Dual Panel1Wali tempo i Yesu pasi kami to anaguruNya mosu ri kota Yerusalem, kami liu mandoo nja’u kampu Betpage ri pu’u nTongku Saitun. Betpage tamo longko yako ri Yerusalem, wali i Yesu mampotuunaka resi dua mba’a tau yako ri oyo mami to anaguruNya,
2to’oNya, “Intamo njo’u kampu to uyu rata etu. Tempo komi rata nja’u ria, komi mansaka damangkita keledai to rataka. Keledai etu samba’a indonya, samba’a ananya. Wali lede yau taka ngkeledai etu pei kenika Aku.
3Pei ane re’e tau mampotanaka, ‘Maka pei komi dua mangkeni keledai etu?’ to’oka tau etu, ‘I Pue rani mangampake.’ Wali tempo komi manganto’o gombo etu, tau etu jamo damangabiaka keledai etu darakeni.” Etu semo patuu i Yesu resi tau dua etu.
4Wali anaguru dua mba’a etu yau mangika ewa wimba nato’oka i Yesu sira dua. Sira mangkenika Ia keledai dua sana etu. Wali tempo sira rata muni resi i Yesu sira mangalandasika yau bengo ngkeledai juba nsira. Panewa i Yesu matunda ri wawo nu juba etu. Wali yako etu kami samparia polasimo ndeku Yerusalem. Tempo kami polas etu, boros kojo tau mampago kami. Tau boros etu sangga’a to mangkambaraka juba nsira ri jaya, panewa sangga’a to mangoko ira to ewa ira nu wai pei mamposaka seja ri jaya. Ewa wetu naika nsira mangangalis jaya apa manga’angga i Yesu, apa ewa see ada mami to Yahudi ane rata tau to bae angganya. Wali ewa wetu palaong to mawali see mangabanang gombo to nato’o yami nto pantuntu tuntu i mPue Allah tempo owi mangkonong temponya i Makole parajanji i mPue Allah darata ri kota Yerusalem to rato’oka seja kota Sion. Gombo etu manganto’o, “To’oka tau to kota Sion pakasanang raya, to’oka sira, ‘O komi to Yerusalem, lo’aja! Tau to rata resi komi mampolea keledai etu, Ia semo Makole ngkomi. Pei nempo Ia Makole, pei Ia taa bae-bae rayaNya, apa lo’aja, ojo keledai to damangurawa to Ia mampolea.” Etu semo to nato’o nto pantuntu tuntu i mPue Allah tempo owi.
5(21:4)
6(21:4)
7(21:4)
8(21:4)
9Wali tau boros to njo’u ruyu rataka tau to ri purinya sira sakaboo, sira manganto’o, “Barong tau si’i, Wiyaa i Daud! Ia semo Makole parajani i mPue Allah! Ia ma’i napokau i mPue! Wali barong Ia! Barong i Pue Allah anu to bae kojo kuasaNya!”
10Wali yako etu, i Yesu pasi kami ratamo ri kota Yerusalem, wali kami masua ri raya ngkota etu. Tempo kami masua, juku ri kota etu tau makanano apa ipu kojo raya nsira mangkita Ia. Wali boros kojo tau to masipotanaka, “Sema tau etu?”
11Wali tau boros to mangalulu i Yesu etu mangansono, “Si’i semo i Yesu, Ia to pantuntu tuntu i mPue Allah yako kota Nasaret ri propinsi Galilea.”
12Wali yako etu i Yesu yau masua ri tongonata banua i mPue Allah. Tempo Ia masua etu Ia mangkita tau to mampobalu binatang pasi to yusa-yusanya to danapake ntau mangika pampue resi i Pue Allah. Wali sira mampobalu nja’u tongonata banua etu, pei sira ojo mangantipu tau to rata. Wali tempo i Yesu mangkita etu Ia mangarubak yau samparia tau to mabalu pasi Ia mangarubak seja tau to mangoli yako ri tongonata etu. Panewa roo see Ia mampuka-mpukanaka yau meja ntau to mangabolos doi pasi mampukampukanaka yau seja bangku ntau to mampobalu tagou.
13Ri rayanya Ia mangarubak tau etu Ia manganto’oka sira, “Re’e gombo i mPue Allah to ratulis ri raya ntuntuNya, gomboNya etu manganto’o, ‘BanuangKu darato’oka banua danapokai-kai ntau.’ Ewa see to nato’o i mPue Allah, pei komi room mangampake yau banua si’i mawali tampa nto panipu.”
14Wali tempo i Yesu re’ewa ri tongonata banua i mPue Allah, ma’i bara sawei tau to buta pasi tau to sampungku mangampago Ia nja’u ria. Wali Ia mampakatao muni sira.
15Pei re’e kepala-kepala nto pampue pasi tau to mampoguru porenta i Musa, sira mangkita palaong to mampakaipu raya ntau to naika i Yesu etu. Pasi sira mangandonge ngana mayunu sakaboo ri tongonata banua i mPue Allah etu, manganto’o, “Barong tau si’i, Wiyaa i Daud! Ia semo Makole parajani i mPue Allah!” Wali tempo sira mangangkita pasi mangandonge palaong to etu, sira maja’a rayanya.
16Sira mampotanaka resi i Yesu, to’onya, “Gete, wimba Korom bara taa mangandonge gombo to sala to nato’o nu ngana mayunu etu? Maka pei Korom taa manganseko sira?” Wali i Yesu mangansono, “Aku taa damanganseko sira apa taa sala gombonya etu! Wimba komi bara tawa mangabasa gombo nto pantuntu tuntu i mPue Allah to ratulis ri raya ntuntuNya mangkonong ngana mangabarong Aku? Gombo nto pantuntu tuntu i mPue Allah etu manganto’o, ‘O Pue, Komi roomo mampotundeka ngana mayunu pasiwa ngana to tiroowa mansusu see sira mangansani mangabarong Komi ewa wimba to masipato raika.’ Ewa wetu ratulis ri raya ntuntu i mPue Allah.”
17Wali ojo karoonya i Yesu manganto’oka sira gombo etu Ia mampiyaika sira pei mayoko yako ri kota Yerusalem. Ia yau lo’u kota Betania pei yore la’u ria.
18Wali yako etu ojo kaeonya rao, i Yesu pasi kami to anaguruNya kami mawolili muni ndeku Yerusalem. Ri raya mpalinja mami etu i Yesu mangepe moro kompoNya.
19Wali tempo Ia moro etu Ia mangkita kaju ara ri wii njaya, kaju etu marombo iranya see naka Ia yau mangampago apa ane kaju ara to marombo iranya ewa wetu, masipato re’emo sangkodi wuanya. Pei rata ri awe ngkaju etu Ia mangkita kaju etu tare kojo wuanya, ojo iranya semo. Wali see naka i Yesu manganto’oka kaju ara etu, “Yako tempo si’i, korom tamo damawua wo’u.” Wali ojo karoonya i Yesu manganto’o gombo etu, kaju ara etu mansaka mangau yau.
20Wali tempo kami mangkita palaong to etu kami ipu kojo raya mami. Kami manganto’o, “Kesaa mawali naka pei kaju ara etu majoli kojo mangau yau?”
21Wali i Yesu mangansono, Ia manganto’o, “Aku manganto’oka komi, kamonsonya komi maya seja mangika palaong to ewa wetu ane komi monso pu’u mangaya pei taa bata-bata rayamu. Pasi si’a ojo palaong to mawali ri kaju ara etu to maya nuika ngkomi. Apa ane komi monso pu’u mangaya pei taa batabata raya, nempo komi manganto’oka tongku, ‘Palimba pei kapuka lo’u raya ntasi,’ palaong etu damawali seja.
22Pasi nempo kesaa to nuporapika resi i Pue Allah tempo komi makai-kai resi Ia, ane komi monso pu’u mangaya, komi damangarata anu to nuporapika ngkomi etu.”
23Wali yako etu i Yesu pasi kami to anaguruNya rata muni nda’a Yerusalem. Roo see i Yesu yau wo’u njo’u banua i mPue Allah panewa Ia masua ri tongonatanya pasi mampotunde tau nja’u ria. Tongotongonya Ia mampotunde etu, ma’i bara sawei mba’a kepala-kepala nto pampue pasi tau tu’a nto Yahudi, sira ma’i resi i Yesu. Sira mampotanaka resi Ia, sira manganto’o, “Yako imbare pangarata ngKorom kuasa mangika palaong to nuika ngKorom? Bara sema mangawaika Korom kuasa mangika palaong to etu?”
24Wali i Yesu manganto’o, “Aku re’e seja samba’a pampotanaka to Aku damampotanaka resi komi. Ane komi mangansono pampotanakangKu etu, panewa Aku damanganto’oka komi i sema mangawaika Aku kuasa mangika palaong to etu.
25Si’i semo pampotanaka. Bara sema nangawaika i Yohanes kuasa mangabaptis tau, bara i Pue Allah, bara to lino?” Wali ojo pangandonge nsira pampotanaka i Yesu etu, sira masipotanaka samba’a pei samba’a, sira manganto’o, “Wimba dataika mangansono, apa ane kita damanganto’o yako resi i Pue Allah nangawaika i Yohanes kuasa, I Yesu damanganto’o wo’u, ‘Maka pei komi manasa ngkomi i Pue Allah nangawaika ia kuasa pei komi taa mangaya anu to ia mampotundeka?”
26Pei ane kita manganto’o to lino semo to nangawaika ia kuasanya, gete, masipato kita mampokeka tau boros, apa sira damasusa kojo resi kita. Apa ane ewa pampobuuka nsira i Yohanes monso pu’u nawaika i mPue Allah kuasa mawali to pantuntu tuntuNya.”
27Wali kepala-kepala nto pampue pasi yununya, sira manganto’oka i Yesu, “Kami taa kunsani yako sema pangarata i Yohanes kuasanya.” Panewa roo see i Yesu manganto’oka sira, “Ane komi taa manganto’oka Aku, Aku taa seja damanganto’oka komi yako sema Aku mangarata kuasa mangika palaong to inikangKu etu.”
28Wali yako etu i Yesu manganto’oka wo’u kepala-kepala nto pampue pasi yunu nsira, Ia manganto’o, “Kesaa pampobuuka ngkomi mangkonong rapa si’i? Rapanya re’e tau to dua ananya to langkai. Wali tau etu yau resi ananya to tu’anginya pei manganto’o, ‘Anangku, inta pei palaong seo si’i nja’u nawu anggur.’
29“Wali ananya etu manganto’o, ‘Bo’oku.’ Panewa roo see ia majea pei yau mapalaong.
30“Panewa pa’a nu ana etu yau seja resi ananya to kadua pei manganto’oka seja ia yau mapalaong ri nawu anggur. Wali ana to etu manganto’o, ‘Dayau, Pa’a,’ pei roo see ia taa yau.
31Wali to imba tau dua etu to mangika pamporani mpa’anya?” Wali kepala-kepala nto pampue pasi yununya mangansono, sira manganto’o, “To tu’anginya semo.” Wali i Yesu mampakanasaka tau etu sira semo to raporapaka ewa ana to kadua to taa mangalulu pamporani mpa’anya etu. Ia manganto’o, “Aku manganto’oka komi, monso pu’u tau madosa to pantagi asele pasi tau to lonte, sira semo to mampatiruyu pei komi mawali tau to Makolenya i Pue Allah.
32Apa i Yohanes naka pei nama’i damampakanasaka resi komi jaya to singkonong pei i Pue Allah, pei komi taa mangaya gombonya. Pei tau to pantagi asele pasi tau to lonte, sira mangaya gombo i Yohanes etu. Pasi komi mangkita pangaya nsira etu, pei komi tiroo bo’omu majea pasi mangaya ia. Wali see naka komi taa mawali tau to Makolenya i Pue Allah.”
33Wali i Yesu manganto’oka wo’u sira, to’oNya, “Padongeka wo’u rapa to si’i. Rapanya re’e samba’a tau to mangika nawu danapampomuya anggur. Ojo karoonya ia mangika nawu etu ia mampomuya anggur panewa roo see ia mangampampa yau nawu etu. Ojo karoonya ia mangampampa ia mangkeke wo’u wayau daraika tampa danapangalombu-lombu anggur etu see masuwu uenya. Panewa roo see ia mangawangu toal mangika tampa darapangajagai nawu etu. Wali ojo karoonya ia mangika palaong to etu ia mangawaika sawei mba’a tau damampasilonga nawu etu. Ia manganto’oka tau etu sira darawaika ntanapanya, etu semo sira darawaika santilaja yako ri wuanya, panewa kaborosinya wua nu anggur etu ia semo puenya. Wali roo see tau pue nawu etu ia mayoko dayau njo’u longko.
34“Wali ojo karatanya temponya wua nu anggur etu matasamo, tau pue nawu etu mampokau sawei mba’a to papolaonginya yau njo’u to pangkampang nawu etu damangokoka ia wua nu anggur to si ia.
35Pei ojo karata nto papolaong etu, to pangkampang nawu etu sira mangantidas samba’a, pasi mampopate yau samba’a, pasi to katogo sira mangantasoka watu rani mampopate yau sira.
36Wali tau pue nawu etu mampokau wo’u to papolaonginya. To papolaonginya etu to boro-boros pei to uyunya rapokau. Pei ojo karata nto papolaong to etu nja’u ria, to pangkampang nawu mangika wo’u resi sira sewaju ewa to room naika nsira resi to papolaong to rata ruyunya.
37“Wali yako etu tau pue nawu mampobuuka, ‘Jamo samba’a tau to maya kupokau, etu semo anangku. Wali aku damampokau ia yau njo’u to pangkampang nawu etu apa ane anangku si’i dakupokau, sira damanga’angga ia.’ Wali tau pue nawu mampokau ananya yau wo’u njo’u to pangkampang nawu.
38Pei ojo karata nu ana mpue nawu etu, to pangkampang nawu sira mangkita ananya etu, wali sira manganto’o samba’a pei samba’a, ‘Si’i semo tau to damangantima panta ntau pue nawu si’i. Anu kita mampopate yau ia see kita semo damangantima pantanya etu.’
39Roo see sira mangansoko ana mpue nawu panewa sira mampanasok yau ia nja’u sambali nawu anggur panewa mampopate yau ia.”
40Wali ojo karoonya i Yesu manganto’o rapa etu Ia mampotanaka wo’u resi kepala-kepala nto pampue pasi yununya, Ia manganto’o, “Wali ane ewa pampobuuka ngkomi, kesaa danaika ntau pue nawu resi to pangkampang nawunya etu tempo ia rata muni resi sira?”
41Wali sira mangansono pampotanaka i Yesu etu, sira manganto’o, “Mapari kojo danaika damampakaja’aka yau tau to maja’a etu. Panewa roo see ia damangawaika wo’u tau to yusa damampasilonga nawunya etu. Wali tau to i waikanya mampasilonga nawu etu, etu semo tau to singkonong mangawaika ia tilanya ane ratamo temponya matasamo wua nu anggur. Wali tau to etu semo damangkampang wo’u nawu etu.”
42Wali i Yesu manganto’oka sira, “Monso pu’u pasono ngkomi. Pei wimba, komi bara tawa re’e mangabasa gombo to ratulis nja’u raya ntuntu i mPue Allah? Gombo etu ligi mangkonong Makole parajanji i mPue Allah. Ia raporapaka ewa watu, wali gombo to ratulis etu manganto’o, ‘Re’e tau to mangawangu banua watu, tau etu mangantaji yau songu watu apa sira mampobuuka watu etu taa masipato rapake ri banua etu. Pei i Pue Allah mamporani watu etu semo to rapake mangawangu banua etu, see naka watu etu rapake muni. Wali i Pue Allah mangampake watu etu panewa watu etu semo to mawali yau watu to bae kojo batuanginya ri banua to etu. Wali i Pue semo nangika palaong to etu, wali ane ewa pampobuuka ngkita magaya kojo palaong to etu.’ Etu semo gombo to ratulis tempo owi.
43“Wali komi semo tau to mampobo’o Aku etu. See naka Aku manganto’oka komi, komi tamo nasale i mPue Allah damawali tau to Ia Makolenya. Pei bansa ntau to yusa to mangika palaong to masipato naika ntau to Makolenya i Pue Allah, sira semo to damangabolos komi.
44Pasi si’i wo’u ligi mangkonong Makole parajanji i mPue Allah. Ia raporapaka wo’u ewa watu to bae kojo batuanginya etu, to’onya, ‘Tau to masou tudu ri wawo mbatu to bae batuanginya etu, tau etu mabusak koronya. Pei ane watu etu to masou tudu ri wawo ntau, tau etu damaruna yau mawali ewa awu.’”
45Wali ojo pangandonge ngkepala-kepala nto pampue pasi to Yahudi to aliran Parisi ligi to nato’o i Yesu etu, sira manasa batuanginya mangkonong sira semo.
46See naka sira rani kojo mangansoko Ia. Pei taa mawali apa sira mampokeka tau boros apa tau boros etu mampobuuka i Yesu Ia to pantuntu tuntu i mPue Allah.