Alkitab Mobile SABDA
[VER] : [TAA]     [PL]  [PB] 
 <<  Yohanes 13 >> 

1Wali yako etu, mosumo temponya Roa Paskah. Tempo etu i Yesu mangansani ratamo temponya Ia dapolas yako ri lino si’i dayau muni resi Pa’aNya. Wali ri raya ngkatuwu i Yesu ri lino, Ia tare pandooNya mamporayang joaNya to lino, pei tempo etu Ia damampaponsanika resi sira bae kojo pamporayangiNya etu.

2Wali yau wengi i Yesu pasi kami to anaguruNya mangkoni. Pasi i Kepala nto pantipu roomo mangawaika i Yudas Iskariot, ana i nSimon, pampobuuka see ia mansongka damamposora yau i Yesu.

3Pei i Yesu mangansani Ia ma’i yako resi i Pue Allah pasi Ia damawolili muni resi i Pue Allah. Pasi Ia mangansani Pa’aNya roomo mangawaika Ia kuasa mampasilonga samparia to mawali.

4Wali tongotongonya kami mangkoni Ia damampaponsanika kami to anaguruNya pamporayangiNya see naka Ia damangika palaong to masipato naika ntau to ojo to papolaong. Wali Ia makore pei mangawonsu yau jubaNya panewa mamponopi handu.

5Roo see Ia mangawubu ue lo’u raya nu loya panewa mula mamposo’i witi mami ewa biasa naika nto papolaong ntau pue banua resi tau to rata ri banuanya etu. Roo naposo’i witi mami, Ia mampalasika handu to naponopi etu.

6Pei ojo karata i Yesu ri tango i nSimon Petrus, Petrus manganto’oka Ia, “Gete, Pue! Maka pei Komi to bae anggaMu pei damamposo’i witingku?”

7Wali i Yesu mangansono, Ia manganto’o, “Korom tawa mangansani batuanginya palaong to Aku mangika si’i. Pei tempo to darata korom damanasa.”

8Pei i Petrus tiroo manganto’o, “Ne’e, Pue! Aku taa kojo damangawaika Komi mamposo’i witingku! Pei i Yesu manganto’oka ia, “Ane Aku taa mamposo’i witi ngkorom, korom taa maya masingkatao pei Aku.”

9Wali i Petrus manganto’o, “Ane ewa see, Pue, ne’e ojo witingku nuposo’i ngKomi. Palengku pasi wo’ongku seja!”

10Pei i Yesu manganto’o, “Tau to roomo mandiu, tau etu mayongomo, wali jamo witinya to raposo’i wo’u. Pasi ewa see seja komi, apa raya ngkomi mayongomo ri pangkita i mPue Allah. Pei taa samparia komi to mayongo rayamu.”

11Naka pei i Yesu manganto’o taa samparia kami to mayongo raya mami, apa Ia mangansani yami i sema to damamposora yau Ia.

12Wali ojo karoonya i Yesu mamposo’i witi mami Ia mamposunsuka muni jubaNya pei matunda wo’u nja’u wakaNya. Roo see Ia manganto’oka kami, “Wimba komi bara mangansani batuanginya palaong to Aku owo room mangika resi komi etu?

13Ewa si’i batuanginya. Komi manganto’oka Aku ‘Pa’a Guru’ pasi ‘Pue’. Wali masipato kojo komi manganto’o ewa wetu, apa Aku monso pu’u Guru pasi Pue ngkomi.

14Wali ane sakowa Aku, Guru pasi Pue ngkomi, pei mamposo’i witi ngkomi, masipato kojo komi masiposo’i witi ngkomi samba’a pei samba’a.

15Apa Aku manganto’oka komi, monso pu’u si’a to papolaong to bae-bae angganya pei tau puenya. Tau puenya semo to baebae angganya. Pasi si’a pomakau to bae-bae angganya pei tau to mampokau ia. Tau to mampokau ia semo to bae-bae angganya. Wali naka pei Aku to Pue ngkomi pei mangika palaong nto papolaong etu see damawali tondong resi komi, see komi damawali seja ewa to papolaong nu yunu ngkomi sewaju ewa Aku roomo mangika resi komi etu.

16(13:15)

17Wali si’i-si’i komi manasamo palaong to Aku nangika etu, wali see naka ane komi mampolengkoka, komi damasanang.

18Wali gombo to Aku damanganto’o si’i si’a mangkonong komi samparia, apa Aku mangansani raya ngkomi to Aku room mangampilis. Wali Aku Kunsani re’e samba’a komi to damamposora yau Aku. Palaong etu damangabanang gombongKu to ratulis yami ri raya ntuntu i mPue Allah tempo owi. Gombo etu manganto’o, ‘Tau to mangkoni sindarandara pei Aku, tau etu roomo mawali yau balingKu.’ Etu semo gombongKu to ratulis yami ri raya ntuntu i mPue Allah tempo owi etu.

19Wali Aku manganto’oka yami komi mangkonong palaong to damawali etu, see ane roomo mawali palaong to etu, komi damangaya Aku semo to re’emo yako ri singkasaenya.

20Wali Aku manganto’oka komi, monso pu’u, i sema tau to manga’angga pomakaungKu, tau etu sewaju ewa manga’angga Aku. Pasi i sema tau to manga’angga Aku, tau etu sewaju ewa manga’angga Ia to nampokau Aku.”

21Wali ojo karoonya i Yesu manganto’o gombo etu Ia mawali masusa kojo rayaNya. Pasi Ia mampaponsanika kami to anaguruNya, Ia manganto’o, “Aku manganto’oka komi, monso pu’u re’e samba’a komi to damamposora yau Aku resi balingKu.”

22Wali tempo kami mangandonge gomboNya etu, kami mangalo’aka resi yunu mami samba’a pei samba’a, apa ipu raya mami mampobuuka bara i sema kami to nato’o i Yesu etu.

23Samba’a kami, anaguru to naporayang kojo i Yesu, ia matunda ri awe i Yesu wali nakoto matombo ri dadaNya.

24Wali i Simon Petrus mangangkawes anaguruNya etu pei manganto’o, “Patanaka resi Ia bara sema kita to Ia manganto’o etu.”

25Wali anaguruNya to etu ia matombo muni resi i Yesu pei mampotanaka resi Ia, to’onya, “Pue, i sema tau to nuto’o ngKomi etu?”

26Wali i Yesu manganto’o, “Tau to daKuwaika roti si’i tempo Aku roomo mangantuika ri ue nu ira ngkaju, tau etu semo.” Wali ojo panganto’o i Yesu gombo etu, Ia mangantuika sampesu roti ri ue nu ira ngkaju panewa roti etu Ia mangawaika resi i Yudas Iskariot, ana i nSimon.

27Pei ojo pangoko i Yudas roti etu, i Kepala Measa mamposuak ia. Wali i Yesu manganto’oka i Yudas, “Intamo nakajoli pei ika palaong to danuika etu.” Ewa wetu nato’oka i Yesu i Yudas.

28Wali i Yudas mangkoni roti to nawaika i Yesu resi ia etu, panewa ia mansaka miyai yako ri raya banua. Tempo etu mawurimo rao. Pei kami to anaguru i Yesu to yusa to mangkoni sindarandara etu, tare kami to mangansani batuanginya naka pei i Yesu manganto’oka i Yudas gombo etu. Re’e kami to mampondayaka i Yesu manganto’oka i Yudas yau mangoli anu to danapake mami ri tempo roa. Pasi re’e to mampobuuka i Yesu manganto’oka ia yau mangawaika doi resi tau to masiasi. Naka pei kami mampobuuka ewa wetu apa i Yudas semo to mangkongko tas to naka la’u nu doi mami.

29(13:28)

30(13:28)

31Wali payu i Yudas yau, i Yesu magombo resi kami to anaguruNya to yusa mangkonong kapateNya pasi mangkonong pambanguNya muni yako ri kapateNya etu, Ia manganto’o, “Ratamo temponya tau damangansani Aku, Wiyaa nto Lino, Aku masipato rabarong. Pasi yako palaong to damawali resi Aku, see naka tau damanasa seja i Pue Allah Ia masipato rabarong.

32Wali tempo tau mangabarong i Pue Allah apa saba palaong to mawali resi Aku etu, tempo etu i Pue Allah mansaka damampakanasaka tau Aku seja masipato rabarong.

33Wali ana-anangKu, Aku tamo masae maroo dasiwaka pei komi. Wali ewa Aku manganto’oka kepala-kepala nto Yahudi seore, ewa wetu seja Aku manganto’oka komi. Etu semo, komi damangaliwu Aku, pei komi tawa maya yau ri tampa to daKukayako.

34Wali si’i-si’i Aku mangawaika komi porenta to bou. Etu semo, masiporayang. Ewa inikangKu mamporayang komi, ewa see seja danuika ngkomi masiporayang.

35Wali ane komi masiporayang, palaong to etu damawali tondong see samparia tau damangansani komi anagurungKu.”

36Wali ojo panganto’o i Yesu gombo etu, i Simon Petrus mampotanaka resi Ia, ia manganto’o, “Pue, imba danukayako ngKomi?” Wali i Yesu mangansono, “Tempo si’i komi tawa maya mangalulu Aku njo’u tampa to daKukayako. Pei tempo to darata komi damangalulu Aku.”

37Wali i Petrus manganto’o, “Pue, maka pei aku taa maya mangalulu Komi tempo si’i? Aku nempo mangkapateka Komi, aku buya rayangku.”

38Pei i Yesu manganto’o, “Wimba, bara monso pu’u korom manganto’o buya rayamu mangkapateka Aku? Aku manganto’oka korom, monso pu’u re’e katawanya manu matotoro’o nene si’i, korom togo ngkanimo damamposapuka Aku.”


  Share Facebook  |  Share Twitter

Download Audio MP3 (Yohanes 13):
Mobile (Low Quality) - CD (High Quality)

 <<  Yohanes 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel