Alkitab Mobile SABDA
[VER] : [TABARU]     [PL]  [PB] 
 <<  Efesus 2 >> 

1Ma sira ngini matero kaniosongenokau, sababu niosowono de niaparene ma Jo'oungu ma Dutu 'awi besesongo.

2Ma 'orasi ge'ena ngini nio'ahu 'o sowono ma sigoronaka, sababu niamoteke ka 'o duniaka ne'ena ma mau-mau, ma ngale ngini niodomoteke 'o Tokata ma Koana gee yapa-pareta 'o sagala ngomasa ma dorou 'o ngawa-ngawaka. 'Enau ne'ena naga yakiparetano 'o nyawa gee kowisingou-ngounuwa ma Jo'oungu ma Dutu.

3Ma sira ngone mita 'isoka gee koyosingou-ngounuwa ma Jo'oungu ma Dutuka. Ngone po'ahu moteke ka to ngone nanga mau, de padiai 'okia sonaa moi-moi moteke nanga nyafisuu de nanga di-dibangi 'ito-torou. Ma 'orasi ge'ena ngone mita yadaene ma Jo'oungu ma Dutu 'awi gorosau 'inadaene 'isoka 'o nyawa 'ireguoli.

4Duga ma Jo'oungu ma Dutu 'awi singina posironga de 'isureka! 'Una wonadora ma sala,

5so ngaro ma sira ngone matero kaposongenokau sababu posowo-sowono, ma ne'ena naga ma Jo'oungu ma Dutu wonasiwangokali de ma Kristus. So duga ka ma Jo'oungu ma Dutu 'awi singina ma sure, so ngini winisilaha.

6Sababu pomarimoiokau de ma Kristus Yesus, so ma Jo'oungu ma Dutu wonakulakau 'o 'ahu ma sungi ma ngale po'ahu de ma Kristus, la ngone mita popareta de de 'una 'o sorogaaka.

7Ma Jo'oungu ma Dutu koge'ena wodiai la 'o 'orasi nanga bionika 'o nyawa 'idadi yamake to 'una 'awi dora posironga ma amoko. 'Awi dora ge'ena wosidumutu de 'awi singina ma sure ngoneno, ma ngekomo ma Kristus Yesus. Sababu ma Jo'oungu ma Dutu 'awi singina 'isure, so winisilaha ngano niongaku 'o Yesusika. Ngini nisilaha ge'ena sababu ko nginiwa ma sirete nimariwo, ma ge'ena sababu ma Jo'oungu ma Dutu 'awi singina ma sure. So ka moi ma 'uwa yomaie ma ngale ge'ena. Ge'ena ka to nginiwa nia gangela, so ka moi ma 'uwa nimaie.

8(2:7)

9(2:7)

10Ngone ne'ena ma Jo'oungu ma Dutu wi do-dadi. Ngone ne'ena ma Jo'oungu ma Dutu wodiai nanga 'ahu ma sungiou ma ngekomo pomarimoi de ma Kristus Yesus, la ngone padiai 'okia sonaa yaowa-owa gee wadua-duangou ma ngale ngone.

11Ngini gee ko 'o Yahudiokawa, niongano-nganono ma sira to ngini nia jako kokia. Ma sira 'o Yahudioka nisironga ngini ge'ena "'o nyawa gee konisuna-sunawa", de 'ona yomasironga "'o nyawa gee yakisuna-suna". ('O suna ge'ena ka 'o nyawa yodiai, ma ngale 'o no-nako manga roesoka 'ato 'ona ge'ena ma Jo'oungu ma Dutu 'awi 'umati.)

12Ma 'orasi ge'ena ngini konimarimoiwa de ma Kristus, ge'enau so ngini konisido-doimuwa ma Jo'oungu ma Dutu 'awi kawasaka gee wakiiri-iriki. So ma rai ngini 'isoka 'o nyawa ma dudunino. Ngini konisido-doimuwa gee naga ma Jo'oungu ma Dutu wosijaji-jajiokau 'awi 'umatika, de ngini nio'ahu 'o duniaka ne'ena 'ania singina nganono koi'iwa, de kowininakowa ma Jo'oungu ma Dutu.

13Ma sira ngini niokurutoka ma Jo'oungu ma Dutuoka. Ma ne'ena ngini nimarimoiokau de ma Kristus Yesus, so ngini nisisoriokau ma Jo'oungu ma Dutuka ngano ma Kristus womodeke wosongene 'o salipoka.

14Sababu ma Kristus 'una ge'ena wonasikakatiai. 'Una wonasikatoomu 'o Yahudioka de ko 'o Yahudiokawa podadi ka moi. 'O kadu'uduku gee ma sira 'inasikakati-tingaka matero 'o be-beno 'ikuru-kurutie, ma Kristus waisangokau ma ngekomo womasisarakani wiso-songene ma ngale watuusu nanga so-sowono.

15So ma rai 'o Yahudioka manga 'agama ma besesongo de ma 'atorangi ma Kristus kowapakewau, la ko 'o Yahudiokawa de ma Yahudioka gee pomarimoi podadi 'o nyawa nanga 'ahu ma sungi gee pomarimoiokau de ma Kristus. Ma ngekomo koge'enau ma Kristus wonasikatiai.

16Ma Kristus wonasikatoomu ko 'o Yahudiokawa de 'o Yahudioka, de wonadiai nanga 'ahu 'itiai ma Jo'oungu ma Dutu 'awi bionoka, ge'ena ma ngekomo 'una wosongene 'o salipoka so pomakasanangiokau.

17Ma sababu ge'enau so ma Kristus woboa wositotara 'o Habari ma Owa ma ngale pomakasa-sanangi. Ma Habari ma Owa ge'ena wositotara nginika gee ko 'o Yahudiokawa, gee ma sira winikurutoka ma Jo'oungu ma Dutu, de mita nginika 'o Yahudioka gee niosoriokau nanga Dea ma Jo'oungu ma Dutuka.

18Ma ngekomo ma Kristus, so 'o Yahudioka de ko 'o Yahudiokawa, poodumu 'idadi pomasisori ma Jo'oungu ma Dutuka sababu 'o Ngomasa 'Itebi-tebini ge'enau naga ngoneka.

19Ge'enau so ngini ko 'o Yahudiokawa ge'ena ko ma desonguwau 'ato 'o nyawa ma somoa bolo 'o nyawa ma dudunino. Ngini nioodumu ge'ena ma Jo'oungu ma Dutu 'awi kawasa, ngini ge'ena ma Jo'oungu ma Dutu wi woa ma dodaku.

20Ngini mita matero ka 'o woa gee 'isigoko de ma ba-bangini ge'ena la 'o su-suloko de 'o nabii-nabii, de ma teto ma ngale ma ba-bangini ma guata ge'ena la ma Kristus Yesus.

21Ngone gee pomarimoi de ma Kristus ge'ena matero ka 'o woa gee ma kia sonaa 'isikokinoa 'isidi-diai, 'ikua-kuata, de kaisiika monga 'iamoko 'idadi ma Jo'oungu ma Dutu 'awi Woa gee ka 'una duga womanoa.

22Sababu nio'ahu de ma Kristus, so ngini mita nisikatoomu de 'o nyawa yongaku-ngaku 'iodumu niodadi matero ka ma Jo'oungu ma Dutu 'awi Woa, la ma Jo'oungu ma Dutu womanoa 'ania singinaka ma ngekomo 'awi Ngomasa 'Itebi-tebini.


  Share Facebook  |  Share Twitter

Download Audio MP3 (Efesus 2):
Mobile (Low Quality) - CD (High Quality)

 <<  Efesus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel