Dual Panel1Wali si’i-si’i kita nato’o i mPue Allah tare dosanta apa saba pangayanta. See naka kita masingkatao pei i Pue Allah apa saba to naika i Yesu Kerisitu, Pue ngkita.
2Kita mangaya Ia, wali see naka Ia mangika jaya see kita mangarata kanoto i mPue Allah. KanotoNya etu re’emo resi kita si’i-si’i. Wali kita ndende rayanta apa kita mansarumaka kojo kita datuwu sindara-ndara pei i Pue Allah ri raya ngkayawaNya.
3Pei si’a ojo pansarumakanta etu naka pei kita ndende rayanta. Kamonsonya nempo mangarata kasusa kita ndende seja rayanta, apa kita tansani yako ri kasusa to kita mangarata etu kita mawali maroso wo’u rayanta manta’amaka pansoba.
4Pasi yako ri karoso ndayanta etu see naka lengko ngkita mampakanasa monso pu’u anu to naaya ngkita. Panewa yako etu see naka maroso wo’u pansarumaka ngkita.
5Wali pansarumaka etu taa mangantipu kita. Apa samparia to kita mansarumaka etu paka damawali kojo. Apa i Pue Allah room mangawaika kita i Nosa Mapasing, pasi i Nosa Mapasing etu mampaponsanika ri raya ngkita ewa wimba kabaenya pamporayang i mPue Allah resi kita.
6Wali kita manasamo si’i-si’i mangkonong pamporayang i mPue Allah resi kita apa i Pue Allah mangampilis temponya, wali rata temponya to ipilisinya etu i Kerisitu mate mangkapateka kita. Tempo Ia mangkapateka kita etu kita taware karosonta pasi kita tiroo bali i mPue Allah.
7Wali ane ewa pampobuuka nto lino, sakowa tau to matao ia taa rani mangkapateka. Pei ane tau to manoto kojo, bara re’e yununya to mangkojeka damangkapateka tau etu. Pei taa biasa palaong etu mawali.
8Pei ane i Pue Allah Ia yusa. Si’a apa saba kita matao naka pei Ia mampaponsanika kita ewa wimba kabaenya pamporayangiNya resi kita. Tempo kita tiroowa tau madosa, tempo etu semo i Kerisitu mangkapateka kita.
9Wali matantu yako raa i ngKerisitu tempo Ia mangkapateka kita etu see naka kita rato’o tare dosanta. Wali ane ewa see matantu wo’u i Kerisitu damampalaes kita see kita tamo danahuku i mPue Allah.
10Pasi matantu tempo ruyu kita bali i mPue Allah, pei apa saba kapate nu AnaNya see naka kita rawali see maya masingkatao pei Ia. Wali ane kita roomo masingkatao pei i Pue Allah, wali matantu wo’u saba yako katuwu nu AnaNya see naka kita darapalaes see tamo danahuku i mPue Allah.
11Pei si’a ojo etu. Kita ndende kojo rayanta mampobuuka i Pue Allah apa saba to naika i Yesu Kerisitu, Pue ngkita. Saba yako to naika i Yesu Kerisitu see naka kita masingkatao pei i Pue Allah.
12Wali yako samba’a tau, etu semo i Adam, see naka mawali dosa ri lino si’i. Pasi yako ri dosa etu see naka re’e kapate. Wali samparia tau kono kapate apa samparia tau paka madosa.
13Wali tempo owi, tempo tawa re’e porenta i mPue Allah to rawaika resi i Musa, tempo etu samparia tau paka mangika dosa. Pei tau to mangika dosa etu tare to maya manganto’oka sira, “Komi mangewa porenta i mPue.” Naka pei taa maya manganto’o ewa see apa saba porenta etu tawa re’e wali taa masipato manganto’o sira mangewa porenta ane tawa re’e.
14Pei nempo ewa wetu, yako ri tempo i Adam rataka ri tempo i Musa samparia tau paka re’e ri ara ngkuasa ngkapate. Nempo tau to dosanya si’a ewa dosa to naika i Adam, sira samparia namate yaumo. Wali i Adam etu maya rapasiwajuka ewa tau to ma’i ri payunya, etu semo i Yesu Kerisitu, apa sira dua paka mangika palaong to re’e batuanginya resi to lino samparia.
15Pei bae kojo pasisalanya palaong to naika i Adam pasi palaong to naika i Yesu Kerisitu. Apa sora to nawai i mPue Allah saba yako palaong to naika i Yesu etu si’a ewa dosa to naika i Adam. Apa yako dosa ntau samba’a etu see naka boros tau mate yau. Pei yako palaong i mPue Allah see naka boros tau rasawang. Wali kanoto i mPue Allah pasi sora to iwaiNya etu to bae-bae kuasanya pei dosa i Adam apa kanotoNya pasi soraNya etu mangansawang tau boros. Palaong etu mawali apa saba kanoto yako samba’a tau, etu semo i Yesu Kerisitu.
16Pasi ewa si’i seja pasisalanya sora to nawaika i mPue Allah pasi palaong to mawali yako ri dosa i Adam. Apa i Adam mangika sangaya dosa see naka to lino nato’o i mPue Allah masipato rahuku. Yako etu malagi kojo wo’u tau mangika dosa panewa i Pue Allah mangawaika to lino sora. Wali yako ri sora etu see naka to lino maya nato’o i mPue Allah tare dosanya.
17Wali yako ri dosa ntau samba’a, etu semo i Adam, see naka samparia tau paka re’e ri ara ngkuasa ngkapate, apa kita samparia wiyaa i Adam. Pei palaong to naika samba’a tau to yusa wo’u, etu semo i Yesu Kerisitu, palaong etu semo to bae-bae kuasanya. Apa i Pue Allah manoto kojo resi kita, pasi Ia mangawaika kita sora, etu semo Ia manganto’o kita tare dosanta. Wali samparia tau to mangantima kanoto pasi sora i mPue Allah etu, tau etu rawaika kuasa see tare to maya manganangi sira ri raya ngkatuwunya apa saba palaong to naika i Yesu Kerisitu etu.
18Wali yako sangaya dosa to naika i Adam see naka samparia tau mawali masipato rahuku. Pasi ewa see seja yako sangaya palaong to naika i Yesu, to singkonong pei i Pue Allah, see naka samparia tau maya rato’o tare dosanya see sira mangarata katuwu to singkasaenya.
19Naka pei tau boros mawali tau madosa apa saba samba’a tau taa mampalaika i Pue Allah. Tau etu semo i Adam. Wali ewa see seja tau boros naka pei darato’o tare dosanya apa saba samba’a tau mampalaika i Pue Allah. Tau etu semo i Yesu.
20Wali naka pei i Pue Allah mangawaika to lino porentaNya see sira damawali manasanya sira tau madosa, apa sira sangkani mangewa porenta etu. Wali kanjo’u-njo’u tiduga-dugang tau mangika dosa. Pei nempo wimba kabaenya dosa ntau, ojo tiduga-dugang kanoto i mPue Allah. Wali kanoto i mPue Allah semo to bae kojo pei dosa ntau.
21Wali tempo ruyu, dosa re’e kuasa ri raya ngkatuwu ntau samparia see naka samparia tau mangarata kapate. Pei si’i-si’i kanoto i mPue Allah semo to re’e kuasa ri raya ngkatuwu ngkita. Wali yako ri kanotoNya etu i Pue Allah manganto’o kita tare dosanta see naka kita mangarata katuwu to singkasaenya apa saba to naika i Yesu Kerisitu, Pue ngkita.