Dual Panel1Wali yako etu i Yesu manganto’oka wo’u anaguruNya pasi tau boros, to’oNya, “Aku manganto’oka komi, monso pu’u re’e tau to ri oyo ngkomi to ri katawanya sira mate yau sira damangkita i Pue Allah to bae kojo kuasaNya mawali Makole ri lino si’i.”
2Wali yako etu, ojo kagananya ono mbengi, i Yesu mangansale i Petrus, i Yakobus, pasi i Yohanes. Panewa i Yesu mangkeni sira togo nto’u tongku to malangan. Wali rata ndate rapa ntongku etu, ojo sira opo to ndate ria. Wali tempo etu i Yesu mambali ta’aNya ri tango nu anaguruNya to togo etu.
3Tempo Ia mambali ta’aNya etu, pakeNya kampila-mpila buya. Wali pakeNya etu buya kojo, tare pasi samba’a tau ri lino si’i to nakoto mangantatap pake see ewa wetu ta’anya kabuyanya.
4Wali tempo etu anaguruNya sira togo re’e mangalo’a pei gete, kodi majoli re’e seja i Elia pasi i Musa to tempo owi, sira dua magombo-gombo pei i Yesu.
5Wali tempo sira togo mangkita etu, i Petrus manganto’oka i Yesu, to’onya, “Guru, masanang kojo kita apa re’i rire. Ane maya kami damangika togo kandepe. Samba’a raikaka Komi, pasi samba’a raikaka i Musa, pasi samba’a wo’u raikaka i Elia.”
6Naka pei i Petrus manganto’o gombo ewa see, apa tamo maripo pampobuukanya, apa sira togo meka kojo rayanya.
7Wali tempo etu re’e limu to tudu mangangkumuti yau sira ndate rapa ntongku etu. Pasi sira mangandonge loo yako ri raya limu etu, loo etu manganto’o, “Si’imo anangKu. Aku mamporayang kojo Ia. Wali padongeka kojo gomboNya.”
8Panewa kodi majoli sira mangalo’a, jamo i Yesu sindara-ndara pei sira. Tamo re’e tau to yusa.
9Roo see sira opo malonso muni yako ri rapa ntongku malangan etu. Tempo sira malonso etu i Yesu mamporentangika sira togo, to’oNya, “Ne’e kojo mangansaritaka sa’e mangkonong anu to nukita ngkomi etu. Tempo Aku, Wiyaa nto Lino, roomo mambangu muni yako ri kapatengKu panewa maya rasarita.”
10Wali tau togo etu taa kojo mangansaritaka sa’e. Sira togo masipatanaka samba’a pei samba’a, “Kesaa batuanginya gombo i Yesu etu manganto’o Ia damambangu muni yako ri kapateNya?”
11Pasi sira mampotanaka resi i Yesu, sira manganto’o, “Kami manasa Komi semo Makole parajanji i mPue Allah, pei tau to mampoguru porenta i Musa manganto’o taa maya taa i Elia ma’i muni ruyu mampatiruyu pei i Makole Parajanji i mPue Allah. Wali maka pei sira manganto’o ewa wetu apa re’imo Komi pei i Elia ia tawa ma’i muni?”
12Wali i Yesu mangansono see damanasa resi sira i Yohanes to Pombaptis, ia semo to rato’oka i Elia. I Yesu manganto’o, “Monso pu’u i Elia ia matiruyu damampasilonga muni samparia. Pei Aku manganto’oka komi i Elia ia roomo nama’i muni, pasi tau ojo mangika maja’a resi ia mangalulu pamporani to si siraja. Wali palaong to etu mangabanang gombo to ratulis ri raya ntuntu i mPue Allah tempo owi mangkonong i Elia. Pei re’e seja gombo to ratulis ri raya ntuntu i mPue Allah mangkonong Aku, Wiyaa nto Lino. Gombo etu manganto’o Aku darasesai pasi danarunes ntau.”
13(9:12)
14Wali yako etu i Yesu sira opo rata muni ri pu’u ntongku etu. Tempo sira rata la’u ria sira mangampago anaguru to yusa. Sira mangkita boros kojo tau makore tiku anaguru etu. Pasi re’e sawei mba’a tau to mampoguru porenta i Musa to masibanta pei anaguru etu.
15Wali tau boros etu sira mangkita i Yesu ma’i. Sira ipu kojo rayanya apa sira taa mangansani yami Ia bara darata. Wali sira maripo mangampago Ia panewa rata resi Ia sira masanang kojo rayanya mangantabe Ia.
16Panewa i Yesu mampotanaka resi tau etu, Ia manganto’o, “Kesaa to komi mampasibantaka etu?”
17Wali re’e samba’a tau ri oyo ntau boros etu to mangansono, ia manganto’o, “Pa’a Guru, aku mangkenika Komi anangku to langkai, apa ia naposuak measa pasi ia tamo nakurang magombo apa naika nu measa to mamposuak ia etu.
18Wali anangku si’i ponto tempo measa etu mamposuak ia, ia tisiba yau ri wawo ntana pasi jamo wura nganganya pasi ngisinya kangke’i-ngke’i, koronya mawali mako’o yau. Wali aku re’e mamporapika resi anaguruMu mangarubak yau measa etu pei sira taa seja nakurang.”
19Wali i Yesu mampogomboka tau boros etu Ia manganto’o, “Gete komi to tuwu tempo si’i! Komi taa kojo mangaya. Pei nempo masaemo Aku maroo resi komi pei komi bara tiroowa taa mangaya. Wali masusa rayangKu mampobuuka komi taa kojo mangaya Aku!” Wali yako etu i Yesu manganto’o, “Kenika Aku ana etu.”
20Wali sira mangkenika i Yesu ana etu, panewa measa to mamposuak ana etu mangkita i Yesu. Tempo measa etu mangkita i Yesu, ia mansaka mangika ana etu kanjonjonjonjo, wali ana etu mapuka yau pei tipondo-pondo ri wawo ntana pasi mawura nganganya.
21Wali ojo pangkita i Yesu ana etu, Ia mampotanaka resi pa’anya, Ia manganto’o, “Wimba kasaenya ana etu naposuak measa?” Pei pa’anya mangansono, ia manganto’o, “Yako dakodiwa ia raposuak.
22Pasi mandudu ngkani measa mampukanaka ia ri apu pasi ri raya nu ue seja apa measa rani mampopate yau ia.” Etu semo pasono nu mpa’a nu ana etu, roo see ia mamporapika resi i Yesu, ia manganto’o, “Ane Komi Nukurang mangansawang, porayang kami pasi sawang.”
23Wali i Yesu magombo manganto’oka pa’a nu ana etu, “Maka pei korom manganto’o, ‘Ane Nukurang’? Tau to mangaya i Pue Allah tare to taa nakurang, samparia paka nakurang.”
24Wali pa’a nu ana etu mansaka kaboo pasi ia manganto’o, “Aku kuaya Komi, pei tawa maroso pangayankgu etu. Sawang aku see tidugang wo’u karosonya!”
25Wali roo see i Yesu mangkita re’e wo’u tau boros maripo mampago Ia, wali tempo etu Ia manganseko measa to mamposuak ana etu, Ia manganto’o, “Measa! Korom to mangangika tau mawali wongo pasi bea, Kuporentangika korom piyaimo yako resi ana si’i pei ne’emo pasi sangkani wo’u mamposuak ia.”
26Wali ojo karoonya i Yesu manganto’o gombo etu, measa etu kaboo pasi mangika see ana etu mapari kojo wo’u kanjonjo-njonjo. Roo see measa miyai muni yako resi ana etu, panewa ana etu mawali ewa tau mate. Wali tau boros manganto’o, “Ia matem!”
27Pei i Yesu mangangkongko palenya pasi mangawangu ia wali ana etu makore.
28Wali roo see i Yesu pasi anaguruNya masua ri raya banua. Tare tau to yusa nja’u ria wali anaguruNya mampotanaka resi Ia, sira manganto’o, “Kesaa sabanya naka pei kami taa mangkurang mangarubak measa resi tau etu?”
29Wali i Yesu manganto’o, “Ane measa to ewa wetu taa maya rarubak ane komi tawa makai-kai ruyu resi i Pue Allah pasi mangorop seja.”
30Wali yako etu i Yesu pasi anaguruNya polas yako ri lipu etu, sira malinja liu ri propinsi Galilea. Wali ri tempo etu i Yesu taa rani tau mangansani Ia nja’umo nja’u ria,
31apa Ia tongo-tongonya mangampotundeka anaguruNya. Tempo Ia mampotundeka sira, Ia manganto’o, “Aku, Wiyaa nto Lino, daraposora yau resi tau. Panewa tau etu damampopate yau Aku, pei ri rayanya togo eo Aku damambangu muni yako ri kapatengKu.”
32Wali anaguru i Yesu sira tawa manasanya mangkonong anu to nato’o i Yesu etu, pei sira taa mampotanaka resi Ia apa sira meka.
33Wali yako etu i Yesu pasi anaguruNya rata nja’u Kapernaum. Ojo karata nsira nja’u ria, sira masua ri raya banua. Tempo etu i Yesu mampotanaka resi anaguruNya, Ia manganto’o, “Kesaa to nupogomboka ngkomi ri jaya ngena?”
34Pei anaguru i Yesu ojo maroti, tare to mamoni apa ri raya mpalinjanya etu tempo sira ri jaya sira re’e magombogombo manganto’o, “To imba kita to damawali bae kojo angganya?”
35Wali i Yesu matunda panewa Ia manganto’oka anaguruNya, “Mai rire.” Panewa Ia manganto’o, “Ane tau rani mawali bae kojo angganya, ane ewa see tau etu taa maya taa mampakakodi angganya see ia semo to kodi kojo angganya, pasi ia taa maya taa mawali yau to papolaong ntau samparia.”
36Wali yako etu i Yesu rani mampakanasaka wo’u sira mangkonong anu to Ia room manganto’o etu. Wali Ia mampokio samba’a ana kodi to re’e seja ri raya banua etu see naka ana kodi etu mai makore ri awe i Yesu ri tongo mami. Panewa Ia mangansokowaka ana etu pei manganto’o,
37“I sema tau to mamporayang Aku, see naka ia manga’angga nempo ojo ana kodi to ewa si’i, ane ewa see batuanginya tau etu manga’angga seja Aku. Pasi i sema tau to manga’angga Aku, batuanginya si’a ojo Aku to ia manga’angga, ia manga’angga seja i Pue Allah to nampokau Aku.”
38Wali yako etu i Yohanes manganto’oka i Yesu, “Pa’a Guru, kami re’e mangkita samba’a tau to mangarubak measa yako kuasa ngKomi. Pei tempo kami mangkita etu kami manganto’oka ia ne’e mangika palaong to etu, apa ia si’a yunu to si kita.”
39Pei i Yesu manganto’o, “Ne’e mangamparas tau etu apa ane tau to mangika palaong to taa rapobiasa yako ri kuasangKu, tau to etu taa nakurang mansaka manto’o maja’a Aku.
40Apa tau to taa mangewa kita, tau etu mampasimbalika kita.”
41Wali i Yesu manganto’o wo’u, “Aku manganto’oka komi, monso pu’u ane tau mangawaika komi nempo ojo samba’a sangkir ue rainu apa saba ia mangansani komi mangaluluka i Kerisitu, tau etu matantu seja damangarata ntanapanya.”
42Wali yako etu i Yesu manganto’o wo’u, to’oNya, “I sema tau to mangika palaong to mampakaja’a pangaya nu ana kodi to mangaya aku si’i, taa kojo matao. To tao-tao tau etu loe watu to bae ri le’enya panewa panasok yau ri raya ntasi naka lodong yau.
43“Wali ane rapanya pale ngkomi mampolengkoka pamporani ndayamu to maja’a, ane ewa see pakadota kojo mampandooka mangika palaong to maja’a etu. Kadota etu raporapaka ewa tau to mangampu’ak yau palenya sambali see napandooka mangika palaong to maja’a etu. Apa to tao-tao nempo jamo sambali palenya pei ia mangarata katuwu to singkasaenya sakowa ia dua mbaliawa palenya ane ia damasua ri apu naraka, apu to singkasaenya mawea. Apa ane masua ri apu etu, nempo dua mbaliawa palenya masiasi kojo ia.
44Pasi la’u ria re’e ule kombo to mangkoni wombo ntau, ule etu taa mate, pasi apu etu singkasaenya mawea.
45Pasi ane witi ngkomi mangkeni komi mangika palaong to maja’a, ane ewa see pakadota kojo mampandooka yau mangika palaong to maja’a etu. Kadota etu raporapaka ewa tau mangampu’ak yau witinya sambali see napandooka yau mangika palaong to maja’a etu. Apa to tao-tao nempo jamo sambali witinya pei ia mangarata katuwu to singkasaenya sakowa ia dua mbaliawa witinya pei ane rataji yau lo’u apu naraka, apu to singkasaenya mawea. Apa ane masua ri apu naraka, nempo dua mbaliawa witinya masiasi kojo ia.
46Apa la’u ria re’e ule kombo to mangkoni wombo ntau, ule etu taa mate, pasi apu etu singkasaenya mawea.
47Pasi ane mata ngkomi mangalo’aka anu to taa matao ralo’aka, ane ewa see pakadota kojo mampandooka mangalo’aka anu to maja’a etu. Kadota etu raporapaka ewa tau to mangansu’i yau sambali matanya etu see napandooka mangalo’aka anu to taa matao ralo’aka etu. Apa to tao-tao jamo sambali matanya pei mangarata anu to matao to rawaika resi tau to i Pue Allah Makolenya sakowa ia dua mbaliawa matanya pei ane rataji yau lo’u apu naraka. Apa ane masua ri apu naraka, nempo dua mbaliawa matanya masiasi kojo ia.
48‘Apa la’u ria re’e ule kombo to mangkoni wombo ntau, ule etu taa mate, pasi apu etu singkasaenya mawea.’ Wali ewa wetu ratulis ri raya ntuntu i mPue Allah, see naka jagai kojo naka ne’e mangalulu ane ragoda pasi ne’e seja mangagoda sa’e.”
49Wali i Yesu manganto’oka wo’u anaguruNya, Ia manganto’o, “Ewa naika nto pampue mampake bure damampasilonga pampue to darapampueka resi i Pue Allah, ewa see seja i Pue Allah mangampake kasesa to raporapaka ewa apu damampasilonga samparia tau to Ia puenya.
50Bure ia bae kojo batuanginya pei ane bure etu tamo masi, wimba daraika mampakamasi wo’u? Taa maya! Bure etu tamore batuanginya. Wali ane komi masingkatao samba’a pei samba’a, palaong to etu raporapaka ewa bure to bae batuanginya etu. Wali matao kojo komi masingkatao samba’a pei samba’a.”