Dual Panel1Nosi-singina naneda: 'O wange ma du-du'uruoka dua 'o susa 'o gudai.
2'O nyawa 'asa yosilamo-lamo ka to 'ona ma sirete manga roesino, ka 'o pipiou yodopokana, 'o gedenge de manga demo-demo kadakuino. 'Ona yoduaka 'o nyawa yasela-sela, yakidukuata 'o balusika, koyanakowa yo'amalaha, de yodu'uduku 'okia sonaa gee ma Jo'oungu ma Dutu wodua-duaka.
3'Ona yooluku yakidora 'o nyawaka, yooluku yakisipidili 'o nyawa manga sowono, 'ona yoduaka yodiai 'o nyawa manga ronga ma dorou, yomarofu-rofu, yotabangamo, de koyoduakuwa yaowa-owa.
4'Ona yoduaka yobadingaka, yomaie-ie, de yomatibangi koikurutuwa. 'Ona 'ifoloi yoduaka 'o dunia ma sanangi de kowimotekuwa ma Jo'oungu ma Dutu.
5Ngaro pakimakeka ma Jo'oungu ma Dutuka wisuba-suba, ma 'ona kowingakuwa de yaitomo 'awi pareta. 'Uwa niakiduarika 'o nyawa-nyawa koge'ena.
6Naga 'onaka gee munuka yowosangokau 'o woa-woaka de yaki'akunokau 'o nge-ngeweka gee yohaga-haga, gee manga sowono posironga ma amooka, de 'o nyafisuu 'i'ini-'inioka yakiparetano.
7'O nge-ngeweka go'ona kaitaurika yomaga'asoko la nago'ona bato yakidotoko, ma koma'iwa yasahe 'o do-dotoko 'iti-tiai gee ma Jo'oungu ma Dutuno.
8'Isoka ma sira 'o Yanes de 'o Yambres yomalawani 'o Musaka, koge'enali mita 'o guru-guru ma ngeluku go'ona yalawani 'o do-dotoko ma Jo'oungu ma Dutuno. To 'ona manga di-dibangi de manga ngo-ngaku 'itorouokau.
9Ngaro koge'ena ma to 'ona manga manarama ge'ena dua koisigilawau, sababu 'o nyawa 'iodumu 'asa yanako to 'ona manga haga-haga, 'isoka 'o Yanes de 'o Yambres.
10Ma ngona namoteokau to ngoi 'ai do-dotoko, 'ai gokoie de 'ai gogeruku, de 'ai 'ahu ma dumutu. Ngona ma sirete namakekau kokia ngoi tongaku ma gou-goungu ma Yesus Kristusika de takidora 'o nyawa-nyawa. Ngona nanako mita 'ai sabari 'iamoko de totongosono.
11Ngona namakekau ngoi 'isikisaa de tosangisara. Ngona nakokinako 'okia naga 'idadi ngoioka 'o Antiokhiaka, 'o Ikoniumoka, de 'o Listraka. De ngona nanakokau 'ai sangisara 'iodumu! Duga ma Jou woiriwo woisipidilokau ge'ena 'iodumoka.
12Ma goungu 'o nyawa 'iodumu gee yomau manga 'ahu 'itebini de yomarimoi de ma Kristus Yesus, 'asa yakisikisaa,
13'ena 'o nyawa gee yoti-tingkai de gee yosihaga-haga 'asa kayodofoloi monga yotingkai. 'Ona yosihaga 'o nyawa 'iregu 'ena 'ona mita yakisihaga.
14Ma ngona Timotius, salingou nomasiga-gao ma gou-goungu 'o do-dotoko 'iti-tiaika gee nisidotokokau de gee nakokingakuokau, sababu ngona nanakokau gee nago'ona nidoto-dotoko.
15De salingou nosi-singina gee ngona ka 'o ngowakosi 'ena nanakokau 'o Buku 'Itebi-tebini. 'O Buku 'Itebi-tebini ge'ena nisibarija so nasahe ma ngale ma Jo'oungu ma Dutu wonisilaha ma ngekomo nongaku ma Kristus Yesusika.
16'Iodumu gee 'isilefo-lefoku 'o Buku 'Itebi-tebinoka, ge'ena ma Jo'oungu ma Dutuoka de yaino, de ma faedaa ma ngale 'isidotoko 'iti-tiai, 'isidawanono de 'isikadiai gee koiti-tiaiwasi, de yakidotoko 'o nyawa la yo'ahu moteke ma Jo'oungu ma Dutu wi mau.
17De ma Buku 'Itebi-tebini ge'ena, 'o nyawa gee wileleani ma Jo'oungu ma Dutu 'idadi yakisitotomo ma ngale 'o sagala manarama yaowa-owa.