Alkitab Mobile SABDA
[VER] : [TAA]     [PL]  [PB] 
 <<  Wahyu 3 >> 

1Wali yako etu i Pue manganto’oka wo’u aku, “Tulisika seja pomakau ntau to mangaya Aku to siromu nja’u kota Sardis. To’oka ia: Si’i gombo yako resi Ia to re’e pitu nosa i mPue Allah pasi pitu batu’e. Ia manganto’o, Aku kunsani lengko ngkomi. Ane ri pangkita ntau, katuwu ngkomi matao, pei kamonsonya pangaya ngkomi matem.

2Wali pambangu, pei pakaroso pangaya ngkomi see taa damate seja anu to re’ewa resi komi mayu’u. Apa Aku mangkita lengko ngkomi taa masilonga ri pangkita i mPue Allah.

3Wali ne’e mangkalingan anu to rapotundeka komi to komi mampodongeka kojo seore. Luluka to etu pasi ndolika tangomu yako ri dosamu. Pei ane komi ojo yore-yore, komi taa damangansani tempo Aku darata ewa naika nto palima.

4Pei re’e bara sawei mba’a komi nja’u Sardis to mampakalongko yako ri dosa ewa naika ntau mangajagai pakenya see taa kono anu to makarika. Tau etu damalinja sindara-ndara pei Aku, pasi damangampake pake to buya apa sira masipato mampake.

5I sema to menang, ia semo to damangampake pake to buya etu. Pasi Aku taa damampalasi sanganya yako ri raya buku to rapangantulis sanga ntau to tuwu, etu semo buku ngkatuwu. Pei Aku damampongakung sanganya etu ri tango mPa’angKu pasi ri tango mpomakauNya, Aku damanganto’o, ‘Tau si’i mangaya Aku.’

6Si’i gombo i Nosa Mapasing resi komi to mangaya. Wali i sema tau to nadonge ntalinganya, padongeka.”

7Wali yako etu i Pue manganto’oka wo’u aku, “Tulisika seja pomakau ntau to mangaya Aku to siromu nja’u kota Piladelpia. To’oka ia: Si’i gombo yako resi Ia to mapasing pasi to monso, to re’e kuasa seja ewa kuasa i Makole Daud tempo owi. Kuasa etu raporapaka ewa kunsi. Wali ane Ia mangaloka wombo, tare tau to maya mangaba’a, pasi ane Ia mangaba’a, tare to maya mangaloka. Batuanginya tare tau to maya mangewa Ia.

8Wali Ia manganto’o, Aku re’e mangaloka wombo ri tango ngkomi, wombo etu tare tau to maya mangaba’a. Aku Kunsani lengko ngkomi. Pasi Kunsani komi taa bae karosomu, pei komi taa mandoo mangalulu pamporaningKu pasi komi taa mamposapuka Aku nempo taa bae karosomu.

9Ewa si’i daKuika resi tau Yahudi to mawutis mampoanika mangalulu agama nto Yahudi, pei to mampue resi Kepala Measa. Tau to etu Aku daKupakasaaka dayau madungku yau ri tana ri tango mbiti ngkomi. Wali sira damangansani Aku mamporayang komi.

10Wali Aku damangararamaka komi ane ratamo temponya pansoba to damangansoba samparia to lino, apa komi re’e mampolaika porentangKu to manganto’o pakabae sabaramu ri raya ngkasusa to nurata ngkomi.

11Aku majoli dama’i, wali luluka kojo anu to nululuka ngkomi tempo si’i, apa ane komi damangaluluka, tare to maya mangoko yau dale to danurata ngkomi. Dale etu raporapaka ewa so’o mbo’o to meyawa to narata ntau to menang.

12Wali i sema to menang, tau etu Aku damangika maroo-roo singkasaenya ri raya banua i mPue AllahngKu ewa tinja to taa miyai yako nja’u ria. Aku damangantulis togo sanga ri koro ntau etu. Aku damangantulis sanga i mPue AllahngKu, pasi sangangKu to bou, pasi daKutulis seja sanga ngkota i mPue AllahngKu, etu semo Yerusalem to bou to ma’i yako resi i Pue AllahngKu ndate saruga.

13Si’i gombo i Nosa Mapasing resi komi to mangaya. Wali i sema to nadonge ntalinganya, padongeka.”

14Wali yako etu i Pue manganto’oka wo’u aku, “Tulisika seja pomakau ntau to mangaya Aku to siromu nja’u kota Laodikia. To’oka ia: Si’i gombo yako resi i Amin. Ia semo mata manasa anu to monso pasi to maya rasarumaka. Pasi samparia to napapowali i mPue Allah, Ia semo to mangkuasang.

15Wali Ia manganto’o, Aku Kunsani lengko ngkomi. Komi taa loto pei taa seja mapoi. PamporaningKu komi bara loto bara mapoi.

16Pei komi ojo maramo. Aku taa masanang ane komi ojo maramo, wali Aku damayua yau komi yako ri ngangangKu.

17Apa komi manganto’o, ‘Kami tau to sugi, kami boros to re’e resi kami, kami tamo re’e to kami mampoipu.’ Ewa see gombo ngkomi, pei komi taa mangansani ewa wimba kamonsonya kojo komi. Kamonsonya komi masiasi kojo. Komi taa sugi, komi buta pasi lambe.

18Wali see naka Aku manganto’oka komi oli weyawa yako resi Aku to roomo rapoapu pasi mayongo. Oli weyawa etu see komi dasugi. Pasi oli seja pake to buya danuposunsuka ngkomi see tamo lambe pasi taa mea nakita nsa’e. Pasi oli seja pakuli see maya darapokulirika matamu see komi maya mangkita muni rao.

19Wali Aku manganto’oka komi ewa see apa Aku mamporayang komi. Tau to Kuporayang, tau etu Aku manganseko pasi mangantidas. Wali pakadota rayamu pasi pajeamo.

20Lo’aka aku. Aku makore ri tango nu wombo pei mangadedek wombo etu pasi mampokio. Wali ane re’e tau to mangandonge loongKu, pei mangalokasika wombo, Aku damasua resi tau etu pei mangkoni sindarandara pei ia pasi ia damangkoni sindarandara pei Aku.

21Wali i sema tau to menang, tau etu Aku damangawaika kuasa matunda ri gadera makole sindara-ndara pei Aku, sewaju ewa nikangKu menang pasi matunda sindara-ndara pei Pa’angKu ri gadera to si Ia.

22Si’i gombo i Nosa Mapasing resi komi to mangaya. Wali i sema tau to nadonge ntalinganya, padongeka.”


  Share Facebook  |  Share Twitter

Download Audio MP3 (Wahyu 3):
Mobile (Low Quality) - CD (High Quality)

 <<  Wahyu 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel