Alkitab Mobile SABDA
[VER] : [TABARU]     [PL]  [PB] 
 <<  1 Yohanes 3 >> 

1Niamake ma Jo'oungu ma Dutu posironga de wonadoraka, so ngone wonadiai to 'una 'awi ngowa-ngowaka. De ma goungu ngone ne'ena to 'una 'awi ngowa-ngowaka. Ge'enau so 'o dunia 'iti-tingkai ne'ena koinanakowa ngone, sababu 'o dunia ma Jo'oungu ma Dutu kowinakowa.

2'Esa moi riaka dodoto tinisiboso-bosono! Ma 'orasi ne'ena ngone ne'ena ma Jo'oungu ma Dutu 'awi ngowa-ngowaka. Ma koiwaituawasi kokia dua to ngone nanga lugo. Ma ngone panakokau 'ato gee dua ma Kristus woboali, ngone 'asa podadi 'isoka 'una, sababu ngone 'asa powimake 'una de 'awi lugo ma gou-goungu.

3'O nyawa 'iodumu gee yongano-nganonou ne'ena ma Kristusoka, yomasitiari la ma gou-goungu yotebini, yotebini 'o sowonoka, 'isoka ma Kristus 'una ge'ena wotebini.

4'O nyawa gee 'o sowono yodiai, ge'ena yaparene ma Jo'oungu ma Dutu 'awi besesongo; sababu 'o sowono ge'ena ma Jo'oungu ma Dutu 'awi besesongo paparene.

5Ngini nianakokau 'ato ma Kristus woboa ma ngale wakokiisanga to ngone nanga sowono, de 'unaka 'o sowono koi'iwa.

6'O nyawa 'iodumu gee yo'ahu yomarimoi de ma Kristus, ge'ena koitaurikawa 'o sowono yodiai. 'O nyawa gee koyomaogo-ogoruwa 'o sowono yodiai, koma'iwa wimake bolo winako ma Kristus.

7'Ai ngowa-ngowaka, 'uwa nimasimadaka nago'ona bato nisiliba. 'O nyawa gee yodi-diai 'iti-tiai, 'ona manga singina 'iti-tiai 'isoka ma Kristus 'una wotiai.

8Ma 'o nyawa gee koyomaogo-ogoruwa 'o sowono yodiai, 'ona ge'ena 'o Tokata ma Koana ma ngowaka, sababu 'o Tokata ma Koana 'ena 'isowonokau ka ma guruenosi. Ma ngale ne'enau so ma Jo'oungu ma Dutu 'awi Ngowaka woboa la waisanga 'o Tokata ma Koana ma manarama.

9'O nyawa gee yodadiokau ma Jo'oungu ma Dutu 'awi ngowaka, koitaurikawa 'o sowono yodiai, sababu ma Jo'oungu ma Dutu ma sirete 'awi lugo naga de ma 'ena 'onaka. De ngano ma Jo'oungu ma Dutu ge'ena to 'ona manga Dea, so 'ona koitaurikawa 'o sowono yodiai.

10Ne'enau ma no-nako 'imakaregu ma Jo'oungu ma Dutu 'awi ngowa-ngowaka de 'o Tokata ma Koana ma ngowa-ngowaka: Nago'ona koyamotekuwa ma Jo'oungu ma Dutu 'awi mau, bolo koyakisibosonuwa manga 'esa moi, 'ona ge'ena ko ma Jo'oungu ma Dutuwa 'awi ngowa-ngowaka.

11Ka ma guruenosi nisitotarokau nginika 'o habari ne'ena: Ngone salingou pomasikamara'ai moi de moi.

12'Uwa ngone 'isoka 'o Kain la wodadi 'o Tokata ma Koana ma ngowaka de wito'oma 'awi dodoto ma dutu. 'Ido'oa so 'o Kain 'awi dodoto wato'oma? Sababu 'okia naga gee 'o Kain wadi-diai ge'ena 'isowono, ma 'okia naga gee ma dodoto wadi-diai ge'ena yadaene.

13So 'Esa moi riaka dodoto, 'uwa nioherangi nako 'o dunia ma nyawa gee kowimote-motekuwa ma Jo'oungu ma Dutu nidu'uduku.

14Ngone panakokau 'ato ngone posupuokau 'o songenoka, de pomato'oraokau 'o 'ahuka, sababu ngone posimara'ai nanga 'esa moi. 'O nyawa gee koyosibosonuwa manga 'esa moi, ge'ena ma ngale ka 'o songenosi yakiparetano.

15'O nyawa gee manga 'esa moi yodu-du'uduku ge'ena yoto-to'oma, de nianakokau 'o nyawa yoto-to'oma ge'ena koyamakewa 'o 'ahu 'ika-kakali.

16Ma ngekomo ne'enau ngone panako kokia pomasikamara'ai moi de moi: Ma Kristus wosongene ma ngale ngone, so ngone mita salingou nanga 'ahu posarakani ma ngale nanga 'esa moi!

17Nagu'una 'awi kia sonaa de ma 'enaka de wimake 'awi 'esa moi wisidukuranguku ma kowiriwowa, kokia 'o nyawa de wi kia sonaaka gu'una wongose 'ato 'una ma Jo'oungu ma Dutu wisibosono?

18'Ai ngowa-ngowaka, pomasikamara'ai 'uwa duga ka nanga 'uru ma kaioka, la 'ena de nanga dora ma gou-goungu, gee 'iwaiti naga nanga 'ahuoka.

19Koge'ena ma ngekomo ngone panako 'ato ngone ne'ena ma gou-goungu ma Jo'oungu ma Dutu 'awi ngowa-ngowaka, de nanga singina 'idadi 'iriidi ma Jo'oungu ma Dutu 'awi bionoka.

20Ngone 'idadi panako, nako to ngone nanga singinaka doka pamao pasalakau ma, ma Jo'oungu ma Dutu 'ifoloi 'awi barija 'iamoko de to ngone so 'una 'ifoloi wanako. De 'una wanako 'okia sonaa 'iodumu.

21So 'Esa moi, nako to ngone nanga singina koinasisalawa, ngone 'idadi pobarani potaari ma Jo'oungu ma Dutuka.

22De 'okia naga pomaga'asoko 'unaka, ge'ena pomadamake, sababu posingounu 'awi be-besesongo de padiai gee 'awi singina ma mau.

23De ne'ena 'awi besesongo ge'ena la: Ngone salingou powingaku 'awi Ngowaika ge'ena la ma Yesus Kristusika, de salingou pomasikamara'ai 'isoka ma Kristus wonasulokokau.

24'O nyawa 'iodumu gee yamote-moteke ma Jo'oungu ma Dutu wi pareta, 'ona ge'ena de ma Jo'oungu ma Dutu, de ma Jo'oungu ma Dutu de de 'ona. De ngone panako ma Jo'oungu ma Dutu naga de de ngone, sababu 'awi Ngomasa wonakulakau.


  Share Facebook  |  Share Twitter

Download Audio MP3 (1 Yohanes 3):
Mobile (Low Quality) - CD (High Quality)

 <<  1 Yohanes 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel