Dual Panel1Wali roo see aku mangkita wo’u opo mba’a pomakau i mPue Allah makore ri wawo lino ponto sunonya opo etu. Samba’a ri tondo mata nu eo, samba’a tondo kasoyo nu eo, pasi samba’a tondo ri selatan, samba’a tondo ri utara. Sira opo manganta’amaka ngoyu yako ri tampa to si sira samba’a pei samba’a. Wali lino pasi tasi pasi kaju tamore to natawuis nu ngoyu.
2Panewa roo see aku mangkita wo’u samba’a pomakau i mPue Allah ia masuwu yako ri tondo mata nu eo. Ia mangkeni tondong yako resi i Pue Allah, tondong etu rapake mangantondong tau to i Pue Allah Puenya. Wali pomakau to samba’a etu ia maroso loonya kaboo mangampokio pomakau to opo mba’a to rawaika kuasa mampakaja’aka yau lino pasi tasi.
3Ia manganto’oka sira, “Ne’ewa mampakaja’aka lino, tasi pasi kaju. Kami damangantondong kire ntau to mangika palaong i mPue Allahnta. Ane roomo kami mangantondong sira, panewa komi maya mampakaja’aka lino, tasi, pasi kaju.”
4Wali karoonya pomakau etu magombo, panewa aku mangandonge mangkonong tau to ratondong etu. Sira satu opo mpuyu pei opo nsowu kaborosinya tau yako ri ponto ponto wiyaa nto Israel.
5Yako ri wiyaa i Yehuda, sampuyu pei dua nsowu kaborosinya tau to ratondong. Pasi ewa see seja kaborosinya to yako ri wiyaa i Ruben, i Gad,
6i Asyer, i Naptali, i Manase,
7i Simeon, i Lewi, i Isakar,
8i Sebulon, i Yusup pasi i Benyamin. Wali pontoponto wiyaa etu re’e satu opo mpuyu pei opo nsowu tau to ratondong.
9Wali yako etu aku mangalo’a pei mangkita tau to boros kojo. Tau etu taa ransani mangabilang apa boros kojo. Tau boros etu yako ri sambawo lino. Etu semo yako ri ponto-ponto paporenta, pasi pontoponto suku, pasi ponto-ponto bansa pasi ponto-ponto basa. Sira makore ri tango nggadera i mPue Allah pasi ri tango nu Ana Domba. Sira mangampake baju to buya pasi sira mangkongko ira to ewa ira ngkaju wai.
10Wali sira maroso loonya manganto’o, “Kita napalaes i mPue Allahnta anu matunda ri gaderaNya, pasi napalaes seja nu Ana Domba.”
11Wali samparia pomakau i mPue Allah sira makore tiku gadera i mPue Allah etu pasi tiku ketua-ketua to dua mpuyu pei opo pasi anu to tuwu to opo. Panewa pomakau etu sira madungku yau ri tana ri tango nggadera i mPue Allah. Sira mampue mampakabae Ia.
12Sira manganto’o, “Amin! Kita mangabarong Pue ngkita, i Pue Allah. Kita mampakabae Ia pasi magombo mangkonong kapandeNya. Kita manganto’oka Ia tarima matao pasi manga’angga Ia. Kita magombo mangkonong kuasaNya pasi karosoNya rataka ri singkasaenya. Amin!” Ewa wetu gombo mpomakau i mPue Allah.
13Wali yako etu re’e samba’a ketua to mampotanaka resi aku, ia manganto’o, “Sema tau boros si’i, tau to mangampake baju to buya? Yako imbare sira?”
14Wali aku mangansono, manganto’oka ia, “Taa kunsani, Pa’a. Komi semo to mangansani.” Panewa ketua etu manganto’oka aku, “Tau si’i semo to masuwu yako ri kasesa to mapari kojo. Sira roomo mangantatap bajunya ri raa nu Ana Domba wali bajunya etu mawali buya.
15“Wali apa sira roomo mangantatap bajunya etu ri raa nu Ana Domba, see naka sira maya mampotango gadera i mPue Allah pasi wuri eo sira mangika palaong i mPue Allah ri raya BanuaNya. Wali Ia to matunda ri gaderaNya etu, Ia dasiwaka pei sira pasi damangantorung sira.
16Wali sira tamo damangepe moro pasi mara nganganya. Pasi pana nu eo bara kapoi nu eo tamo dakono wo’u sira.
17Apa Ana nu Domba anu to maporenta sindara-ndara pei i Pue Allah Ia damawali to pangkampang nsira. Ia damangawawa sira njo’u mata nue to mangawaika sira katuwu. Pasi i Pue Allah damampalasi yau samparia ue mata nsira.