaong etu mampotanaka resi ia, to’onya, ‘Sawei inda ngkorom?’ “Wali tau etu mangansono, ‘Sansowu karu gandum.’ “Pei to papolaong etu manganto’oka ia, ‘Oko sura nu inda ngkorom pei tulis wo’u wayu atu karu.’ Wali ewa see seja inikanya resi samparia tau to re’e indanya resi tau sugi etu. Wali ewa wetu naika nto papolaong etu mampakasanang raya nsa’e see ane tempo to darata sira damasanang seja mangansawang ia.

8“Wali yako etu tau sugi mangandonge mangkonong palaong to naika nto papolaonginya resi tau to kainda etu. Tempo ia mangandonge, ia mampobuuka, ‘Kamonsonya ngkai etu mangantipu aku, pei gete, ia pande kojo mangampake kasugingku ri tempo si’i damampasilonga katuwu to si ia ri tempo to darata.’ Ewa wetu napobuuka ntau sugi.” Etu semo rapa to nato’o i Yesu. Roo see Ia manganto’o wo’u, “Wali tau to taa mangaya i Pue Allah, sira ojo mampobuuka katuwunya ri lino si’i, ewa naika nto papolaong to mantipu tau puenya etu. Wali tau to taa mangaya etu, sira semo to pandepande mangampake kasugi nu lino sakowa tau to mangaya i Pue Allah to rato’oka ana nu reme.

9Wali Aku manganto’oka komi, Aku rani komi mawali pande seja mangampake kasugi nu lino si’i. Pake kasugi etu damangansawang sa’e see damawali boros yunumu to mangaya seja. Apa ane ewa see, ane ratamo temponya puramo kasugi ri lino si’i, tempo etu komi darata ri lipu to danukaroos rataka ri singkasaenya. Wali tempo etu komi daratima ri lipu etu ri kasanang ndaya.

10“Pasi ewa si’i seja, i sema tau to maya rasarumaka mampasilonga kasugi ri lino to taa bae kojo batuanginya ane ri pangkita i mPue Allah, tau etu maya seja rasarumaka mangika palaong to bae kojo batuanginya resi i Pue Allah. Pei i sema tau to ewa to papolaong ntau sugi to mantipu sa’e etu apa taa maya rasarumaka mampasilonga kasugi to taa bae batuanginya etu, tau to ewa wetu taa seja maya rasarumaka mangika palaong to bae kojo batuanginya.

11Wali ane komi taa maya rasarumaka mampasilonga kasugi ri lino si’i, to kamonsonya si’a komi puenya, batuanginya komi taa seja maya rasarumaka mampasilonga kasugi to monso, to yako resi i Pue Allah. Wali ane ewa see komi taa darawaika ntanapa to damawali komi puenya.

12(16:11)

13“Rapanya tau to napowatua nsa’e, ia taa maya dua tau puenya. Apa ane ia dua tau puenya, ia maja’a nakita samba’a pasi mamporayang to samba’a. Ia damanga’angga samba’a pasi mangkaengas to samba’a. Wali ewa see seja komi. Ane kasugi ri lino to na’angga ngkomi, kasugi etu mawali ewa pue ngkomi. Pasi ane ewa see, komi taa maya mawali to papolaong i mPue Allah. “Wali to tao-tao komi mangampake kasugi ri lino mangika singkonong pei pamporani i mPue Allah, apa etu semo palaong to bae batuanginya ri tempo to darata.”

14Wali tempo i Yesu manganto’o samparia gombo etu, re’e to Yahudi to aliran Parisi to mangandonge seja. Sira mamporayang kojo kasugi, see naka sira mampokore i Yesu.

15Wali i Yesu manganto’oka sira, “Komi semo tau to mangika lengko to singkonong pei i Pue Allah ane ri pangkita ntau boros. Pei i Pue Allah mangansani raya ngkomi kamonsonya taa singkonong pei Ia. Apa anu to napobuuka nto lino bae kojo batuanginya, anu to etu maja’a nakita i mPue Allah.

16“Wali ri katawanya i Yohanes to Pombaptis, anu to rapakarebaka etu semo porenta i Musa pasi tuntu i mPue Allah to naporata nto pantuntu tuntuNya tempo owi. Pei ojo karata i Yohanes etu, anu to rapakarebaka etu semo kareba matao mangkonong ewa wimba i Pue Allah mawali Makole nto lino. Pasi boros tau to mangandonge kareba matao etu, sira bae rayanya rani mawali tau to i Pue Allah Makolenya. Pamporani nsira etu raporapaka ewa pamporani ntau to mampakaja’aka yau ba’a mbombo banua apa rani kojo masua. Wali bae kojo raya ntau rani mawali tau to i Pue Allah Makolenya.

17Pei si’a batuanginya porenta i Musa tamore kuasanya. Apa to gampa-gampa yangi pasi lino dapaya yau sakowa samba’a titik darayali yau yako ri porenta etu.

18Rapanya tiroo monso anu to natulis porenta i Musa mangkonong tau masala. Komi mampobuuka ane tau maga’amo taa mawei ane marongo wo’u. Pei Aku manganto’oka komi tau to mampoga’aka indo nu ananya panewa roo see ia mamporongo wo’u tau we’a to yusa, tau etu masala. Pasi tau to mamporongo tamale ntau etu, ia seja masala.”

19Wali yako etu i Yesu manganto’oka sira sarita, Ia manganto’o, “Re’e samba’a tau sugi to sangkani mangampake pake to masuli kojo olinya to raika yako kain lena to maruna pasi yako kain to makamumu to napake ntau to bose angganya. Pasi ponto eo ngkai etu masanang kojo katuwunya apa ia tare to napo’ipu.

20Pei re’e seja samba’a ngkai to masiasi sanganya i Lasarus. I Lasarus etu ia biasa maturu-turu ri wombo mpampa ri tongonata ngkai sugi apa ia moro komponya see naka ia rani mangkoni nempo wuta mpangkoni to nataji yau nto papolaong ngkai sugi etu. Pasi i Lasarus juku koronya mabaka, wali najila-jila nu asu bakanya etu.

21(16:20)

22“Wali yako etu mate yaumo ngkai to masiasi etu pei nakeni mpomakau i mPue Allah ri awe i Abaraham. Panewa ngkai to sugi mate seja pei rapongkeli yau.

23Wali tau sugi etu masesa kojo la’u lipu ntau mate. Pei ia matingoa pei mangangkita i Abaraham nja’u longko pasi mangkita seja i Lasarus ri awe i Abraham.

24See naka ia mampokio, to’onya, ‘Pa’a Abaraham, porayang aku! Pokauka i Lasarus mangantuika tompo ntanujunya ri ue pei mangampolepeka ri jilangku apa aku masesa kojo kuepe ri raya ngkaa nu apu si’i.’

25“Pei i Abaraham manganto’o, ‘Anangku, pobuuka wo’u tempo korom re’ewa ri lino. Tempo etu korom sangkani mangarata anu to matao pei i Lasarus ia ojo mangarata anu to maja’a. Pei si’i-si’i ia re’e kasanang pei korom masesa.

26Pei kasimbalinya yako etu, ri oyo ngkita re’e kaloko to mayombu. Wali tau to rire to rani yau resi komi taa rakurang, pasi komi to rani ma’i resi kami taa seja nukurang.’

27“Wali tau sugi etu manganto’o, ‘Ane ewa see, aku mangamporapika resi komi Pa’a, pokauka i Lasarus yau ri banua mpa’angku.

28Apa dalima mba’awa tua’ingku. Wali to’oka ia mampatiendoka sira mangkonong anu to monso see sira taa dama’i seja ri tampa to masesa si’i.’

29“Pei i Abaraham mangansono, ‘Sira re’e buku to natulis i Musa pasi to pantuntu tuntu i mPue Allah tempo owi. To tao-tao sira mangalulu to ratulis etu.’

30“Pei ngkai sugi etu manganto’o wo’u, ‘Pa’a Abaraham, sira taa damangalulu to etu, pei ane re’e samba’a tau mambangu muni yako kapatenya pei rata resi sira, ane ewa see sira damajea.’

31“Wali i Abaraham manganto’o wo’u, ‘Ane sira taa mangalulu gombo i Musa pasi gombo nto pantuntu tuntu mPue Allah tempo owi, sira taa seja damangaya nempo re’e tau to mambangu muni yako kapatenya.’” Etu semo sarita to nato’o i Yesu.


  Share Facebook  |  Share Twitter

Download Audio MP3 (Lukas 16):
Mobile (Low Quality) - CD (High Quality)

 <<  Lukas 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran