Alkitab Mobile SABDA
[VER] : [TAA]     [PL]  [PB] 
 <<  Markus 16 >> 

1Wali ojo karoonya Eo Rapandoo, i Maria to yako ri kampu Magadan, pasi i Salome pasi i Maria to indo i Yakobus, sira yau mangoli minya to magaya waunya. Minya etu daraminyasika lemba i Yesu.

2Wali yako etu, kaeonya rao etu semo eo Minggu, sira togo yau mangampago dayo i Yesu.

3Ri raya mpalinjanya etu, sira re’e magombo-gombo, sira manganto’o samba’a pei samba’a, “Sema to damangawewoka kita watu ba’a nu dayo etu?”

4Naka pei sira manganto’o ewa wetu apa watu etu bae kojo pasi taa nakurang nsira mangawewoka apa mabeu. Pei ojo karata nsira nja’u dayo etu, sira mantengku mbo’o panewa sira mangkita watu ba’a nu dayo etu roomo rawewoka yau.

5Wali sira togo masua nja’u ria, pasi tempo sira masua etu, sira mangkita samba’a pomakau i mPue Allah yako ndate saruga, ia matunda ri tondo ngkana. Pomakau etu ta’anya ewa to langkai to mangurawa, pasi pakenya marade pasi buya. Wali sira togo kiyopo kojo mangkita pomakau etu.

6Pei pomakau i mPue Allah etu manganto’oka sira togo, to’onya, “Ne’e meka, apa Aku kunsani komi ma’i mangalo’a i Yesu to Nasaret anu roomo rapaku ri kaju pasape. Pei Ia tamo re’i rire apa Ia nambangu munimo yako ri kapateNya! Lo’a wakanya Ia rapoduli.

7Panewa inta pei to’oka i Petrus pasi anaguruNya to yusa Ia njo’umo mampatiruyu mangampago propinsi Galilea. Wali to’oka sira mangalulu Ia, panewa nja’u ria sira damangkita Ia ewa room yami Ia manganto’oka sira seore.”

8Wali ojo karoonya pomakau i mPue Allah etu mampogomboka tau we’a etu, sira togo masuwu muni yako ri raya nu dayo etu panewa miyai. Sira rongko-rongko pasi ipu kojo rayanya. Pasi sira taa kojo mampogomboka sa’e apa meka kojo rayanya.

9Wali ojo kaeonya rao eo Minggu, i Yesu mambangu muni yako ri kapateNya. Yako etu Ia mampapokitaka tau Ia. Uyu-uyunya Ia rata resi i Maria to yako ri kampu Magadan. I Maria to etu ia seore naposuak measa pei i Yesu nangarubak measa yako resi ia. Pitu measa to narubak i Yesu yako resi ia etu.

10Wali ojo karoonya i Maria mangkita i Yesu, ia yau mampakarebaka resi tau to sindarandara pei i Yesu tempo Ia tawa mate. Tau etu tongo ngkatumanginya apa mawo kojo rayanya mangendo i Yesu.

11Wali i Maria manganto’oka sira, “I Yesu tuwu munim! Aku re’e simparata pei Ia!” Pei tempo sira mangandonge gombo i Maria etu, sira taa mangaya.

12Wali yako etu re’e dua mba’a tau to etu, sira yau malinjalinja ri sambali ngkota. Tempo etu i Yesu rata seja resi sira dua, pei tempo Ia rata resi sira etu, Ia yusamo ta’aNya see naka sira taa mansaka mangansanika Ia.

13Pei roo see sira mawolili muni yau mampakarebaka wo’u resi yununya. Sira manganto’oka yununya, “Kami re’e seja mangkita i Yesu.” Pei yununya taa seja mangaya gombo nsira etu.

14Wali yako etu i Yesu rata wo’u resi anaguruNya to sampuyu pei samba’a tempo sira tongo mpangkoninya. Tempo etu Ia manganseko sira apa sira taa mangaya. Ia manganto’o, “Maka pei komi mabukul? Taa matao komi taa mangaya gombo ntau to mangkita Aku tuwu muni yako ri kapatengKu.”

15Roo see i Yesu manganto’oka wo’u sira, “Inta resi samparia tau ri sambawo lino pei pakarebaka resi sira kareba matao.

16Wali i sema to mangaya kareba matao etu pei rabaptis, tau etu darapalaes, pei i sema to taa mangaya, sira darahuku.

17Wali tau to mangaya damangika palaong to damawali tondong resi sa’e mangkonong kuasa to Kuwaika sira. Palaong etu semo sira damangampake kuasangKu etu damangarubak measa yako resi tau. Pasi sira damagombo ri raya basa mpangaya-ngaya to taware iguru.

18Pasi sira nempo mangkongko ule to mate tau natungku, bara manginu rasu, sira taa damawali masaki pasi taa damate yau. Pasi sira damangamposaka palenya ri wawo ntau to masaki see tau etu damatao muni.”

19Wali ojo karoonya i Yesu mampogomboka anaguruNya, Ia tiokotaka nto’u saruga. Panewa Ia matunda ri awe i mPue Allah ri sambaliNya tondo ngkana, tampa to bae angganya.

20Wali yako etu, anaguruNya yau njo’u ponto-ponto lipu ntau pei mampakarebaka tau nja’u ria tuntu i mPue Allah. Wali tempo sira mampakarebaka tuntu i mPue etu, i Pue re’e mangansawang sira. Pasi Ia mangawaika sira kuasa mangika palaong to taa rapobiasa see miyala resi tau to mangandonge gombo nsira, monso pu’u gombonya etu. Wali etu semo palaong to mawali ri tempo etu.


  Share Facebook  |  Share Twitter

Download Audio MP3 (Markus 16):
Mobile (Low Quality) - CD (High Quality)

 <<  Markus 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran