Alkitab Mobile SABDA
[VER] : [TAA]     [PL]  [PB] 
 <<  Matius 27 >> 

1Wali ojo kaeonya rao samparia kepala nto pampue pasi tau tu’a nto Yahudi sira siromu magombogombo mangkonong songka nsira damampopate yau i Yesu.

2Roo sira magombo etu, sira mangampungu i Yesu panewa mangkeni Ia resi gubernur nto Roma, i Pilatus.

3Wali yako etu i Yudas to namposora yau i Yesu, ia mangansani i Yesu darahuku mate, see naka ia soso kojo rayanya. Wali ia mangkeni doi pera to togo mpuyu ngkomba to nawaika ngkepala-kepala nto pampue pasi tau tu’a nto Yahudi ia, pei ia mampawolilika muni doi etu resi sira.

4Ia manganto’o, “Aku re’e mangika dosa, apa aku roomo mamposora yau resi komi tau to tare salaNya, wali si’isi’i nempo taa kojo re’e salanya pei Ia darapopate yau.” Wali kepala-kepala pasi tau tu’a etu manganto’o, “Taa mawei resi kami apa si’a palaong mami. Palaong ngkorom semo.”

5Wali i Yudas mampanasoka yau doi pera etu njo’u raya banua i mPue Allah panewa roo see ia yau manoo, ia mangaloe koronya.

6Wali payunya ia yau, kepalakepala nto pampue sira mangoko muni doi pera etu pei manganto’o, “Doi si’i doi olinya raa ntau wali see naka ane ewa porenta ngkita taa maya raposaka ri raya mpeti to rapamposaka nu doi banua i mPue Allah.”

7Wali sira magombo-gombo panewa sira mangampake doi etu damangoli tana yako resi tau to pande mangika kura tana. Panewa tana etu sira manganto’oka tampa darapangampongkeli yau tau to rata yako lipu to yusa pei mate nda’a Yerusalem.

8Wali see naka rataka ri tempo si’i tana etu tiroowa rato’oka “tana to raolika raa.”

9Wali palaong to etu mangabanang gombo to ratulis yami tempo owi nja’u buku to rato’oka buku i Yeremia, tempo owi. Apa tempo etu ia manganto’o, “Sira mangoko doi pera to togo mpuyu ngkomba etu. Doi etu nato’oka nto Israel olinya to masipato rabayar damangoli yau Ia.

10Panewa doi to etu napake nsira mangoli wo’u tana ntau to pande mangika kura tana. Wali sira mangika palaong to etu, pasi palaong to naika nsira etu sewaju ewa palaong to aku nangika seore mangalulu porenta i mPue resi aku.” Etu semo gombo to ratulis ri buku i Yeremia etu.

11Wali i Yesu Ia rakeni damampotango gubernur, i Pilatus. Rata nja’u ria, i Pilatus mampotanaka resi Ia, to’onya, “Wimba, bara monso Korom semo Makole nto Yahudi?” Wali i Yesu mangansono, “Monso ewa panto’o ngkomi.”

12Yako etu kepala-kepala nto pampue pasi tau tu’a nto Yahudi mampakasala i Yesu, pei Ia taa mangansono.

13Wali see naka i Pilatus manganto’oka Ia, “Gete, boros palaong to maja’a to nato’oka nsira Korom roomo mangika. Wali wimba, bara taa nudonge ngKorom gombo nsira etu?”

14Pei i Yesu taa mangansono wo’u nempo ojo santaa. Wali i Pilatus ia ipu kojo rayanya.

15Wali palaong etu nawali kono kojo tempo Roa. Pasi ada i Gubernur tempo etu ponto to’u, tempo napongika Roa etu, ia mangalapa samba’a tau to ratarungku. Pei ia mangawaika resi tau to boros see sira mangampilis to imba tau daralapa.

16Wali tempo etu re’e seja samba’a tau to ratarungku, sanganya i Barabas. Ngkai etu naponsani ntau boros apa maja’a kojo lengkonya.

17Wali tempo tau boros siromu ri tango i mPilatus, ia mampotanaka resi sira, ia manganto’o, “To imba tau to ratarungku to nuporani ngkomi aku damangalapaka komi, bara i Barabas, bara to tao-tao aku mangalapaka komi i Yesu to rato’oka Makole ngkomi to naparajanjika i mPue Allah komi?”

18I Pilatus mampotanaka ewa wetu apa ia mangansani naka pei kepala-kepala nto pampue mangkeni i Yesu resi ia apa sira ojo timopo rayanya mangkita boros tau tamo mangalulu sira, jamo mangalulu i Yesu semo.

19Wali tempo i Pilatus matunda ri gadera nto pobotus damangabotus i Yesu, tempo etu indo nu ananya mampotuu resi ia, to’onya, “Ne’e kojo mangahuku tau to etu, apa Ia tare salaNya. Pasi raya mburi aku mangipi mangkonong Ia see naka masusa kojo rayangku seo si’i.” Ewa see patuu nu indo nu ana i mPilatus.

20Pei ri rayanya i Pilatus mangabasa sura yako resi indo nu ananya etu, tempo etu kepala-kepala nto pampue pasi tau tu’a nto Yahudi sira re’e manganto’oka tau boros, “Anu kita mamporapika resi i Pilatus see ia mangalapa i Barabas pei mangahuku mate i Yesu.”

21Wali yako etu i Pilatus mampotanaka wo’u resi tau boros, manganto’o, “To imba tau dua etu komi rani aku damangalapa?” Wali sira mangansono, “Barabas.”

22Panewa i Pilatus mampotanaka wo’u, to’onya, “Wali ane i Barabas daralapa, kesaa dakuika resi i Yesu to rato’oka Makole ngkomi to naparajanjika i mPue Allah komi?” Wali sira samparia mangansono, “Paku Ia ri kaju pasape!”

23Pei i Pilatus manganto’o, “Maka pei komi rani mangika palaong to etu? Kesaa anu to maja’a inikaNya?” Pei tau boros etu ojo maroso wo’u loonya sakaboo manganto’o, “Paku yaumo Ia ri kaju pasape!”

24Wali i Pilatus mangansani tamo re’e batuanginya nempo ia manganto’o wo’u gombo apa ia mangkita tau boros etu damarotaimo. Wali ia mangoko ue panewa ia mamue ri tango ntau boros etu mangika tondong resi sira. Ia manganto’o, “Aku taa kono salanya ane ngkai si’i danupopatemo ngkomi. Ikamo komi semo.”

25Wali tau boros etu sira samparia mangansono, sira manganto’o, “Biakamo. Kami pasi ngana mami semo mampongakung salanya ane Ia rapopatemo.”

26Wali yako etu i Pilatus mangalapaka sira i Barabas. Panewa ia mampokauka tentara mangansamparika i Yesu kiyoro to nja’u anu to mataja ri tomponya. Roo see ia manganto’oka wo’u tentara, “Keni yau Ia pei paku ri kaju pasape.”

27Wali tentara i mPilatus etu mangkeni i Yesu ri raya banua i mPilatus, banua to bae. Tempo sira ri raya banua etu, sira mampokio samparia yununya to nja’u ria panewa mangalimpung yau i Yesu.

28Sira mangayali yau pake i Yesu panewa mampaposunsuka wo’u Ia pake to mawaa ewa to napake makole.

29Roo see sira mangikaka i Yesu so’o mbo’o yako wiyaa to marui panewa sira mangansompeka ri wo’o i Yesu ewa naika ntau mangansompeka songko makole ri wo’o to si ia. Yako etu sira mampapokongkoka Ia toko ri paleNya tondo ngkana ewa naika ntau mampapokongkoka makole toko to tondong kuasanya. Roo see sira mambokotu ri tangoNya. Sira mampokore Ia, manganto’o, “Barong Makole nto Yahudi!”

30Pasi sira mangeru-ngerus Ia pasi mangoko muni toko etu pei naboba-bobakika nsira ri wo’oNya.

31Wali ojo karoonya sira mampokore Ia, sira mangawonsu muni pake to mawaa etu, panewa mampaposunsuka muni Ia pake to si Ia. Roo see sira yau mangkeni Ia darapakumo ri kaju pasape.

32Wali ri raya mpalinja nsira mangangkeni i Yesu nja’u sambali ngkota darapopate yau, tempo etu sira simparata pei samba’a tau to ma’i yako ri kota Kirene. Ngkai etu sanganya i Simon. Wali tentara etu mampakasaaka ia mampasa’a kaju darapangampaku i Yesu.

33Wali sira mangkeni i Yesu rata nja’u pantana sanganya Golgota. Golgota ane basa Ibrani batuanginya wuku wo’o.

34Wali rata nja’u ria sira rani mampapoinuka i Yesu tule anggur to ragaloka poju, pei ojo pangepe i Yesu tule etu Ia bo’onya manginu.

35Yako etu, tentara etu mangampaku i Yesu ri kaju pasape pasi ri wawo mbo’oNya sira mamposaka anu to ratulis ewa biasa naika nsira mampakanasaka tau boros sala ntau to rapaku etu. Anu to ratulis etu manganto’o, “SI’I SEMO I YESU, MAKOLE NTO YAHUDI.” Wali ojo karoonya i Yesu rapaku ri kaju pasape, tentara etu mampobata’aka yau pakeNya. Panewa roo see sira matunda mangajagai Ia.

36(27:35)

37(27:35)

38Wali tempo i Yesu rapaku etu sira mangampaku seja dua mba’a to palima ri kaju pasape panewa kaju pasapenya rapapokore ri awe nu kaju pasape i Yesu, samba’a ri sambalinya tondo ngkana, pasi samba’a wo’u ri sambalinya tondo ngkii.

39Wali tempo i Yesu re’e ri kaju pasape etu, tau to liu nja’u ria paka mangantoro wo’onya mangampokore Ia pasi sira manganto’o maja’a Ia.

40Sira manganto’o, “Gete Korom! Korom semo to manganto’o damampakaja’aka yau banua i mPue Allah pei ri rayanya togo mbengi damangawangu muni. Wali palaes Korom yako ri kapateMu! Ane monso pu’u Korom Ana i mPue Allah, pana’umo yako ri kaju pasape etu!”

41Pasi ewa wetu seja naika ngkepala-kepala nto pampue pasi tau to mampoguru porenta i Musa pasi tau tu’a nto Yahudi. Sira seja mampokore Ia, sira manganto’o,

42“Ia nakoto mampalaes tau to yusa, pei gete, koroNya ngkalio Ia taa nakoto mampalaes! Wali ane Ia monso pu’u makole nto Israel, biakamo Ia mana’u yako ri kaju pasape etu si’i-si’i see kita maya mangkita, panewa kita damangaya Ia!

43Ngkai si’i manganto’o, ‘Aku Ana i mPue Allah,’ pasi Ia mansarumaka i Pue Allah, wali see naka ane i Pue Allah mamporayang ngkai si’i, biakamo Ia semo mampalaes Iaja si’isi’i.”

44Wali to palima to ipaku sindara-ndara pei i Yesu etu, sira mampokore seja Ia ewa naika ntau to manganto’o gombo etu.

45Wali tempo i Yesu re’ewa rapaku ri kaju pasape, yako ntongo eo rata jam togo rede eo, juku tana etu mawuri rao.

46Panewa rata jam togo etu, i Yesu maroso looNya kaboo, Ia manganto’o, “Eloi, Eloi, lama sabatani?” Wali batuang nu gomboNya etu, “AllahngKu, AllahngKu, maka pei Komi mampiyaika Aku?”

47Wali ojo pangandonge ntau to makore nja’u ria gombo i Yesu etu, re’e to manganto’o, “Padongeka, tau si’i mampokio i Elia.”

48Roo see re’e samba’a sira mansaka maripo yau mangoko anu to maya masua ue reria pei mangayo’o la’u ue nu anggur to mapodimo. Panewa ia mangansula ndate tompo nu loe ntibu pei mangantotoka ri nganga i Yesu ndate kaju pasape wali i Yesu mangampipis.

49Pei yunu ntau etu manganto’o, “Biakamo Ia. Anu kita mangalo’aka bara i Elia darata damangampalaes Ia.”

50Wali yako etu i Yesu maroso looNya kaboo wo’u panewa Ia mampakapura nosaNya.

51Pasi gete, tempo etu semo kodi majoli rindi ronto ri raya banua i mPue Allah nja’u raya ngkota, rindi ronto etu rasia dua yau yako ndate wawonya rata la’u aranya! Pasi mawali lengko tana pasi watu-watu to bose magoa yau.

52(27:51)

53Pasi ri tempo etu dayo-dayo tiloka. Panewa yako etu, tempo i Yesu roomo rawangu muni yako ri kapateNya, tempo etu boros tau to Makolenya i Pue Allah pei to namatemo, sira rawangu muni seja yako ri kapatenya. Roo see sira mampiyaika dayo nsira to tiloka etu pei masua ri raya ngkota Yerusalem, kota to i Pue Allah puenya, pasi sira mampapokitaka boros tau to ndate ria koro nsira.

54Wali kepala ntentara to mangkepalang tentara to satu kaborosinya pasi joanya to mangajagai i Yesu, sira mangepe lengko tana pasi samparia palaong to yusa to mawali tempo etu, wali sira meka kojo rayanya, sira manganto’o, “Monso pu’u tau si’i Ana i mPue Allah!”

55Pasi ri tempo etu re’e seja boros tau we’a makore nja’u longko mangalo’aka palaong to mawali resi i Yesu etu. Tau we’a etu, sira tau to nangalulu i Yesu pasi nangansawang Ia tempo Ia ma’i yako ri propinsi Galilea.

56Ri oyo ntau we’a etu re’e seja i Maria to yako kampu Magadan, pasi i Maria to indo i Yakobus sira dua i Yoses. Pasi re’e seja indo nu ana i nSebedeus.

57Wali ri tempo ngkapate i Yesu, re’e ri Yerusalem samba’a tau sugi yako kota Arimatea, sanganya i Yusup. Ia anaguru i Yesu seja. Wali ojo kawenginya rao ia yau mamporapika resi i Pilatus, to’onya, “Waika aku lemba i Yesu dakupongkeli.” Wali i Pilatus manganto’oka to papolaonginya, “Waika ngkai si’i lemba ntau mate etu.”

58(27:57)

59Wali i Yusup yau mangoko tau mate etu panewa ia mangawungusika kain lena to dabouwa.

60Panewa roo see ia mangkeni tau mate etu njo’u wayau to tawa masae raika ri woto mbatu pei mampoduli nja’u rayanya. Wayau etu i Yusup semo nangika see ane ratamo temponya ia damate, ia darapasaka nja’u ria. Pei ia mamposaka lemba i Yesu nja’u ria, wali ojo i Yesu semo mampake yau. Wali ojo karoonya i Yusup mamposaka lemba i Yesu ri raya mbayau mbatu etu, ia mangabombongika yau watu to bae ri wombo nu dayo etu. Roo ia mangabombong yau wayau etu panewa ia mampiyaika.

61Pei i Maria to yako ri kampu Magadan pasi i Maria to yusa, to indo i Yakobus sira dua i Yoses, sira re’e matunda mampotango dayo etu pei mangalo’aka palaong to naika i Yusup etu.

62Wali eo ngkapate i Yesu etu, etu semo eo to napasigena nto Yahudi anu to darapake ri Eo Rapandoo. Wali yako etu ratamo Eo Rapandoo, panewa siromu kepalakepala nto pampue pasi to Yahudi to aliran Parisi. Sira yau mampotango i Pilatus.

63Tempo sira rata resi ia, sira manganto’o, “Pa’a, kami tiroowa kuendo gombo nto pantipu etu tempo Ia tuwuwa. Tempo etu Ia manganto’o, ‘Aku damate pei ri rayanya togo eo Aku damambangu muni yako ri kapatengKu.’

64Wali ngkai etu matemo si’i-si’i, see naka ri rayanya togo mbengi si’i, pakauka tau yau mangkampang dayonya. Apa ne’e ne’e re’e anaguruNya mampolima yau lembaNya ri raya mburi pei manganto’oka tau boros, ‘Ia tuwu muni yako ri kapateNya.’ Apa ane ewa see, akal to purinya etu wo’u to ja’aja’a pei akal to ruyu.”

65Wali i Pilatus manganto’oka sira, “Si’i tentara kuwaika komi. Kenimo sira mangkampang dayo etu.”

66Wali sira yau njo’u dayo i Yesu. Ojo karata nsira nja’u ria, sira mamposaka tondong ri woto mbatu ba’a nu dayo see damiyala ane bara re’e tau mangawewoka ba’a nu dayo etu. Roo see sira manganto’oka tentara mangajagai dayo etu.


  Share Facebook  |  Share Twitter

Download Audio MP3 (Matius 27):
Mobile (Low Quality) - CD (High Quality)

 <<  Matius 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel